Yozéfu Na Bakulúbe
37
1 Náho Yakobo akeekala omúunsi ya Kanáani eyaatwiilémo iíse nko omunyamahaánga.2 Éezi nizo empola zo oluzáalo lwa Yakobo. Yozéfu káyaabeele ayine emyáaka ikúmi na musáanzu, weényini akaba aliisa entaama hamo na bakulúbe. Bakulúbe bali abaana ba Bíliha na Zílipa, nabo bali bakeése. Náho Yozéfu akamanyisa iíse entuungwa mbi éezo bakaba nibakola bakulúbe.
3 Izilaelia akaba amweenda bwooli Yozéfu kuchila abaanábe abáandi bóona habwo kuba akamuzáala yaabeele omunyaampala. Chilo chimo akamukolela Yozéfu enkaanzu éenda esémiile na etonílwe kuzima. 4 Náho bakulúbe kábaabweene nkokwo isébo amweenda bwooli Yozéfu kuchila boónyini, baámutamwa no kulekela kuhooyab náze kuzima.
Ebilooto Byo Bubáasi Bya Yozéfu
5 Chilo chimo omuchilo, Yozéfu yaáloota, náho káyaabalootoliile bakulúbe, boónyini baaguma kumutámwa. 6 Akabagaambila, “Munhúliilize iinye éechi naaloóta. 7 Tukaba tuli bóona omumusili nitugesa no kukóma eminyagac ye ngano. Ahonyini omunyaga gwaanze gweemeelela, no obuchilo óobwo, eminyaga yéenyu yeékobya hakukúba omunyaga gwaanze no kugweénamila.”
8 Bakulúbe baámugaya, “Nooyibeéha, óobu nooyeénda kúba omukáma otutégeke íichwe?” Áaho baaguma kumutámwa bwooli habwe ebilooto ne ebigaambóbye.
9 Kaandi Yozéfu yaáloota echilooto echíindi no kubásoomboolela bakulúbe, “Munhúliilize nkokwo naaloóta kaandi. Naabona izóoba, okwéezi ne enyenyéezi ikúmi neemo nibinyinámila iinye.”
10 Mála káyaateekeliile iíse na beenebáabo echilooto éecho, iíse yaámuchaáhukila, “Íiwe, echilooto chaawe chiine ensoongáchi? Sii! Na mazima nooteékuza iinye na nyoko na bakulu baawe tuléeza tukulámye omuméeso gaawe?” 11 Bakulúbe baamubonela ichubi náho iíse yaata echigaambo éecho omumwooyógwe.
12 Kábaabalíile, bakulu ba Yozéfu baázeenda kulíisa ebituungaánwa bya isébo héehi na Shekeemu. 13 Izilaeli yaagaambila Yozéfu, “Noomanya nkokwo bakulu baawe nibaliisíza óokwo Shekeemu. Habwéecho, niinkulagíla ozeénde hali boónyini.”
Yozéfu yaámusúbiza, “Neékiliza.”
14 Izilaeli, iíse, yaámugaambila, “Zeénda obaléebe bakulu baawe hamo ne ebituungaánwa kabalaaba bali bazima, mála ondeétele empola záabo.” Áaho yaámutuma Yozéfu kuluga omuumbúga ya Hebulóoni kuza Shekeemu. Káyaahikile óokwo, 15 omuuntu oómo yaasaanga Yozéfu naatúmaanga túmaanga omuumbúga, yaámubuuza, “Nooloondáchi?”
16 Yozéfu yaámusúbiza, “Niindoondela bakulu baanze. Niinkusába ongaambile nibaliisíza nkáhi ebituungaánwa byáabo.”
17 Óogwo muuntu yaámusúbiza, “Baalugilého áaha. Mbahuliile nibagaámba kuza Dotáani.” Habwéecho, Yozéfu yaábakulaatila bakulúbe óokwo Dotáani.
