Yakobo Kubugana Na Esau
33
1-2 Mála Yakobo akaloleela mukulúwe Esau neéza hamo na abaséeza magána aána. Habwéecho, yaábaganisa abaanábe hali Léeya, Raáhéeli na abazaánakazi báabo bali Bíliha na Zílipa, buli omwaana na nyina. Mála yaabébeembeza abazánakazi na abaana báabo, yaakulaatiláho Léeya na abaanábe, Raáhéeli no omutábani Yozéfu baáheleeluka. 3 Mála Yakobo weényini yaabeébeembelela. Kayaamwiilile héehi mukulúwe, yaazeenda naateeza ebizwi no kwiinama ahaansi entulo musaanzu. 4 Náho Esau yaáyaanguha kuzeenda kumufuúmbata no kumunyweégela, na bóona baálila habwo obunulilwa.5 Esau káyaaleébile áabo bakázi na abaana, yaámubuuza, “Ni baáhi áaba áabo oyinábo?”
Yakobo yaámusúbiza, “Mukáma waanze, áaba na abaana áabo Múungu yaampéele hamugiságwe.”
6 Mála áabo bazánakazi hamo na abaana báabo bamwiililila héehi, baateeza ebizwi, beénama, baamugwa omumagulu Esau. 7 Mála Léeya na abaanábe baákulaatila, beeza, baamugwa omumagulu. Níkwo Raáhéeli no omutábani Yozéfu kuheeleeluka, kwiiza no kumúgwa omumagulu.
8 Ahonyini Esau yaámubuuza, “Sii, ensoonga ya amásho ge ebituungaánwa éebyo naabugána omumuháanda ni chiíha?”
Yakobo yaámusúbiza, “Amásho áago ne engabilano yo kukuhóza obóne kwiikala no obuhóolo neenye.”
9 Náho Esau yaámusúbiza, “Iinye nyina ebituungaánwa bíinzi no kusaagáho. Ebituungaánwa éebyo obele nooyeénda kuúmpa bisigále bibe byaawe.”
10 Yakobo yaámugaambila, “Mmahi mukúlu waanze. Kólaaba wakuunda kunyegeza ahaangoonzi, niinkusába oyinaánkule engabilano yaanze. Hali iinye, kubona obuso bwaawe ni nko kubona obuso bwa Múungu, habwo kuba naabona obufula bwaawe buháango. 11 Niinkusába oyinaánkule engabilano éezi eyínaakuleetéla habwo kuba naahaabwa omugisa gwa Múungu kúba ne ebituungaánwa bíinzi no kusaagáho.” Yakobo káyaagumile kumuneémbelela Esau, nawe yaáziinaankula éezo engabilano.
12 Mála Esau yaámugaambila, “Mwiilóoko tuzeendélele no oluzeendo lwéetu, iinye niinkwiibeembélela.”
13 Náho Yakobo yaámusúbiza, “Mukáma waanze, íiwe nooléeba nkokwo abaana áaba bachaali bato bwooli na kaandi omubituungaánwa éebi, ebíindi nibyoóncha. Habwéecho, kátulaabitwaala mbulúza hachilo chimo choónka, nibífwa. 14 Mbweenu, niinkusába oyibeembéle, iinye niinkukulaatíla mpóla mpola kwiingana na akalibátile ke ebituungaánwa na abaana baanze, tulaálemwa tuhike owaáwe óokwo Seyiri.”
15 Mála Esau yaágaamba, “Hachili niimbóna nkusígile abaséeza báche bo kukúhweela.”
Náho Yakobo yaámusúbiza, “Mukáma waanze, tí heene ensoonga kukola oótyo. Obufula óobwo waankolela kunyinaankula omuméeso gaawe waáhicha.”
16 Áaho, echilo éecho Esau yaalugáho kusuba owomwe Seyiri. 17 Náho Yakobo yaayolekela ahaantu ahéetwa Sukóoti. Óokwo yaayoombekayo enzúye ne ebihoóngole habwe ebituungaanwábye. Habwéecho, áaho haayetwa Sukóoti.a
18 Áaho Yakobo yaázeendelela omuluzeendólwe luli kuluga Mesopotamia.b Yaálemwa yaahika kuzima hachikaali chiche cha Shekeemu, omúunsi ya Kanáani. Yaakola enkáambi héehi ne echikaali éecho. 19 Akagula ensaambo éezo aaho yaatiile enkáambi habinogóka igána bye efeezac kuluga ha abatábani ba Hamóori (ali mukúlu we éensi). No oómo omuli áabo abatábani alikwéetwa Shekeemu. 20 Óokwo yaayoómbeka itaámbilo lya amabáale, yaalyeeta izíina, “Múungu níwe Múungu wa Izilaeli.”d