Lak Lai ding Gam
13
1 Joshua kum tamta in tekta ahi ciangin TOPA in ama kiangah, "Nang lah tek mahmah ta, lak ding gam lah zai mahmah lai hi.2 Lak ding a samlai gamte:Philistia le Geshur kualte khempeuh, 3 Egypt nisuahna Shihor Gun panin leilu lama Ekron gam dong, a vekpi-in Canaan-te aa in kisima (Avvim-te gam ahi - Gaza, Ashdod, Ashkelon, Gath le Ekron-te a uk Philistia-te gam ngate hi a;) 4 a leitaw lam panin Canaan-te gam khempeuh, Sidon-te gama Arah panin Gebal-te ba huam sung, Amor-te kual a Aphek dong bana; 5 nisuahna panin Lebanon khempeuh Hermon Vum nuai sana Baal Gad panin Lebo cb Hamath ciang dong ahi hi.
6 "Mualtung kuala tengte adingin Lebanon pan Misrephoth Maim ciang, tua muna teng Sidon-te khempeuh kei mahmah in Israel-te mai pan ka nawhkhia ding hi. Keimah in nang kong lamlahsa bangin a luah dingun hih gam tuam khenkhiat inla, 7 beh kua le Manasseh beh alangte tungah hih gam a luah dingun hawmsak in," a ci hi.
Jordan Nisuahna Gam Khenna
8 Manasseh dc alang dang khatte, Reuben-te le Gad-te in Jordan nisuahna lamah TOPA’ nasempa Moses in amaute piak dinga a sehsa bangin amaute in luahna a ngah khin uh hi.
9 Arnon Guam siik tunga om Aroer pan, le guam laizanga khuapi pan le Medeba mualtung zang buppi, Dibon ciang dongah kikhunga, 10 Heshbon a kumpi a sem Amor-te kumpipa Sihon khuapi teng, Ammon-te gamgi pua ciang dong a huam hi. 11 Gilead Geshur le Maacah mite gam, Hermon Vum khempeuh le Bashan khempeuh Selecah dong zong huama - 12 tua in Bashan kumpi Og kumpi-gam bup ahi hi; amah pen Ashtaroth le Edrei ah kumpi a semsa, Rephaim-te laka a suakta lai sun ahi hi. Moses in amaute zo in a gam uh a laksa ahi hi. 13 Ahi hangin Israel-te in Geshur le Maacah mite nawhkhia lo uh a, tua ahi ciangin tuni dong amaute Israel-te lakah teng den uh hi.
14 Ahi hangin amah in amaute a ciamsa bangin TOPA Israel Pasian tungah mei-a hal biaknate Levi behte goutanh ahi nungsang amaute gouluah a pia kei hi.
15 Moses in Reuben beh abawng’- bawng’te tungah a piakte in:
16 A gamgi uh Arnon Guam siik-a Aroer pan le guam laizanga khua pan, a mualtung zanga 17 Medeba gal panin Heshbon le mualtung zanga khuapite khempeuh, Dibon, Bamoth Baal, Beth Baal Meon, 18 Jahaz, Kedemoth, Mephaath, 19 Kiriathaim, Sibmah, kuam mual tunga Zereth Shahar 20 Beth Peor, Pisgah mualdung suk teng le Beth Jeshimoth - 21 mualtung zanga khua khempeuh le Heshbon a uk Amor-te kumpipa Sihon ukna gam khempeuh ahi hi. Moses in tua gama teng - Sihon a beel ukpite - Midian-te gam-ukte, Evi, Rekem, Zur, Hur le Reba-te amah tawh a zawh khawmsa ahi hi. 22 Gal sunga a kithatte banah Israel-te in Beor’ tapa aisanpa Balaam namsau-in a that uh hi. 23 Reuben-te gamgi, Jordan gun pang ahi hi. Hih khuapite le khuaneute Reuben-te in a bawng’bawng’un a luah uh hi.
24 Moses in Gad-te beh a bawng’-bawng’te tungah a piakte in:
25 Jazer gam, Gilead khuapi khempeuh, Rabbah kianga Ammon-te gam Aroer dong, 26 le Heshbon pan Ramoth Mizpah le Beonim ciang le Mahanaim pan Debir gam ciang, 27 le kuam sungah, Beth Haram, Beth Nimrah, Succoth le Zaphon, Heshbon a kumpi Sihon ukna gam om lai teng (Jordan nisuahna-lam panga Kinnereth Tuipi mong ciang) ad ahi hi. 28 Hih khuapite le a khuaneute Gad-te in a bawng’ bawng’un a luah uh hi.
29 Hih in Moses in Manasseh beh a langte tungah a piaksa hi-a, tua pen Manasseh innkuante suan alang, a bawng’bawng’te tungah a piak ahi hi.
30 Tua gam Mahanaim panin kikhunga, Bashan huamin, Bashan kumpipa Og ukna - Bashan a Jair-te tenna khempeuh, khua sawmguk, 31 Gilead kimkhat, le Ashtaroth le Edrei (Bashan a Og kumpipa khuapi) ciang ahi hi. Hih in Manasseh tapa Makir suante ading hi-a - Makir tapate alangte in a bawng’bawng’a a tanh ding uh ahi hi.