Biakbuk
26
1 "Hoih taka kikhuk adum, a dupsan, a ausan khau tawh kigan puanzak sawm, khutsiamte in a bawl cherub-te tawh biakbuk na bawl ding hi. 2 Puanzak khempeuh kikimin - tong sawm nih le giat sau dinga, tong li a zai ga ding hi. 3 Puanzak ngate peh inla, adang ngate zong tua mah bangin hih in. 4 Puanzak kimatna mong dungah adumin bilvang bawlin puanzak dangte zong tua bangin na bawl ciat ding hi. 5 Puanzak nga kipehte khatah a bil sawmnga guan inla, a khat penah zong sawmnga mah guanin a bil tuak khat le khat kitangsak in. 6 Tua ciangin kham mekkilh sawm nga bawl inla, biakbuk bupkhat a suah theih nadingin tua puanzakte gawmkhawmna-in zang in.7 "Biakbuk tung khuhna puante keelmul hi dinga, a vekpi-in sawm le khat hi ding hi. 8 Puanzak sawm le khatte a vekin kikim dinga, tong sawmthum sau-in tong li zai hb ding hi. 9 Kop khat dingin nga zom inla, a kop dang khat dingin guk zomin. Puanzak a gukna pen puanbuk mai-ah khep nihin na khep ding hi. 10 A kipehkhawm puanzak khat mong zui-in a bil gual inla, puanzak a kop khat pen mong zui-in zong a bil gual in. 11 Tua ciangin sumsan mekkilh sawm nga bawl inla, puanbuk bupkhat a suah nadingin a bilte ah mekkilh thuahin gak in. 12 Puanbuk puanzak a valkhia a lang pen biakbuk nung lamah kaisuk ding hi. 13 Puanbuk puanzakte a pang tuakah tong ic khat tuak sauzaw ding hi; tua aval pen biakbuk pang tuak khuhna hi ding hi. 14 Puanbuk khuh nadingin a san-a kinim tuutal vun, le tua tunga khuh sawn nadingin tuipi bawngpi ad vunte bawl in.
15 "Biakbuk dingin singkha singpek kitung lem in. 16 Tua singpek tong sawm sau in tong khat le alang zai be ding hi. 17 Khat le khat a kibang a khun theih dingin a bulhna azang nih ciat om ding hi. Biakbuk singpek khempeuh hih banga na hih ding ahi hi. 18 Biakbuk leitaw-lam ading singpek sawmnih bawl inla, 19 tuate tun nading a nuai-ah ngun bullen sawmli bawl inla, singpek khat ading bullen nih ciat, azangte ah bullen khat ciat om ding hi. 20 Apang khat lam biakbuk leilu-lam pangah, singpek sawmnih le 21 ngun bullen sawm nih - singpek khat nuai-ah nih ta na bawl ding hi. 22 A phaitam lam, tua pen biakbuk nitumna lam mongah 23 a phaitam lam kiute ading singpek nih bawl in. 24 Hih a kiute tuakah alu pan ataw dongin tuate nih paikhawm dinga, sikkual khat sungah kikhum khawm ding hi. A nihin tua bang hi ding hi. 25 Tua ahi ciangin singpek giat le ngun bullen sawm le guk - singpek khatah nih ciat a om ding hi.
26 "A khilna singkha zawlte zong bawl in: a singpekte adingin biakbuk pang khatah nga, 27 apang lang khata ding nga mah le biakbuk phaitam lam, a nitumna lam adingin nga mah bawl in. 28 A laizanga kilhna zawl pen, a singpek kim tanah mong khat pan mong khatah paisuak ding hi. 29 Singpekte khamtui luan inla, a khilna zawlte a len dingin kham kualte bawl in. A khilna zawlte zong khamtui luan in.
30 "Mual tunga nang hong kilak gelna bangin biakbuk lem in.
31 "Hoihtaka kikhuk adum, adupsan, a-ausan khau tawh hoihtaka kigan puan, khutsiamte in a bawl cherub-te tawh kizem puanzak khat bawl in. 32 Ngun bullen lite tung ading, khamtui kiluan singkha khuam lite tungah kham vankhaina in khai in. 33 Puanzak a kilhnate-in khai inla, puanzak nungah Tecipanna singkuang koih in. Puanzak in Mun Siangtho Pen panin Mun Siangtho khenkhia ding hi. 34 Mun Siangtho Pen sunga Tecipanna singkuang tungah thoihdamna sin koih in. 35 Biakbuk leilu-lam pang puanzak pua ah sabuai koih inla, tua tung a leitaw-lam pangah a kigalsai-in meivak tunna koih in.