Okwiíloonza Habwa Yakobo Kubugana Na Esau
32
1 Yakobo ne embagáye hamo ne ebituungaanwábye bazeendelela no oluzeendo lwáabo kwoólekela Kanáani. Omumuháanda bamaléeka ba Múungu baabugana na Yakobo. 2 Yakobo káyaababweene yaágaamba, “Éezi ne enkáambi ya abalwaanila ngoma ba Múungu,” habwéecho, áaho yaaheeta Mahanayimu.a3 Yakobo akasiíndika abatwáazi be empoláze kweébeembela kuza hali mukulúwe Esau óokwo omuchaalo cha Seyiri omúunsi ya Edóomu. 4 Yaábalagila aáti, “Mumugaambile lugába waanze Esau muti omuhálila woómwe Yakobo naakusaba, ‘Onganyile, nkaba nyikeele omwiihaánga omwáanya mula kuhika háti omúunsi yo obuzenyi omúka ya maámi Labáani. 5 Nyina ente, ensíkili,b entaama, embuzi, abazáana na abazánakazi. Mukáma waanze, naakusiindikila empola éezi zo kusuba kwaanze mbone kwaanaankulwa neewe kuzima.’ ”
6 Áabo batwáazi be empola kábaasúbile hali Yakobo baámugaambila, “Tuhikíle hali mukúlu waawe Esau no kumuha empola yaawe. Óobu, ali omumuháanda, naayiza kukwaánaankula na abalwaani bi ichúmu magána aána.” 7 Káyaahuliile empola éezo, Yakobo yaátiina bwooli no kutiíkatiika. Yaábaganisa abaantu áabo bakaba bali hamo náze ne entaama, ente ne entwaangabuleende omubipiipi bibili. 8 Yaáteékuza, “Esau kaáleeza kusiingaalicha echipípi chimo, echipípi echíindi echilaasígala chakeéluka cheetéesuka.”
9 Mála Yakobo yaásaba Múungu ayine ebiteékuzo bíinzi omumugánya, “Íiwe Múungu wa guúku Ibrahímu na wa táata Izáaka, ompulilize! Íiwe Omukáma Múungu níiwe waangaambíile kusuba omúunsi yaanze hali badugu baanze, na kaandi níiwe walamwiile kuunkólela ebizima. 10 Iinye ndi omuhálila waawe kwoónka, tiinkwiilwe kuháabwa embábazi yóona no obweésige bwóona óobwo onkoliile iinye, omuhálila waawe. Kánaayaambúkile omunóna óogu gwa Yolodáani, nkaba ntéena kaantu koóna kóona kwoónka enkoni yoónka, náho óobu waánhíila mbone kusuba ne ebipípi éebi bibili bye embága yaanze ne ebituungaánwa. 11 Omukáma waanze, óobu niinkusába onchíze kuluga omuungalo za mukúlu waanze Esau, habwo kuba niintiína weényini neéza kututabaalila no kutwíita íichwe chwéena hamo na bakázi na abaana. 12 Náho íiwe okaándahilila oóti, ‘Ndyaakukoléla ebizima no kukwoóngela obuzéele bwaawe nko omusényi gwa ahachaambo ogutákuhichwa kupeetwa.’ ”
13 Omuchilo óomwo Yakobo yaalyaama áaho. Yeeháho omugabo gwe ebituungaanwábye bibe engabilano yo kumuha mukulúwe Esau 14 zili ebúguma ze embuzi magána ábili, empaya makúmi ábili, ebúguma ze entaama magána ábili, ne empaya ze entaamac makúmi ábili. 15 Kaandi yeeháho entwaangabuleended ezilikwóoncha makúmi ásatu ne enyána zaázo, nazo ezigíza makúmi aána ne enúmi ikúmi, ensíkili enkázi makúmi ábili, ne ensíkili enkwaáta ikúmi. 16 Yaábalekela abahalilábe baabyeemanya ebituungaánwa éebyo, bagabe ebituungaánwa omubúsho busho. Mála yaábagaambila, “Munyíbeembélele nimuleka omwáanya kuluga obusho kuhika obusho obuundi omumusoóloongo gwéenyu.”
