Yakobo Kufulukila Betéeli Kuluga Shekeemu
35
1 Káyaabalíile, Múungu akagaambila Yakobo, “Imuka, ozeénde kutúula Betéeli, óokwo onyoombekele itaámbilo iinye, Múungu, ayaakwiizilého obuchilo noomwiilúka mukúlu waawe Esau.”a2 Yakobo yaagaambila oluzaalólwe, bakazíbe hamo na abaantu bóona be ekáye, “Munáge ebisusano byóona bya bamúungu be engaanda ezíindi, mweéyeze emibili no mumyooyo, muhiindule ebizwáalo byéenyu bibe bizima. 3 Niho tulugého tuzeénde Betéeli, mbone kwoómbeka itaámbilo lya Múungu ayaampweéliile obuchilo bwe enáku zaanze, Múungu ayaabele neenye hoóna hóona áaho naazíile.”
4 Habwéecho, nabo baámuha Yakobo ebisusano byáabo byóona ne eheléeni éezo bakaba baatiile ahamatwi gáabo, yaamala Yakobo yaábiziika nké ebitaaba ahaansi yo omuti óogwo nko omuzule ogukaba guli héehi na Shekeemu. 5 Obuchilo nibazeénda, Múungu yaabatámo obutíini abatúuzi bóona be ebikaali byóona éebyo bikaba bili héehi na Shekeemu, habwéecho, tíbaalamukulaatile Yakobo na Abaantu be ekáye kweéhoola.
6 Niho Yakobo na abaantúbe bóona áabo akaba ayinabo baáhika ahaantu niheétwa Lúzu, niho Betéeli, omúunsi ya Kanáani. 7 Áaho yaayoómbeka itaámbilo no kuhéeta El-Betéelib habwo kuba Múungu akamwiizáho óokwo, obuchilo naamwiiluka Esau ali mukulúwe. 8 Obuchilo óobwo, Debóora yaáfwa. Akaba ali omulezi wa kala wa Rebéka. Yaáziikwa ahamuti gulíkususana no omuzule omwiihaalo lya nyakaziinzákazi lya Betéeli. Habwéecho, omuti óogwo gwaáyetwa Omuzule gwo Kwaalamiláho.c 9 Yakobo káyaasubile Betéeli kuluga Mesopotamia,d Múungu yaamwiizáho kaandi, yaámufuuha, 10 ahakumugaambila naamwiizukiza, “Tócheetwa kaandi Yakobo, óobu izíina lyaawe nilíba Izilaeli.”e Habwéecho, Múungu yaamweeta Izilaeli. 11 Mála Múungu yaámugaambila, “Iinye ndi Múungu Omuzizi wa Byóona, ozaále ozaaliláne. Hali íiwe lilyaálugámo ihaánga liháango ne embága mpáango ya amahaánga, na abakáma balyaáluga omuluzáalo lwáawe. 12 Éensi éezi eyinaheele Ibrahímu na Izáaka niinkuha íiwe na ndyaábaha oluzáalo lwáawe.” 13 Ahonyini Múungu yaamuleka, yaaza olugulu kuluga áaho akaba naahooya na Yakobo. 14 Yakobo yaáyemeeleza ibáale lila nké enyómyo yo obwiizukilo áaho Múungu yaahooyile náze. Mála yaakola omuheélezo habwa Múungu gwo kuseeselela éezo nyómyo amaálwa ge ezabibuf no kuliítilila amazúta, kumanyisa nkokwo áaho na ahatakatíifu. 15 Yakobo yaaheeta ahaantu áaho Múungu yaahooyile náze Betéeli, ensoonga, “éenzu ya Múungu.”g
Okuzáalwa Kwa Benyaámini No Kufwa Kwa Raáhéeli
16 Yakobo ne embagáye baalugáyo Betéeli, baayolekela Efuráati.h Kábaasigeeze omwáanya múche kuhika óokwo, Raáhéeli yaabaanza kulúmwa obusuungu bwo kuzáala, no obusuungúbwe bwaba buháango no kumwaágalaza bwooli. 17 Obusuungu kábwakanyile bwooli omukuzáala omwaanáwe, omukeékulu omuzáaza yaámugaambila, “Otátiina, óobu noozaála omwaana oóndi wo obukwaáta.”
18 Obuchilo Raáhéeli naalwaana no omwooyo, yaamweeta omwaana izíina Benóoni.i Kwoónka iíse yaamweeta óogwo omwaana Benyaámini.j 19 Níkwo Raáhéeli kufwa no kuzíikwa héehi no omuháanda ogulíkuza Efuráati (elikwéetwa leélo, Betlehemu). 20 Yakobo yaáyemeleza enyomyo yi ibáale ahaámbi ya Raáhéeli eébe obwiizukilo, ne enyomyo éezo echiliho kuhika leélo.
21 Izilaelik yaázeendelela no oluzeendólwe. Káyaahiíngwiile omunala gwa Edéeri, yaakola enkáambi. 22 Obuchilo Izilaeli achili omuchaalo éecho, omutábani Reubeeni yaalyaama na Bíliha, omuzánakazi wa iíse. Nawe Izilaeli yaáhuliza empola éezo.
Abatábani Ba Yakobo
Yakobo akaba ayina abatábani ikúmi na bábili. 23 Abatábani ba Léeya bakaba bali Reubeeni (omwaana wo obuzigeezo wa Yakobo), Simeyoni, Láawi, Yuda, Isakáari na Zebulúuni. 24 Abatábani ba Raáhéeli bakaba bali Yozéfu na Benyaámini. 25 Abatábani ba Bíliha, omuzánakazi wa Raáhéeli, bakaba bali Dáani na Naftáali. 26 Na abatábani abazeelwe na Zílipa, omuzánakazi wa Léeya, bakaba bali Gáadi na Ashéeri. Áabo nibo abatábani ba Yakobo, áabo yaazeele achili óokwo Mesopotamia.l
Okufwa Kwa Izáaka
27 Níkwo omuhelo gwo oluzeendólwe, Yakobo yaataaha hali iíse Izáaka óokwo Maámule, héehi na Hebulóoni,m áaho niho nawe Ibrahímu akaba atwiile nko omunyamahaánga. 28 Izáaka akaba ayine emyáaka igána límo na makúmi munáana (180), 29 yaáfwa, yaányaampaheele bwooli. Yaakulaatila beeseénkulu abamwiibeembéliile kufwa. Níkwo abatábani Esau na Yakobo kumuziika.