Jordan Nitumna - lam Gam Hawmna
14
1 Tu-in hihte siampi Eleazar in, Nun’ tapa Joshua le Israel-te a beh-a bawng’ lutangte tungah a ngah dingun Canaan gam a phacia tawh kizui-in a luah dingun a sehkhiat ahi hi. 2 TOPA in Moses a thupiak bangin amau luah dingte beh kua le alangte tungah aitelna-a kipia ahi hi. 3 Moses in beh nih le alangte luah ding Jordan nisuahna-lam ah a piaksa ahi manin a om laite lakah Levi-te luah ding pia lo hi, 4 ahang in,Manasseh le Ephraim Joseph’ tapa nihte beh nih a suak uh hi. Levi-te in gam, tanh nei lo uh a, ahi hangin ten nading khuapi le a tuuhonte uh le a bawnghonte uh tat nading lonona gam bek kipia hi. 5 Tuaci-in Israel-te in Moses tunga TOPA thupiak bang tektekin gam a hawm uh hi.Hebron, Caleb Kipia
6 Tu-in Judah mite Gilgal a Joshua lam manawhin pai uh a, Keniz-te Jephuneh’ tapa Calep in, "Kadesh Barnea ah TOPA in Pasian mipa Moses tungah nang le kei thu a gensa na thei hi. 7 TOPA nasempa Moses in a gam thu va kan dingin Kadesh Barnea pana hong sawlin kei kum sawmli ka upa ta hi. Kei muhna bangin ama kiangah thu ka zasak a, 8 ahi hangin ka paipih ka sanggamte in mipite lausakin a lungsisak uh hi. Ken ka hileh TOPA ka Pasian ka lungsimneih zahin ka zui hi. 9 Tua ahi ciangin tua ni-in Moses kei tungah hong kiciam a, ‘TOPA ka Pasian na lungsim neih zahin zui na hi manin na khe a na siikna mun peuhpeuh nang goutanh hi dinga, na tate in a tangden ding uh hi,’ ba hong ci hi.
10 "Tua ahi ciangin tu-in TOPA in hong khapsa bang tektekin sehnel gama Israel a vakvak hun sung kum sawmli le kumnga kei hong nungtasak hi. Tua ahi ciangin tuni-in kei hih lai-ah kum sawmgiat le nga ka pha ta hi! 11 Moses in kei hong sawlkhiat lai zahin ka tha a hat lai hi; tua hun lai mah bangin tu-in galsim a kuan thei lai dingin ka hat lai hi. 12 Tua huna TOPA hong khapsa gam hih mualtung teng tu-in kei hong pia in. Tua huna nang mahmah in na zaksa bangin tua lai-ah Anak-te om-a, a khuapite uh zai-in kulhin ki-um hi; ahi hangin TOPA in kei hong huh dinga ama cih bang tektekin amaute ka hawlkhia zo ding hi," a ci hi.
13 Tua ciangin Joshua in Jephuneh’ tapa Caleb thupha pia-a, a luah dingin Hebron a pia hi. 14 Tua ciangin Keniz-te Jephunneh’ tapa Calep in TOPA , Israel Pasian a lungsim neihzahin zui ahi manin Hebron a tang hi. 15 (Hebron pen Anak-te laka mi lian pen Arba tama Kiriath Arba kicisa ahi hi.)
Tua ciangin tua gamah gal a veng ta hi.