Yozéfu Kuguzwa Na Bakulúbe
18 Bakulúbe kabaamulolíile Yozéfu achili hala neéza, beéhanuuza nkokwo balaamwíita. 19 Beégaambila, hakumúgaya, “Leeba óogwo chiloóta ebilooto, neéza. 20 Mwiilóoko tuzeénde kumwíita, tumunáge omuli límo lye eliina lila.d Mála tulaagaamba túti, aliílwe ne echikoókwa. Áaho tulaaléeba ebilootóbye nibiba bíta!”
21 Reubeeni káyaahuliile ebigaambo éebyo, yaateekuza omuháanda gwo kuchiza Yozéfu, yaábasaba, “Tutaákumwíita. 22 Mutaákuseesa ensagamáye. Kwoónka, mumunáge omuliina eli elilae elilya áaha omwiiluungu,f náho mutamwíita.” Akagaamba aátyo abóne kuchiza Yozéfu bwiiseleke omuungalo záabo no kumusúbya hali iíse.
23 Habwéecho, Yozéfu kíyaahikíle hali bakulúbe, baámuzuula lwa maani enkaanzúye éenda esémiile na etonílwe kuzima eyaakaba azweele. 24 Áaho baámukwáata, baámunaga omuliina éelyo lila elikaba litéena améenzi obuchilo óobwo.
25 Kábaabeele beékeele nibalya, baábona omusoóloongo gwa Baishimaeli nibeéza kuluga Gileyáadi nibaza Miísiri. Bakaba beene entwaangabuleende ziímukize ebiluungo, amazúta mazima ge emiti go kweésiiga, ne emanemane.g
26 Yuda yaábagaambila badugúbe aáti, “Beenebéetu, nichitugasáchi kátulaamwíita mulúmuna wéetu no kuseleka echikolwa chéetu cho kumwíita? 27 Hachili tumugúze hali áabo Abaishimaeli. Tutaákumwíita, habwo kuba ni mulúmuna wéetu, tuli enságama eémo.” Beenebáabo baákuundilana.
28 Abasúluzah kábaahikile áaho, beenebáabo baamwiihámo omuliina éelyo, baámuguza hali Abaishimaeli habuguzi bwe eshekéeli makúmi ábili.i Mála Abaishimaeli baatwaala Yozéfu omúunsi ya Miísiri.
29 Káyaabalíile, Reubeeni akasuba kwiihámo Yozéfu omuliina éelyo. Yaákaamaala kusaanga Yozéfu tálimo, yaálaandamula ebizwaalóbye habwo kuzoolelwa. 30 Yaasuba hali beenebáabo azooliilwe, yaábagaambila, “Omusígazi tálimo! Óobu, nzile nta?”
31 Mála baábaaga embuzi, beémucha enkaanzu ya Yozéfu, baázidubika omuunságama ye éezo embuzi. 32 Baámala, baámutwaálila isébo éezo enkaanzu no kumugaambila, “Twaakuga enkaanzu éezi. Mbweenu oziléebe keélaaba eli yo omwaana waawe Yozéfu nali mmahi.”
33 Isébo yaahikila kuzímanya éezo enkaanzu, yaábagaambila azooliilwe bwooli, “Niyo yoónyini! Mazima, omwaana waanze Yozéfu ataasagwiilwe ebinogóka no kulíibwa ne echikoókwa!” 34 Áaho Yakobo yaálaandamula ebizwaalóbye habwo obuzune buháango, yaazwaala amaguníla, yaáyalamíla omwaanáwe ebilo bíinzi. 35 Abatábani bóona na abahala bóona beeza kumusuumbilila, náho Yakobo yaáyaanga kusuumbililwa, naagaámba, “Muundéke nyalámile omwaana waanze kuhicha nfwee no kubugana náze omúunsi ya abáfwiile.”jk Óokwo nikwo iíse yaayalamiile Yozéfu.
36 Obuchilo óobwo, óokwo Miísiri, abasúluzal bakamúguza Yozéfu hali Potíifa ali omutwaáliliza wa Faráo na mukúlu wa abalwaanila ngoma.