17 Yaámulagila omuhálila ayaabele ayíbeembiize obusho bwo kutaándika omumusoóloongo, “Óokwo noobugána na mukúlu waanze Esau, nawe naayiza kukubuuza ebigaambo nke éebi aáti, ‘Íiwe oli wo mwoóha? Nooza nkáhi? Ne ebituungaánwa éebi ebili omuméeso gaawe ne ebyoóha?’ 18 Íiwe musubize oóti, ‘Éebi ne ebituungaánwa byo muhálila waawe, Yakobo. Éebi ne engabilano yaawe, íiwe, mukáma waanze. Na weényini Yakobo óogwo ali áaha enyuma yo musoóloongo gwe ebituungaánwa, neeza.’ ”
19 Kaandi yaalagila omulíisa wa kábili, wa kásatu na abáandi bóona abaabele nibakulaatíla obusho bwe ebituungaánwa, naagaamba aáti, “Mulaamugaambíla Esau ebigaambo éebyo nyini obuchilo nimubugana náze. 20 Kaandi íimwe mumugaambile muti, ‘Omuhálila waawe Yakobo achili enyuma yo musoóloongo gwéetu, neeza.’ ” Yakobo akaba naateekuza aáti, “Engabilano éezi, lúundi nizihóza echiníga cha mukúlu waanze, abóne kuúnganyila obuchilo katulaabúgana.” 21 Habwéecho, abahálila bo mwa Yakobo beebeembéza engabilanóze, náho weényini yaasigala omunkáambi omuchilo óomwo.
Yakobo Kufukaana Na Múungu
22 Omuchilo óomwo nyini Yakobo akeemuka, yaátwáala abakazíbe bábili, abazánakazíbe bábili na abatábani ikúmi no oómo, yaábaambucha omunóna gwa Yaboóki. 23 Kábaahikile hamusábuko gwo omunóna, yaayaámbucha ebiintúbye byóona. 24 Nawe Yakobo yaasigala weénka. Mála omuuntu oómo yeeza yaafukana náze, baálemwa baábuchiisa. 25 Omuuntu óogwo káyaabweene yaálemwa kumusíinga Yakobo, yaámukuumya enyoonga yi ikuulílye, nalyo lyaálabuka. 26 Mála óogwo muuntu yaagaambila Yakobo, “Ndékula nzeénde habwo kuba obwíile bwaácha.”
Nawe Yakobo yaámusúbiza omukuheézeela, “Tiínkukúlekulila no obuche bwa kati otakaánfuuhile!”
27 Omuuntu óogwo yaámubuuza, “Izíina lyaawe oli oóhi?” Yaámusúbiza, “Ndi Yakobo.”
28 Óogwo muuntu yaámugaambila, “Tócheetwa kaandi Yakobo, óobu izíina lyaawe lyaaba Izilaelie habwo kuba waásiingaangana na Múungu na abaantu, neewe wabasíinga.”
29 Yakobo yaámugaambila, “Niinkusába, ongaambile izíina lyaawe.”
Óogwo yaámusúbiza aáti, “Habwaáchi noombuúza izíina lyaanze?” Mála yaámufuuha.
30 Yakobo yeegaambila, “Iinye na Múungu twaábonana butúnu, náho tiínkafwíile,” habwéecho, yaaheeta áaho izíina, Penueli.f 31 Izóoba likaba lyaásohweele obuchilo Yakobo naaguluka omuzela áaho Penueli kunu naachuumpíla habwo kulábuka omwiikúuli. 32 Níkwo kuhika leélo Abaizilaeli batáliila enyama yi ikúuli, habwo kuba Múungu akakuumya Yakobo omunyóonga yi ikuulílye.