Yakobo Kwíiba Emigisa Ya Esau
27
1 Izáaka káyaabeele omunyaampala no kuhweezákwe kukaba kwaácheéhile bwooli, yaamweeta Esau, omutábani omukúlu, yaágaamba, “Mwaana waanze.” Nawe yaamweétabila, “Kaláme, iinye ndi áaha.”2 Iíse yaámugaambila, “Nooléeba omwaana waanze nkokwo iinye naakokweele. Niimbóna echilo cho okufwa cheélilila héehi. 3 Habwéecho, twaála ebikwáato byaawe, omuloonge gwe emyaambi no obúta, oze omwiiluungu kunhiígila iinye enyameéswa. 4 Oteéke echookulya chilikunula, éecho nyeénda. Oleéte áaha, ndye mbone kukúha omugisa gwaawe gwo obuhuunguzi bwo obuzigeezo bwaawe, ntákafwíile.”
5 Kási, obuchilo Izáaka naahooya no omutábani Esau, Rebéka akaba naahulilíza oluhóyo lwáabo. Esau káyaaziile omwiiluungu kuhíiga, 6 Rebéka yaagaambila omutábani Yakobo, “Huliilíza, iinye naamhulila iíso, naagaambíla mukúlu waawe Esau 7 amuhiígile enyameéswa omwiiluungu no kumukólela echookulya chizima, aálye, abóne kumufúuha omuméeso go Omukáma Múungu, atákafwíile. 8 Habwéecho omwaana waanze, kola nkokwo ndaakulagíla. 9 Zeénda omuchihoóngóle oyihémo abaana bábili be embuzi bazima. Oondeétele áaha mbone kuloongeza iíso echookulya chizima chilikunula, éecho ayeénda. 10 Mála omutwaálile iíso, aálye, na hamuháanda óogwo akufúuhe íiwe ha mwáanya gwa Esau, iíso atákafwíile.”
11 Kwoónka Yakobo yaatíkaatíka bwooli, naagaambíla Rebéka, “Náho máaha! Noomanya nkokwo mweenewéetu Esau ayina omubili gúzwiigile, náho omubili gwaanze tiguzwiigíle. 12 Táata kaálaambaábaata, akamanya ntalíwe, naábona nkokwo naámubéeha, habwéecho, niinyiletelela omucheeno ha mwáanya gwo omugisa.”
13 Nyina yaámusúbiza, “Mwaana waanze, okucheenwa kwáawe kúbe hali iinye. Náho, hulíla amagaambo gaanze, zeénda ondeétele abaana be embuzi áabo naakulagíla.”
14 Habwéecho, Yakobo yaázeenda, yaaleeta áabo abaana be embuzi hali nyina. Nyina yaateeka echookulya éecho Izáaka akaba ayeénda. 15 Mála Rebéka yaakwaata emyéenda mizima yo omutábani omukúlu Esau eyaabeele eli omuunzu, yaámuha Yakobo omutábani omuto kuzwáala. 16 Kaandi yaámuha émpu za abaana be embuzi éezo omubicha no mumikóno kuzwáala. 17 Mála, yaaha Yakobo omutábani echookulya éecho chizima chilikunula hamo no mukáate óogwo yaateékile. 18 Yakobo yaataaha omuunzu hali iíse, yaamweeta, “Táata.”
Nawe yaamweétabila, “Ee, íiwe oli oóha, omwaana waanze?”
19 Yakobo yaasubiza iíse, “Ni iinye, Esau, omwaana waawe omukúlu. Naakola nkokwo waandagíla. Niinkusába oyimúke, oyikále kuzima, obonéke echookulya éechi che enyama ye enyameéswa, éechi waaba ondagiile, obóne kuúnfuuha.”
20 Izáaka yaámubuuza, “Mwaana waanze, leélo wahicha oóta kubonesa enyameéswa bwaangu oótyo?”
Yakobo yaámusúbiza, “Omukáma Múungu, Múungu waawe, níwe yaámbonesa hakuundeéteela enyameéswa éezo.”
21 Níkwo Izáaka kugaambila Yakobo, “Mwaana waanze ilíla héehi nkubaábáate mbone kumanya nkokwo mazima níiwe Esau nali mmahi.” 22 Yakobo yaamwiilila héehi iíse, nawe yaámubaábaata, mála yaágaamba, “Iláka ni nké iláka lya Yakobo, kwoónka emikóno ni nké ya Esau.” 23 Talamanyile nkokwo akaba ali Yakobo habwo kuba emikonóye ekaba eyina obwoya nko bwa Esau ali mukulúwe. Habwéecho, akaba yeéliliza kumufúuha, 24 náho kaandi yaasuba kumubúuza, “Mazima, níiwe mutábani waanze, Esau?”
Yakobo yaámusúbiza, “Nníinye nyini Esau.”
25 Níkwo Izáaka kumugaambila, “Mwaana waanze, ndeételaho enyama aánche éezo yo muhíigo gwaawe, iíndye, mbone kukufúuha.” Yakobo yaamutwaálila echookulya éecho, Izáaka yaálya, yaamuleetela na amaálwa ge ezabibu,a yaánywa. 26 Mála Izáaka yaagaambila Yakobo, “Mwaana waanze, ilíla héehi onyweégele.”
