Simeyoni Na Láawi Kweéhoola Habwa Munyaányabo
34
1 Emyáaka káyaahiíngwiile, Dina, ali muhala wa Yakobo ayaazeelwe na mukazíwe Léeya, akaba ali enkuuba. Yaazeenda kuyeélela Abakanaánikazi omúunsi omwo Kanáani. 2 Shekeemu, omutábani wa Hamóori, Omuhíivi, ali mukúlu we éensi éezo, káyaamubweene Dina, yaámuligila, yaamukwáata, yaámulyáama lwa amaani, yaámwata. 3 Náho Shekeemu yaaguma kumulígila, yaatáho kumulomeela no kumuleémbeleza. 4 Habwéecho, Shekeemu yaaza kuhooya na Hamóori, iíse, yaámusaba, “Oze kweébuula owáabo Dina, omuhala óogwo, abe mukáanze.”5 Níkwo Yakobo yaáhuliza empola nkokwo omuhala, Dina, yaayatwa no kutókoozwa hakugaywa na Shekeemu. Kwoónka, abatábani bakaba bali hala nibaliísa ebituungaánwa. Habwéecho, Yakobo talágaambile echigaambo choóna chóona kuhika áaho abatábani baasubiile omúka.
6 Mála Hamóori yaátwáala omutábani Shekeemu, baázeenda hali Yakobo kuhooya náze. 7 Obuchilo óobwo, abatábani bakaba nibasúba kuluga omumaliísizo. Kábaahúliile ebíbi éebyo Shekeemu yaakóliile munyaányabo Dina, baátamwa no kunigahala bwooli. Hakumulyáama muhala wa Yakobo, yaakola echigaambo cho obufu ne eche ensóni omuchaalo cha Abaizilaeli. Echigaambo éecho chikaba chili omuzilo.
8 Hamóori yaatwéeza hali Yakobo na batábani aáti, “Shekeemu, mutábani waanze, naamweénda bwooli muhala waawe, niimbasába mumusiígile. 9 Tukuundiláne kukuúmpulana hakusiigilana. Ichwe tukuumpúle abahalákazi bo olugaanda lwéenyu, neemwe mukuumpúle abéetu. 10 Hachikolwa éecho, nimutuúla hamo neechwe, nimukuundilwa kutúula hoóna hóona omúunsi óomu, kusuluza no kweébonela obutúulo óomu.”
11 Níkwo Shekeemu kugaambila iíse Dina na banyáanya, “Munkuúndile okusaba kwaanze mbone kukuúmpula Dina hakusiigilwa, neenye niimbáha choóna chóona éecho mulaayeénda. 12 Mungaambíle omuzúgo ne engabilano yoóna yóona eyomulíkweenda, nóobwo bilaaba bíinzi bíta, mazima iinye niinsohóza mubóne kuúnsiigila omuhalákazi óogu.”
13 Náho abatábani ba Yakobo baalamula kubabéeha Shekeemu na Hamóori habwo kuba Shekeemu akaba yaámusiisile no kumugóola munyaányabo Dina. 14 Áabo baábasúbiza, “Titwaákuhicha kusiiga munyaányeechwe hamuuntu atákasázilwe ikóba lyo obukwaáta. Kukola oótyo ne ensóni mpáango omuli íichwe. 15 Kwoónka nitukuundilána kámulaahicha echilagilo éechi, buli mukwaáta omuli íimwe ahatíkwe kusálwa ikóba lyo obukwaáta mube nkéechwe. 16 Kámulaakola mútyo, niho tulaabasiígila bahalákazi béetu, neemwe mutusiígile abéenyu, nitwiikala hamo neemwe no kúba embága eémo. 17 Kwoónka kámulayáanga kusálwa ikóba lyo obukwaáta, nitubaáka munyaányeechwe no kuluga áaha.”
18 Ebigaambo éebyo bikabasémelela Hamóori no omutábani, Shekeemu. 19 Omusígazi óogwo taléliilwe no obuche bwa kati kuhicha echilagilo éecho hakusálwa, habwo kuba akaba naamweénda bwooli óogwo muhala wa Yakobo. Shekeemu níwe akaba ayine isima kuchila bóona omúka yáabo. 20 Habwéecho, Hamóori no omutábani Shekeemu baázeenda ahi iléembo lye echikaali cháabo chiche, áaho bakolela omukobo, baahooya na abatúuzi báabo baáti, 21 “Yakobo na abaantúbe ni banywáani béetu. Tubanyegéze beekale hoóna hóona omúunsi yéetu basulúze, habwo kuba éensi yéetu ni ngázi, neetuhícha kutúula íichwe chwéena. Nibatusiígila abahalákazi báabo neechwe, nitubasiígila abéetu. 22 Kwoónka boónyini nibakuúnda kwiikala hamo neechwe no kúba embága eémo kátulaakuunda echilagilo éechi, nitumusála ikóba lyo obukwaáta buli mukwaáta omuli íichwe nka boónyini. 23 Kátulaakola echigaambo éecho, ebituungaánwa byáabo ne ebiintu byáabo byóona nibiba ebyéetu. Habwéecho, tubakuúndile babone kwiikala hamo neechwe.”
24 Níkwo abakwaáta bóona abaákobile ahi iléembo lye echikaali éecho kukuúndilana na Hamóori no omutábani Shekeemu. Mála buli mukwaáta wo omuchikáali yaasalwa ikóba lyo obukwaáta.
25 Kábyaabeele byaáhiingwiile ebilo bísatu na abakwaáta áabo abasazílwe bachaali bachiina obusaasi. Obuchilo óobwo, abatábani bábili ba Yakobo bali Simeyoni na Láawi, banyanya ba Dina, baákwaata embáadi záabo, baátahilila echikaali éecho babone kweéhoola. Áabo tibalátegiize kutabaalilwa. Baáyita abakwaáta bóona, 26 omuli áabo bakaba balimo Hamóori na Shekeemu omutábani, halubaadi lwo obwozi. Baámuchuúngula Dina kuluga omuunzu ya Shekeemu, baásuba náze owáabo. 27 Kábaabeele baáfwíile abakwaáta áabo, abatábani ba Yakobo baataahámo omuchikáali éecho baáchinyagilila, óokwo niho Dina yaayásiilwe na Shekeemu. 28 Baákwaata entaama, embuzi, ente ne ensíkilia hamo ne ebiintu byóona ebikaba bili omuchikáali no omumisili. 29 Kaandi baányagiilila ebiintu byáabo byóona byo obukaane buháango kuluga omumazu gáabo hamo na abaana na abakázi bóona. Tibaálekamo choóna chóona.
30 Káyaabalíile, Yakobo yaábagaambila Simeyoni na Láawi, “Íimwe mwaandetela iinye enáku mpáango habwe ebikolwa byéenyu. Óobu, Abakanáani, Abaperíizi na abáandi bóona áabo omúunsi éezi nibaannóba iinye no kuuntámwa bwooli. Tuli abaantu báche. Kábaleekóbya, nibahicha kututabaalila, nibatusiingaálicha iinye ne embága yaanze yóona!”
31 Náho Simeyoni na Láawi baámusubiza básaayile, “Titwaákuhicha kwiikiliza óogwo muuntu kumukóla kúbi munyaányeechwe nko musiihani!”