Yakobo Kuhika Omúka Ya Labáani
29
1 Yakobo akazeendelela no oluzeendólwe, yaahika omúunsi ya abaantu bo obutúluka. 2 Óokwo yaabona iziba omuumbúga, na amásho ásatu ge entaama agaabeele gázaagiile héehi ni iziba habwo kuba gaba niganywiisíbwa améenzi kuluga iziba éelyo. Ibáale liháango likaba lifuundikiile iziba éelyo. 3 Obuteéka bwo obuchilo óobwo, amásho góona ge entaama gakaba geekóbya, niho abalíisa bóona hamo bakaba báhiliingisa ibáale éelyo kuluga ahi iziba no kunywíisa entaama. Kábaabeele bamala kuzinywíisa, balihíliingisa kaandi babone kufuúndikila iziba.4 Yakobo yaazeenda habalíisa, yaábabúuza, “Badugu baanze, mwaaluga nkáhi?”
Baámusubiza, “Twaaluga Haráani.”
5 Kaandi yaábabúuza, “Sii, íimwe nimumumánya Labáani, mutábani wa Nahóori?”
Abalíisa baámusubiza, “Nitumumánya.”
6 Yakobo yaaguma kubabúuza, “Alimo muzima?”
Nabo baámusubiza, “Alimo muzima, no óobu omuhala Raáhéeli, ngugwo óokwo, naayiza ne entaama za iíse!”
7 Yakobo yaagaambila abalíisa, “Hacháali iháangwe na kaandi tí buchilo bwo kuzítulaaniiza entaama hamo. Habwéecho, muzinywíise, mála muzisúbye omumaliísizo.”
8 Náho boónyini baámusubiza, “Titúkuhicha kukola tútyo, omubuteéka, amásho góona ge entaama gabaánze geékobye hamo, niho ibáale lihiliingisíbwe ne éechwe abalíisa kuluga ahi iziba, tubóne kuzinywíisa.”
9 Obuchilo acháali naahooyaa na áabo abalíisa, Raáhéeli yaahika no obusho bwe entaama za iíse, kúba níwe akaba ali omulíisa waázo. 10 Yakobo káyaabweene Raáhéeli, ali muhala wa Labáani, nawe ali nyinálumi woómwe, na káyaabweene obusho bwe entaama za nyinálumi woómwe, Labáani, yaázeenda, yaahiliingisa ibáale éelyo kuluga ahi iziba, yaázinywíisa.
11 Ahonyini Yakobo yaanyweegela Raáhéeli, mála yaateela empámo habwo obunulilwa. 12 Yakobo yaamanyisa Raáhéeli nkokwo weényini ali mudugu wa iíse na kaandi omwaana wa Rebéka. Habwéecho, ahonyini Raáhéeli yeéluka kuzeenda owáabo kumanyisa iíse, Labáani.
13 Labáani káyaahuliile empola za Yakobo omwíihwa, yeéhuuta kuza kumunyegeza, yaámufuúmbaatila, yaámunyweégela, mála yaámutwáala omukáye. Yakobo yaasoomboolela Labáani empoláze zóona. 14 Nawe Labáani yaámugaambila, “Mazima, íiwe oli omubili gwaanze ne enságama yaanze!”
Yakobo Kukuúmpula Hakusiigilwa Bahala Ba Labáani
Yakobo káyeekeele omúka ya Labáani okwéezi kwóona, 15 Labáani yaagaambila Yakobo, “Nóobwo oli mudugu waanze, tichíkugasa íiwe kuunkólela emilimo busa. Náho, ongaambile empeéla yaawe neeba eéta?”
16 Mbweenu Labáani akaba ayina abahala bábili, omukúlu naayetwa Léeya no omuto Raáhéeli. 17 Léeya akaba ayina améeso galeembile,b náho Raáhéeli akaba ali muluunzi bwooli, ahaangilwéze na ayina obuso buluunzi. 18 Yakobo akalígila Raáhéeli, habwéecho, yaagaambila Labáani, “Niinkukólela emilimo emyáaka musáanzu obóne kuúnsiigila Raáhéeli, muhala waawe omuto.”
