Yozéfu Omuunzu Yo Mwa Potíifa, Omumiísiri
39
1 Yozéfu káyaatweelwe na Baishimaeli abasúluza omúunsi ya Miísiri, akagulwa no óogwo Mumiísiri ayaabele naayetwa Potíifa. a Weényini akaba ali omutwaáliliza na ali mukúlu wa abalwaanila ngoma ba Faráo.2 Omukáma Múungu akamuhweela no kumweébeembelela Yozéfu. Akamukóla ahiílwe bwooli omuli buli chiintu, obuchilo naakola omuunzu yo mukamáwe ali Omumiísiri. 3 Weényini akamanya nkokwo Omukáma Múungu akaba ali hamo na Yozéfu na nkokwo Omukáma Múungu níwe yaamukózile ahiílwe omuli buli chiintu. 4 Habwéecho, akamwéenda no kumweésiga Yozéfu habwe ntuungwáze nzima, noolu kusaaga yaámukóla abe omwiímeelelezi we ekáye ne ebiintúbye byóona. 5 Kuluga obuchilo óobwo yaámukóla Yozéfu kúba omwiímeelelezi, Omukáma Múungu yaáfuuha eéka yóona yo óogwo Mumiísiri. Habwa Yozéfu, Omukáma Múungu yaáfuuha ebiintúbye byóona bye ekáye ne bye ensaambóze. 6 Omukumweésiga Yozéfu, yaamuleekela obuhicha bwo kutégeka ebiintúbye byóona bye ekáye. Talazizile etikatiíka yoóna yóona habigaambo byóona bye ekáye. Weényini akaba ayemanya habyookulyábye byoónka.
Yozéfu Na Mukázi Wa Potíifa
Yozéfu akaba ali omusígazi ahaangilwe kuzima na muluunzi bwooli. 7 Obuchilo kábwazeendéliile, muka Potíifa akalígila Yozéfu no kumugaambila, “Lyaáma neenye!”
8 Náho Yozéfu yaáyaanga hakugaamba aáti, “Leeba, omukáma waanze Potíifa akaampa iinye obutégeki bwe ebiintu byóona omuunzu óomu. Habwo kuba iinye ndiho, táchileebeleza leebeleza echigaambo choóna chóona. 9 Táliho omukózi weéna wéena omuunzu éezi ayina obutégeki kuchila iinye. Kaandi weényini talaánzibiile kukwáata choóna chóona kwoónka kwiihámo íiwe weénka habwo kuba íiwe oli mukazíwe. Niinhicha nta kukola obufu buháango no kukola echiheno nke éecho hali Múungu? Tiínkuhicha!” 10 Óogwo omukázi yaaguma kuneémbelela Yozéfu buli chilo, náho Yozéfu yaáyaanga chenene kulyaama náze nali kumwiílila héehi.
11 Kwoónka chilo chimo Yozéfu yaataaha omuunzu kukola emilimóye, no omwo hakaba hatálimo omukózi weéna wéena wo muunzu. 12 Mukázi wa Potíifa yeeza, yaakwaata echizwáalo cha Yozéfu no kumugaambila, “Lyaáma neenye!” Náho Yozéfu yaáyaanga, yaamwiípulusuka, yaamuleekela echizwaalóche omuungalóze no kwiilukila ahéelu.
13 Muka Potíifa káyaabweene Yozéfu yeelukila ahéelu no kumusígila echizwaalóche, 14 ahonyini yaábeeta abakózi abáandi bo omuunzu omwo no kubagaambila, “Muléebe! Óogu Mweebranía ayaaleésilwe ne báanye naagóola eéka yéetu. Yeeza óomu kweenda kuundyáama lwa amaani, nikwo iinye kutéela empámo. 15 Káyaahulila naateela empámo, yeelukila ahéelu naansigila omweendágwe.”
16 Omukázi óogwo yaábiika omwéenda óogwo kuhika obuchilo mukamáwe káyeezile omúka. 17 Mála yaámuteékelela iíba byóona ebyaagwáho hakumubéeha naagaámba, “Óogu muzáana we Echiebrania óogwo waleésile omúka, yaántaahilila kweenda kuúngoola. 18 Náho kánaateela empámo, yeelukila ahéelu naaleka omweendágwe omuungalo zaanze.”
19 Potíifa káyaahulila ebiteékelelo bya mukazíwe, naagaámba, “Ebigaambo éebi omukózi waawe yaankoléla,” yaásaaya bwooli. 20 Habwéecho, yaátwáala Yozéfu omwiibóhelo áaho embóhe zo Mukáma Faráo zikaba zíbohelwa.
Náho Yozéfu káyeekeele omwo omwiibóhelo, 21 Omukáma Múungu akaba achili hamo náze, yaámufuuha bwooli no kumukóla ayeéndwe no omukúlu we éelyo ibóhelo. 22 Habwéecho, mukúlu wi ibóhelo yaaha Yozéfu obwiímeelelezi bwe embóhe zóona ezili omwiibóhelo na buli mulimo gwo omwo. 23 Kulugiilila áaho óogwo mukúlu we éelyo ibóhelo yaaba atáchileebeleza leebeleza choóna chóona éecho Yozéfu yayemeeleliile habwo kuba Omukáma Múungu akaba ali hamo náze. Omukáma Múungu yaámukóla ahiílwe omuli buli chiintu choóna chóona éecho yaabeele naakola.