27 Yakobo káyeeliile héehi kumunyweégela, Izáaka yaahulila izuumba lye emyéenda éezo yaábeele azweele, yaahwa echihika. Níkwo kumufúuha, naagaámba, “Buzima, izuumba lyo omwaana waanze ni nki izuumba lizima lye ensaambo eyafuúhilwe no Omukáma Múungu. 28 Múungu akuhe enzula ehikileb ne ensaambo zo obunula zilikweeza emisumo miinzi na amaálwa ge ezabibu. 29 Abaantu aba amahaánga agáandi bábe abazáana baawe ne engaanda zikuteéleze ebizwi. Obe mukúlu wa beenebáanyu no oluzáalo lwa nyoko lukuteeleze ebizwi. Boóna bóona abalaakúcheena, bachéenwe, na boóna bóona abalikukufúuha, bafúuhwe!”
30 Izáaka káyaamazile kumufúuha Yakobo, nawe kulugáho omuméeso go mweése, akáanya káche bwooli Esau mukulúwe abayaáhika kuluga kuhíiga omuchitúuntu. 31 Nawe, yaateeka echookulya chizima echilikunula yaamutwaálila iíse, yaámugaambila, “Táata, oyimúke, oyikále, obonéke omuhíigo gwo omwaana waawe, obóne kuúnfuuha.”
32 Izáaka yaámubuuza, “Íiwe oli oóha?”
Nawe yaámusúbiza, “Ni iinye Esau, omwaana waawe omukúlu.”
33 Izáaka yaakwáatwa akateengo kaháango bwooli, yaabuuza, “Ngási! Yaaba ali oóha ayaánhiigila iinye enyama ye enyameéswa no kuundeétela echookulya éecho naába naálya obuchilo óobwo waaba otákeezile? Iinye naámazile kumufúuha óogwo! Mazima yaaba omufuuhwa wo obucha no obuchiile.”
34 Esau káyaahulile éebyo, yaálila bwooli, “Wooóyi!” Habwo kuhulila obusaasi bwíinzi, yaámugaambila iíse, “Táata, niinsába hachili neenye onfuuhého!”
35 Iíse yaámusúbiza, “Mulúmuna waawe yeeza áaha, yaánkoongookela, níwe yaayiba omugisa gwaawe.”
36 Esau yaágaamba atámilwe bwooli, “Óobu, yaámbeeha entulo ya kábili! Kási akwiile kwéetwa Yakobo!c Obwa mbele, yaátwáala habuchelúke obuhuunguzi bwo obuzigeezo bwaanze. Óobu, kaandi yaayiba omugisa gwaanze.” Esau yaaguma kusaba iíse, “Táata, hóona sii? Tiwaánsigiláho omugisa gwoóna gwóona?”
37 Izáaka yaasubiza Esau, “Huliilíza, iinye naakola Yakobo kúba omukáma waawe, kaandi naamuha beenebáabo bóona kúba abahalilábe. Iinye naamuha emisumo yóona na amaálwa ge ezabibu. Náho íiwe omwaana waanze, nkuzile nta? Tinyina choóna chóona cho kukúha.”
38 Esau yaaguma kumusaba iíse, “Táata toyína omugisa gwoóna gwóona hali iinye? Hachili neenye onfuuhého!” Áaho Esau yaázuzubala, yaateela empámo.
39 Níkwo Izáaka, iíse, kumugaambila, “Ebilo byóona kuluga óobu, obwiikalo bwaawe nibúba omúunsi etéena obunula ne etéena enzula ehikile. 40 Nootuúla omukweésiga olubáadi lwáawe, mále nooba omuhálila wa mulúmuna waawe. Náho obuchilo obulizáyo, olyáaba omúfu na olyaágoma. Olyaásiinga kutégekwa nawe.”d
Yakobo Kwiilukila Omúka Ya Labáani
41 Esau akanoba múno Yakobo habwo kwíiba omugiságwe kuluga hali isébo. Yaáteékuza omumuganyágwe, “Ebilo bya táata tí bíinzi byo kulama, kátulaaba twaámazile kumwaálamila, niho ndaámwíita omulúmuna waanze Yakobo.”
42 Nyinábo Rebéka káyaamanyísibwe empola éezo ze echihika cho omutábani omukúlu Esau, yaásiindika omuuntu kwéeta omutábani omuto Yakobo, mála yaámugaambila, “Oleémanya! Mukúlu waawe Esau ayina amaganya meenzi, naatekateéka hakulamula kukwíita abóne kweéhoola. 43 Habwéecho, omwaana waanze, kola nkokwo ndikukulagíla. Lugaho áaha bwaangu, zeénda omúka ya munyaányeenye Labáani óokwo Haráani. 44 Ikala óokwo hakáanya kuhika obuchilo bwe echihulumuko cha Esau hachilihweéla, 45 no kwéebwa ebikolwa éebyo wamukóliile. Niho ndyaásiindika omuuntu ayize kukusúbya. Hachili léka ntaákufweelwa abaana baanze bábili bóona hachilo chimo!”
46 Mála Rebéka yaagaambila Izáaka, “Iinye ndálemesíibwe bwooli kutúula na abakázi be Echihíti ba Esau. Yakobo nawe kálileeta oómo omuli áaba Abahítikazi ali mkazíwe, haáchili iinye nfwee!”