19 Labáani yaagaambila Yakobo, “Naákuunda! Hachili nkusiígile Raáhéeli kuchila kusiigila omuuntu oóndi. Ogume kwiikala neenye.”
20 Níkwo Yakobo kukolela Labáani emilimo emyáaka musáanzu abóne kutwáala Raáhéeli abe mukazíwe. Náho, hali weényini, omwáanya óogwo gukaba nké ebilo bíche bíti habwo kuba akaba naamweénda bwooli. 21 Obuchilo kábwahwéele, Yakobo yaagaambila Labáani, “Ebilo byaanze byo kukukólela emilimo byaahwáayo, habwéecho, mpa mukaanze, nhuníle náze.”
22 Habwéecho, Labáani yaalaalika abaantu bóona bo óokwo, yaakola amazenyi go obwéenga. 23 Náho káhaabeele omuchilo, habugóbya Labáani yeemucha Léeya, omuhala omukúlu, yaámutwáala hali Yakobo, mála Yakobo yaalyaama náze. 24 (Labáani akaba yaámuha Léeya omuzánakazi Zílipa abe omuzánakazíwe.)
25 Kábwaachíile Yakobo yaasobelwa kubona nkokwo omukázi óogwo baamuletiíle ni Léeya! Ahonyini, yaabuuza Labáani hakuchaáhala, “Waankolela chigaambóchi? Iinye nkakukoléla emilimo habwo kumwéenda Raáhéeli! Habwaáchi óobu waámbéeha bwooli?”
26 Labáani yaámusúbiza, “Kunu tibwo obuteéka bwéetu kumusiiga omuhalákazi omuto atákasiigilwe omuhalákazi omukúlu. 27 Omále ebilo musáanzu mutiindikilwe íiwe na Léeya, niho tulaakusiigila Raáhéeli nawe hamo kólaakúunda kuunkólela iinye emilimo emyáaka musáanzu ezíindi.”
28 Yakobo yaákuunda, yaamala ebilo musáanzu atiindikilwe hamo na Léeya, nikwo Labáani kusiiga omuhala Raáhéeli hali Yakobo abe mukazíwe. 29 (Labáani akaba yaámuha Raáhéeli omuzánakazi naayetwa Bíliha.) 30 Yakobo yaáhuníla na Raáhéeli no kumwéenda bwooli kuchila Léeya. Yaaguma kukolela Labáani emilimo emyáaka musáanzu ezíindi.
Abaana Ba Yakobo
31 Omukáma Múungu káyaabweene nkokwo Léeya takweendwa na Yakobo, yaámuha oluzáalo, obuchilo Raáhéeli ali enguumba. 32 Habwéecho, Léeya yaátwáala eenda, yaazáala omwaana wo obukwaáta. Yaamweeta izíina Reubeenic habwo kuba yaágaamba, “Omukáma Múungu yaaleeba ebyaágalazo byaanze, mazima óobu ibáanye naayiza kunyeenda.”
33 Léeya kaandi yaátwáala eenda, yaazáala omwaana wo obukwaáta. Yaamweeta izíina Simeyoni,d kunu naagaámba, “Omukáma Múungu yaahulila nkokwo ntákweendwa na Yakobo, habwéecho, yaampa óogwo omwaana oóndi wo obukwaáta.”
34 Léeya yaátwáala eenda entulo eéndi, yaazáala omwaana wo obukwaáta. Yaamweeta izíina Láawie naagaámba, “Óobu, ibáanye naayoleka engoonzi habwo kuba naazaála náze abaana abo obukwaáta básatu.”
35 Léeya yaátwáala eenda eéndi, yaazáala omwaana wo obukwaáta, yaamweeta Yudaf naagaámba, “Entulo éezi nniimukúza Omukáma Múungu.” Mála Léeya yaálekelela kuzáala.