Yuda Na Tamáari
38
1 Obuchilo óobwo, Yuda akatáana na beenebáabo yaaza kutúula omuchaalo cha Aduláami hamo no Omwaduláami, iziinálye Híira. 2 Óokwo Yuda yaabugana no muhala wa Shúa ali Omukanaánikazi, yaámulomeela, yaámutaasha. 3 Óogwo mukázi yaátwáala eenda, yaazáala omwaana wo obukwaáta, Yuda yaamweeta Eri. 4 Kaandi mukazíwe Yuda yaátwáala eenda, yaazáala omwaana wo obukwaáta, yaamweeta Onáani. 5 Yaaguma kuzáala omwaana oóndi wo obukwaáta, yaamweeta Shéela. (Obuchilo naazaálwa Shéela, Yuda akaba ali omuchaalo cha Keézibu.)
6 Yuda akasuumbikila Eri omukázi naayetwa Tamáari. 7 Nawe Eri, ali mutábani wa Yuda wo obuzigeezo, akaba ali enkola bíbi omuméeso go Omukáma Múungu, habwéecho, Múungu yaamwaka obulamíbwe. 8 Áaho niho Yuda kugaambila Onáani, “Huungúla Tamáari, mukázi wa chífwa Eri, habwo kuba omubuteéka bwéetu okwiile kukola oótyo hali mulámu waawe Tamáari obóne kumuzaálila mukúlu waawe abaana.”
9 Náho Onáani akamanya nkokwo mazima abaana áabo alizaála hali Tamáari muka mukulúwe, tibaliba oluzáalo lwa weényini. Habwéecho, buli káanya obwaákaba alyáama na Tamáari, akaba aseesa enzumáze zo obukwaáta ahaansi, ataákwiiza akamuzaálila mukulúwe abaana. 10 Entúungwa mbi éezo zo kwáanga kuzaálila mukulúwe abaana zaámunigahaza Omukáma Múungu, habwéecho, Múungu nawe yaamwaka obulamíbwe Onáani, nawe nka muzeenzíwe.
11 Áaho Yuda yaagaambila Tamáari, mweengáwe, “Súba owáanyu hali iíso oyikále nko omukázi akaambwiile, abaánze Shéela, mutábani waanze, akúle.” Yuda yaámuseleka aátyo habwo kuba akatíina nkokwo Shéela nawe yaakaáfwa nka bakulúbe. Habwéecho, Tamáari yaasuba owáabo hali iíse.
12 Ebilo bíinzi kábyaahiíngwiile, muka Yuda ali muhala wa Shúa, yaákaba. Yuda káyaamazile kwaalamila mukazíwe, yaalugáho na munywaaníwe Híira ali Omwaduláami, baázeenda ahaantu niheétwa Timúna. Óokwo niho abaantu bakaba nibanogóla amooya ge entaamáze. 13 Tamáari káyaahuliize nkokwo isézaala ali omumuháanda kuza Timúna kunógola amooya ge entaamáze, 14 yaázuula ebizwaalóbye byo omukázi akaambwiile, yeésweekelela omwiitaandíyo habusóbwe atamanyíika. Ahonyini yaázeenda, yeekala ahi iléembo lyo kutaaha omubutuulo bwa Enáamu obuli omumuháanda gwo kuza Timúna. Tamáari akakola aátyo hakumanya nkokwo Shéela yaákuzile, náho Yuda akaba acháali kumukuúndila akuumpulwe na Shéela.
15 Yuda káyaabweene Tamáari haampiíngulo yo omuháanda, yaámwiínganisa nko omukázi omusiihani, habwo kuba akaba aisweekeliile omwiitaandíyo habúso. 16 Áaho akaba atákamúmanyile nkokwo ali mweengáwe. Habwéecho, yaámuzáho ha ensoonga mbi, naamugaambila aáti, “Niinyeénda kulyaama neewe.”
Tamáari yaámusúbiza naamubuúza, “Noompáchi kánaakukuúnda kulyaama neewe?”
