Oluzáalo Lwa Esau
36
1 Óolu nílwo oluzáalo lwa Esau (iziinálye elíindi naayetwa Edóomu). 2 Esau akataasha abakázi Abakanáani. Owa mbele, Ada ali muhala wa Elóoni, Omuhiti. Owa kábili, Oholibáama ali muhala wa Ana, mwiízukulu wa Sibeyóoni, Omuhíivi. 3 Owa kásatu, Baseméeti ali muhala wa Ishimaeli na kaandi ali munyáanya wa Nebayóoti. 4 Esau na Ada baázaala omwaana wo obukwaáta ali Elifáazi. Esau na Baseméeti baázaala omwaana wo obukwaáta ali Rewéeli. 5 Esau na Oholibáama baázaala abaana abo obukwaáta bali Yeushi, Yaláamu na Kóora. Áabo nibo abaana ba Esau abáyaazéele omúunsi ya Kanáani.6 Mála Esau yaábatwáala bakazíbe, abaanábe abo obukwaáta na bo obuhala, abaantu bóona bo mukáye, ebituungaanwábye byóona ne ebiintúbye byóona éebi yaabeele atuunzile omúunsi ya Kanáani, yaafulukila ahaandi hala no mulúmuna Yakobo. 7 Akakola aátyo habwo kuba ebiintu byáabo bikaba bili bíinzi bwooli, baálemwa kutuúlana. Éensi éezo, eyóbaabeele batwiilémo nka Abanyamahaánga, ekafúunda habwo kukánya kwe ebituungaánwa byáabo. 8 Habwéecho, Esau (iziinálye elíindi naayetwa Edóomu) yaaza kutúula omumabaanga ge echaalo cha Seyiri.
9 Óolu nílwo oluzáalo lwa Esau, iíse wa Baedóomu, abaabele nibatuula omumabaanga ge echaalo cha Seyiri.
10-13 Esau na Ada ali omukazíwe wa mbele, bakazáala Elifáazi. Nawe Elifáazi akazáala abaana batáanu abo obukwaáta bali Temáani, Omáari, Zéefo, Gatámu na Kenáazi. Kaandi Elifáazi akaba ayina omukázi omuto naayetwa Timúna, bakazáala omwaana Amaléeki. Esau na Baseméeti ali omukazíwe wa kábili bakazáala Rewéeli. Nawe Rewéeli akazáala abaana bana abo obukwaáta bali Naháti, Zéera, Shama na Míiza.
14 Esau na Oholibáama ali omukazíwe wa kásatu, akaba ali muhala wa Ana, mwiízukulu Sibeyóoni, bakazáala abaana básatu bali Yeushi, Yaláamu na Kóora.
15 Áaba nibo bakulu be engaanda kuluga omuluzáalo lwa Esau. Kuluga omuli áabo, Elifáazi, omwaana wo obuzigeezo wa Esau, akazáala engaanda éezi, nizo Abatemáani, Abomáari, Abazéefo, Abakenáazi, 16 Abakóora, Abagatámu na Abaamaléeki. Áaba nibo engaanda zo oluzáalo lwa Elifáazi omúunsi ya Edóomu, nabo bakaba bali abeézukulu ba Esau na Ada.
17 Rewéeli, omwaana wa kábili wa Esau, akazáala engaanda éezi, nizo Abanaháti, Abazéera, Abasháma na Abamíiza. Omúunsi ya Edóomu, áaba nibo engaanda zo oluzáalo lwa Rewéeli, nabo bakaba bali abeézukulu ba Esau na Baseméeti.
18 Na Esau hali Oholibáama, mukazíwe wa kásatu (ali muhala wa Ana), bakazáala engaanda éezi, nizo Abayeushi, Abayaláamu na Abakóora. 19 Engaanda éezo zóona zikazáalwa kuluga hali Esau (iziinálye elíindi naayetwa Edóomu).
