Yozéfu Kuloótolola Ebilooto
40
1 Obuchilo kábwaabeele bwaáhweele bwe ebigaambo éebyo, omuheéleza mukúlu we binywéebwa no omutéeki mukúlu we emikaate bakamuhénela omukáma wáabo wa Miísiri. 2 Faráo, omukáma wa Miísiri, yaábanigahálila áabo batwaalilizábe bábili. 3 Mála yaábachiíngila omwiibóhelo eli yaabohiilwémo Yozéfu, omuunzu yo mutwaaliliza omukúlu wo obuliinzi. 4 Óogwo mutwaaliliza mukúlu yaátooza Yozéfu kubeémanya áabo abatwaáliliza bábili. Nabo bakeekala omwiibóhelo ebilo bíinzi.5 Chilo chimo omuchilo, óogwo muhéeleza omukúlu wo obunywi no óogwo omutéeki omukúlu we emikaate bo mwa Faráo baáloota bali omwiibóhelo, buli muuntu ne echilootóche echiine ensoonga yaácho. 6 Yozéfu káyaazeenzile kubáleeba nyenchémo enchaákala, yaasobelwa kubasaanga bázoliilwe. 7 Habwéecho, yaábabúuza áabo abahálila bakulu omwiibóhelo, “Habwaáchi leélo mwaázolelwa muti?”
8 Baámusubiza, “Leélo twaáloota, náho táliho weéna wéena wo kutuloótololela ensoonga ze ebilooto byéetu.” Nawe Yozéfu yaábasubiza, “Múungu níwe ayina obuzizi bwo kuloótoleela ebilooto. Mungaambíle ebilooto byéenyu.”
9 Omuheéleza omukúlu wo obunywi yaáteékelelela Yozéfu echilootóche, naagaámba, “Omuchilooto chaanze naabona omuti gwe ezabibu ogulikulaanda omuméeso gaanze. 10 Omuti óogwo gubeele gwiina amatábazi ásatu. Kágwaabaandize kufuluma amababi, ahonyini gwaáyasa enyaso, no kulába ezabibu ezíhiile. 11 Omuungalo yaanze nkaba nyina echinywéelo cho Mukáma Faráo, habwéecho, naátabula amagoomba go omuzabíbu, naagafuutila omuchinywéelo, naámuheéleza Faráo.”
12 Yozéfu yaámugaambila óogwo omuheéleza, mukúlu wo obunywi aáti, “Ensoonga ye echilooto chaawe ne éezi, áago matábazi ásatu níbyo ebilo bísatu. 13 Omubilo bísatu Faráo alaákulekulila kuluga omwiibóhelo no kukusúbya omumulimo gwaawe gwa kala gwo omuheéleza mukúlu wo obunywi. Olaáhicha kaandi kumuha Faráo echinywéeloche nkokwo okaba noomukólela kala. 14 Náho kólaaba wachiíngulíilwe, niinkusába onyizuke no kuunkólela bizima hakuúnsabila hali Faráo neenye anchiíngulile mbone kulugámo omwiibóhelo. 15 Niinkusába ntyo habwo kuba mazima nkatwaalwa lwa amaani kuluga omúunsi yaanze ya Abahebrania, na kaandi áaha Miísiri tiínkakózile echibi choóna chóona cho kuúnta omuuntaambala yo kunchiíngila omwiibóhelo óomu.”
16 Nawe omutéeki omukúlu we emikaate káyaahuliile nkokwo ensoonga ye echilooto cha muzeenzíwe ni nzima, yaámugaambila Yozéfu, “Neenye naaloota nkokwo nyimukize hamútwe gwaanze ebitukulu bísatu bye emikaate. 17 Omuchitukulu cha halugulu hakaba halimo engaanda nyíinzi ze emikaate yo mwa Faráo, náho enyonyi zikaba nizilya emikaate éezo.”
18 Yozéfu yaámusúbiza, “Ensoonga ye echilooto chaawe ne éezi, ebitukulu éebyo bísatu ne ebilo bísatu. 19 Omubilo bísatu Faráo alaákwiihamo kuluga omwiibóhelo no kukwiíhaho ebicha byaawe. Mála alaákutuunga omubili gwaawe áaha lumaambo ne enyonyi zilaálya omutúumbi gwaawe.”
20 Echilo cha kásatu chikaba chili echilo cho obwiizukilo bwo kuzáalwa Faráo. Habwéecho, yaabakolela amazenyi abatwaáliliza na abakozíbe bóona. Yaabeehámo omuheéleza omukúlu we binywéebwa no omutéeki omukúlu we emikaate, yaábaleeta omuméeso ga batwaalilizábe. 21 Yaámusúbiza omuheelezáwe omukúlu we binywéebwa omulimógwe gwa kala, abóne kumuheéleza kaandi Faráo echinywéelo omuungalóze.