28
1 Áaho Izáaka yaayeta Yakobo, yaámufuuha no kumúlagila, “Otaleengésa kusiigilwa nóobwo kulésha Omukanaánikazi weéna wéena. 2 Kwoónka zeénda bwaangu Mesopotamiaa omúka ya Betwéeli, sweénkulu chizáala nyoko, okuumpúle hakwiikilizibwa oómo omuli bahala ba nyokólomi Labáani. 3 Múungu Omuzizi wa Byóona akufúuhe, ozaále abaana béenzi no kuzaálilána, obóne kúba iseénkulu we embága mpáango ye engaanda za abaantu. 4 Abafúuhe, íiwe hamo no oluzáalo lwáawe habwo kuhikiiliza omulago óogwo yaaheele sweénkulu Ibrahímu, mubóne kuhuungula éensi ya Kanáani yomulíkutuulámo nka bahiínguzi, éensi éezo Múungu yaaheele Ibrahímu.” 5 Níkwo Izáaka kumsiíndika Yakobo kuzeenda Mesopotamia hali Labáani, mutábani wa Betwéeli ali Omwaaramu. Labáani akaba ali munyáanya Rebéka, nyinábo Yakobo na Esau.Esau Kutaasha Omukázi Wa Kásatu
6 Esau akamanyisibwa nkokwo Izáaka yaámufuuha Yakobo no kumúlagila atálisiigilwa nóobwo kulésha Omukanaánikazi, náho azeénde kuloonda omuhalákazi óokwo Mesopotamia wo kukuúmpula hakusiigilwa. 7 Kaandi Esau akamanya nkokwo Yakobo yaakoondookiile abazeelébe no kuzeenda kuhika Mesopotamia. 8 Akabona nkokwo iíse akaba atabeénda Abakanaánikazi. 9 Habwéecho, Esau yaazeenda omúka ya Ishimaeli óogwo omutábani wa Ibrahímu na Haájili. Yaámutaasha Mahaláati ali muhala wa Ishimaeli na kaandi ali munyanya Nebayóoti. Omukázi óogwo yaaba mukazíwe omubakázi abáandi áabo yaataashize kala.
Echilooto Cha Yakobo Óokwo Betéeli
10 Yakobo akaluga Beer-Shéba yaayolekela Haráani. 11 Yaahika ahaantu bunaanka ahamusémeliile. Yaáhuúmula áaho habwo kuba izóoba likaba lyaágwámo. Yaakobya ibáale áaho, yeésagula omutwe, yaalyaama yaáhuníla. 12 Yaáloota. Kási! Naabona olwéego lulugiiliile omúunsi no kuhelela omwiigulu. Kaandi yaabona Abamaléeka ba Múungu nibahanáma no kutúuka áaha lwéego óolwo.
13 Nawe Omukáma Múungu yaáyemeelela ahalugulu yo olwéego óolwo, naagaámba, “Iinye ndi Omukáma Múungu, Múungu wa sweénkulu Ibrahímu, na Múungu wa iíso Izáaka. Éensi yoólikulyaamámo, niinzikúha íiwe na kaandi ndyaáziha oluzáalo lwáawe. 14 Oluzáalo lwáawe lulyaákánya nké enkuungu ye éensi, lulyaásaambaala kuluga obugwa kuhika obutúluka no kuluga chiziba cha ntúmwa kuhika nyakaziinzákazi. Ndyaázifúuha engaanda zóona ze éensi kulabila hali íiwe na haluzáalo lwáawe. 15 Ománye nkokwo ndi hamo neewe, niinkweekomya óobu na ndyaákweékomya hoóna hóona áaho olihíka na ndyaákusubya omúunsi éezi. Ománye nkokwo tiíndíkunágilana mazima, niímba hamo neewe mpaka kuhicha echilagilo éecho naakulagíile.”
16 Áaho Yakobo yeémuka omutúlo, yeéteekuliza, “Mazima Omukáma Múungu ali áaha, kwoónka mbele ntákumanya.” 17 Habwéecho, Yakobo yaágaamba hakutíina, “Áaha nihatiinísa no kusobeza! Amazima áaha ta ahaantu ahaandi náho ne éenzu ya Múungu, kaandi eli ni iléembo lyo omwiigulu.” 18 Yakobo yeémuka omulucheelelélwa, yeeháho ibáale éelyo yaabeele ayisagwiile omutwe gwoómwe, yaalyeémeeleza nké nchiinzi no kuliítilila amazúta kumanyisa nkokwo ahaantu áaho na ahatakatíifu. 19 Áaho yaaheeta Betéeli.b (Kala echaalo éecho chikaba nicheétwa Lúzu.)
20 Níkwo Yakobo kulahila, “Múungu koóliba oli hamo neenye no kuunyekomya omuluzeendo lwaanze lwóona no kuúmpa echookulya ne ebizwáalo 21 iinye mbone kusuba omúka nyina obuhóolo hali táata, áaho niho íiwe Omukáma Múungu olyáaba Múungu waanze. 22 Nalyo ibáale eli línaayemeeléza nké enchiinzi nihába éenzu yaawe, ensoonga ahaantu ahatakatíifu áaho kukulámya íiwe Omukáma Múungu, na mazima iinye ndyáaba niinkwiihiláho chimo omuli ikúmi omubiintu byóona éebyo olaámpa.”