Oluzáalo Lwa Seyiri Omúunsi Ya Edóomu
20-21 Seyiri, Omuhóori, na abaanábe bakaba bali abatúuzi bo obuteéka omúunsi ya Edóomu. Seyiri akazáala engaanda za Abalotáani, Abashobáali, Abasibeyóoni, Abahana, Abadishóoni, Abaezéeri na Abadisháani. Éezo nizo engaanda omuli áabo Abahóori abazeelwe na Seyiri omúunsi ya Edóomu.
22 Lotáani, omwaana wo obuzigeezo wo mwa Seyiri, akazáala abaana abo obukwaáta nabo ni Hóori na Hemáamu (kaandi, Lotáani akaba ayina munyáanya naayetwa Timúna).
23 Shobáali akazáala abaana abo obukwaáta nabo ni Aliváani, Maniháati, Ebáali, Shéefo na Onáamu.
24 Sibeyóoni akazáala abaana abo obukwaáta nabo ni Aya na Ana. (Ana níwe yaabeele owa mbele kubona enzwéeloa za améenzi agalikwóocha omúunsi yo obwoóma háyaabeele naaliisíza ensíkili zeése Sibeyóoni).
25 Ana akazáala omwaana wo obukwaáta, Dishóoni (kaandi yaazáala omuhalákazi, Oholibáama).
26 Dishóoni akazáala abaana abo obukwaáta nabo ni Hemdáani, Eshibáani, Itiráani na Keráani.
27 Ezéeri akazáala abaana abo obukwaáta nabo ni Biliháani, Zawáani na Akáani.
28 Disháani akazáala abaana abo obukwaáta nabo ni Usi na Aráani.
29-30 Áabo nibo bakaba bali bakulu be engaanda za Bahóori omúunsi ya Edóomu: Abalotáani, Abashobáali, Abasibeyóoni, Abahana, Abadishóoni, Abaezéeri na Abadisháani.
Abakáma Be Éensi Ya Edóomu
31 Áaba nibo abakáma abaatweele éensi ya Edóomu, obuchilo éensi ya Izilaeli etákatwéelwe na abakáma be Echiizilaeli. 32 Beela, omwaana wa Béori, akatwaala éensi ya Edóomu, ne echikaalíche chikaba chili Dinhaba.
33 Káyaafwíile Beela, Yobábu ali omwaana wa Zéera kuluga Bozira, yaátwáala engoma.
34 Káyaafwíile Yobábu, Hushámu we éensi ya Batemáani yaátwáala engoma.
35 Káyaafwíile Hushámu, Hadáadi, omwaana wa Bedáadi, yaátwáala engoma. Echikaalíche chikaba chili Avíti. Óogwo níwe yaálwéene no kubasíinga Abamidyáani omúunsi ya Moabu.
36 Káyaafwíile Hadáadi, Samúla kuluga Maziléka yeekalila engoma.
37 Káyaafwíile Samúla, Shauli yaátwáala engoma. Shauli akaluga Rehobóoti, héehi no munóna gwa Efuráati.
38 Káyaafwíile Shauli, Baal-Hanáani ali omwaana wa Akibóori yaátwáala engoma.
39 Káyaafwíile Baal-Hanáani, Hadári yaátwáala engoma, ne echikaalíche chikaba nicheétwa Pau. Mukazíwe Hadári akaba naayetwa Mehetabéeli, muhala wa Matiréedi, mwiízukulu wa Mezaháabu.
40-43 Esau akaba ali iíse wa Abaedóomu. Áaga na mazíina ga bakulu be engaanda zo kuluga hali weényini bali Timúna, Alva, Yeteti, Oholibáama, Ela, Pinóoni, Kenáazi, Temáani, Mibisáari, Magadieli na Iráamu. Éezo ngaanda ezaalugiilile omubakúlu áaba hamo ne ebyáalo ebibaabeele batwiilémo, byóona bikeetwa amazíina kwiingana na mazíina ga áabo abategeki ba kala.