Biakbuk ading Biaknate
25
1 TOPA in Moses tungah, 2 "Israel-te in kei ading biakna hong tawi dingun gen in. Lungsim takpi-a a pia nuamte’ biaknate kei tangin na sang ding hi. 3 Amaute tung pana na san ding biaknate in: Kham, ngun le sumsan; 4 adum, adupsan, a ausan khaute le hoihtak-a kikhuk-a kigan puante; keel mul; 5 a san-a kinim tuutal vunte le tuipi bawngpi fa vunte; singkha sing; 6 mei-a vak ding olive thau; nilh sathau ding le gimnamtui dingin singnamtuite; 7 siampi puan le awmtuam-a suan dingin onyx suangte le suang manpha dangte ahi hi.8 "Tua ciangin kei ading mun siangtho khat amaute bawlsak in; tua ciangin amaute lakah ka teng ding hi. 9 Nang kong lah ding lim bang tektekin hih biakbuk le a vanzatte khempeuh bawl in.
Singkuang pi
10 "Amaute singkha singkuang - tong nih le alang sau, tong khat le a alang zai, tong khat le alang sang ab khat bawlsak in. 11 A sung a pua a tung khempeuh, kham citaktui tawh na luan dinga, a kimkotah kham tawh geihual na bawl ding hi. 12 Kham kual li sung inla, a khe lite pang khatah kual nih apang lang khat ah kual nih mah hen in. 13 Tua ciang singkha zawl sui-in a pumtangin khamtui luan in. 14 A puak nadingin singkuangpi pang tuaka a kualte sungah khum in. 15 Zawlte, singkuangpi-a a bilte sungah a om den ding hi; tuate a kilakhia kei ding hi. 16 Tua ciangin singkuangpi sungah nang kong piak ding Tecipanna koih in.
17 "Kham citak tawh thoihdamna sin bc khat bawlin - a sauna tong nih le alang, a zaina cd tong khat le alang hisak in. 18 A sin mongte ah sek-a kiseek kham cherub nih bawl in. 19 Among khatah cherub khat bawl inla, a lang khatah a nihna bawl in; a mong tuakah cherub-te sakhatin bawl in. 20 Cherub-te in a khate a tunglamah zakto dinga, tuate tawh a sin a limsun ding hi. Cherub-te khat le khat kimaingat ding uh a, a sin lam nga ding uh hi. 21 Singkuangpi tungah asin koih inla singkuangpi sungah kong piak ding Tecipanna koih in. 22 Singkuangpi sin tunga cherub nihte kikala Tecipanna tungsanah nang tawh i kituak dinga, Israel-te adinga ka thupiakte khempeuh nang kong pia ding hi.
Sabuai
23 "Singkha singin sabuai - tong nih asau tong khat azai tong khat le alang asang de khat bawl in. 24 Kham citak tawh luan inla, a gei kimkotah kham geihual bawl in. 25 A gei kimkotah zapek ef cia a pha a geidal khat zong bawl inla zawl pek tungah kham geihual bawl in. 26 Sabuai ading kham kual li bawl inla a khete omna a kiu lite ah tuate hen in. 27 Sabuai puak nading zawlte a len dingin a zawlpek tawh kimatin a kualte om ding hi. 28 A zawl dingin singkha sui inla, kham-in tuate luan in, tuate-in sabuai kipua ding hi. 29 A kuangdaite le a kuang-ukte kham citak tawh bawlin, biakna sunkhiat nadingin beltung le kuangkumte zong tua mah bangin bawl in. 30 Ka mai-ah a tawntunga om dingin hih sabuai tungah ompihna anlum koih in.
Meivak Tunna
31 Kham citak meivak tunna khat bawl inla, a bul le a kung sekin seek in; pak tawh kibang hai hi dinga, a ngumte le a pakte sakhata kizomkhawm hi ding hi. 32 Meivak tunna panin a ka guk - a pang khatah thum, a pang langkhatah thum mah mengkhia ding hi. 33 Ahiang khatah almond pak lim tawh kibang hai thum - a ngum le a pak kithuah om dinga, a zoma hiangah thum mah, a hiang gukte khempeuh tungah meivak tunna panin kakhia ding hi. 34 Tua hi a meivak tunna tungah almond pak lim kibawl hai li, a ngumte le a pakte kithuah a om ding hi. 35 Meivak tunna pan a kopa a katkhiatna a masa pen nuai-ah a ngum khat omin, a kop nihna nuai-ah a ngum a nihna, a kop thumna nuai-ah a ngum thumna om dinga, a vekin a hiang guk pha ding hi. 36 A ngumte le a hiangte, meivak tunna tawh kham citak kisek khawm sakhat hi ding hi.
37 "Tua ciangin meivak sagih bawl inla, tuate in a mai-a munte a taan dingin a tungah tung in. 38 Taiteh le a kuangte kham citak hi ding hi. 39 Meivak tunna le hih a tunga vatzatte khempeuh kham citak talent fg khat kizanga kibawl hi ding hi. 40 Mual tunga hong kilak lim bangbanga tuate na bawl ding thei in.