17 Yuda yaámusúbiza, “Niinkuha omwaana gwe embuzi kuluga omubúsho bwaanze.”
Tamáari yaaguma kumubúuza, “Noompáchi cho kukwaátiliza nkokwo nondeetéla omwaana óogwo?”
18 Yuda yaámusúbiza naamubuúza, “Nooyeénda nkuhéchi cho kukwaátiliza?”
Tamáari yaámusúbiza, “Ompe omudáali gwo oluméenko lwi izíina lyaawe no omukúufu gwaáho, óogu ozweele omubicha, hamo ne éezo enkoni éezo oyináyo.” Áaho Yuda yaámuha ebiintu éebyo byóona, baázeenda, yaalyaama náze, nawe yaátwáala eenda. 19 Ahonyini Tamáari yaalugáho. Yaázuula óogwo omwiitaandíyo, óogwo akaba aisweekeliile habúso, yaazwaala kaandi ebizwáalo byo omukázi akaambwiile.
20 Áaho Yuda yaasiindika munywaaníwe Híira ali Omwaduláami kumutwaálila óogwo omukázi omwaana gwe embuzi abóne kuchuúngula ebiintu éebyo akaba amukwaátiliize. Náho Híira talámubweene. 21 Habwéecho, Híira yaabuuza abakwaáta bali abatúuzi ba Enáamu, “Ali nkáhi óogwo omukázi omusiihania ayaabele ali ahaampiíngulo yo omuháanda gwa Enáamu?”
Baámusubiza, “Titúkabonaga omukázi omusiihani áaha.” 22 Habwéecho, Híira yaásuba hali Yuda, yaámugaambila, “Tinaámubona! Kaandi abakwaáta bali abatúuzi báaho baángaambila nkokwo áaho tihazíla omukázi omusiihani weéna wéena.”
23 Níkwo Yuda kugaamba, “Muleke asigále nabyo ebiintu éebyo, tutaákwiiza kugooka omubaantu. Íiwe nyini weébonela nkokwo naamutweekela omwaana gwe embuzi, náho tiwaámubona.”
24 Kágaahiíngwiile nka améezi ásatu, Yuda yaáhaabwa empola nkokwo Tamáari, mweengáwe, yaabeele ne entuungwa zo obusiihani, no óobu atweele eenda. Ahonyini Yuda yaálagila, “Mumutwaale ahéelu ye echikaali, asiingaálichwe omumulilo!”
25 Kábabeele nibamusohóza, Tamáari yaasiindika omuuntu kugaambila isézaala, naagaamba aáti, “Káanyina we ebiintu éebi níwe yaampéele eenda. Leeba! Omudáali óogu no omukúufu gwaáho hamo ne enkoni éezi ne ebyoóha?”
26 Yuda yaábimanya ebiintu éebyo, yaágaamba, “Tamáari no mukázi anchizile áaha bikolwa bizima habwo kuba tiindámukuúndiile kuhuungulwa na mutábani waanze Shéela nkokwo naalagíile.” Kulugiilila obuchilo óobwo, Yuda talásubiile kaandi kulyaama na Tamáari.
27 Kábwaahikile obuchilo bwa Tamáari kuzáala, ekamanyiika nkokwo akaba ayina eenda ya amaloongo. 28 Káyaabeele naazaála, omwaana oómo yaasohoza omukóno, omukeékulu omuzáaza yaakwaata obuluba bulíkutukula yaágukoma óogwo mukono, kunu naagaámba, “Óogu níwe yaaba wo kubaanza kusohola.” 29 Náho óogwo omwaana káyaasubize omukonógwe omuunda, muzeenzíwe yaázáalwa wo kubaanza. Níkwo muzáaza kugaamba, “Mbweenu leeba nkokwo waasohola lwa amaani!” Habwéecho, yaamweeta izíina Peréesi.b 30 Mála mudugúwe yaázaalwa ayine óobwo obuluba bulíkutukula hamukóno, nawe iziinálye yaayetwa Zéera.c