Izáaka Kubéeha Abimeléeki
26
1 Likataahámo iífwa omúunsi éezo nki iífwa éelyo elyaatiile omubuchilo bwa Ibrahímu. Habwéecho, Izáaka yaazeenda Geráari hali Abimeléeki, omukáma wa Bafilísiti.2 Áaho Omukáma Múungu yaamwiizáho Izáaka, yaámugaambila, “Otazeenda Miísiri, kwoónka oyikále nko mutuuzi omúunsi eyoondaakumanyisa. 3 Ikala nko omuhiínguzi omúunsi óomu, neenye niímba hamo neewe no kukufúuha. Ndyaákúha íiwe no oluzáalo lwáawe éensi éezi yóona, na bityo ndyaáhicha omulago óogwo naaheele iíso. 4 Ndyaálwoongela oluzáalo lwáawe lukanye nké nyenyéezi zo omwiigulu no kubaha éensi éezi yóona. Kuluga omuluzáalo lwáawe, ndyaáfuuha engaanda zóona zo omúunsi 5 habwo kuba Ibrahímu akankoóndookela iinye, akakola nkokwo naamugaambila, akahicha kukwáata ebilagilo byaanze, emitégeko yaanze na obwoólekelezi bwaanze.” 6 Habwéecho, Izáaka yaasigala óokwo Geráari.
7 Abakwaáta bo óokwo kabaamubuúlize empola za mukazíwe, weényini yaábasubiza, “Óogu ni munyaányeenye.” Akatíina kugaamba, “Óogu ni mukáanze.” Akeéteekuliza, “Abatúuzi bo óokwo bakaányisile, batwaále mukaanze, ha ensoonga mukaanze ni muluunzi múno bwooli.” 8 Náho káyaabeele yeékeele ebilo bíinzi óokwo, Abimeléeki, omukáma wa Bafilísiti, yaásuuza omuundoléelo, yaásobelwa kubona Izáaka na mukazíwe Rebéka nibachuundána. 9 Áaho mukáma Abimeléeki yaamweeta Izáaka no kumugaambila, “Kási, óogu ni mukázi waawe. Habwaáchi okaambeha nkokwo óogu ni munyanyoko?” Izáaka yaámusúbiza, “Iinye nkagaamba ntyo habwo kuba nkatiina abaantu bakaányisile habwa weényini.”
10 Omukáma Abimeléeki yaámuchaáhalila, “Tiwakutukoliile obubi nko óobu! Oómo weénka óomu abakwaáta káyaakulyaamile na mukáawe, wakaátutíile omuuntaambala mpáango!” 11 Níkwo mukáma Abimeléeki kubáhaambiliza abaantu bóona kunu naagaámba, “Kuluga leélo weéna wéena alaamukomozáho Izáaka nali Rebéka mukazíwe, mazima ayitwe.”
Kukuúnganila Amaziba
12 Omwaaka óogwo Izáaka akabiba embíbo omúunsi éezo, yaagesa entulo igána ye mbíbo éezi yaabíbile habwo kuba Omukáma Múungu akamufúuha. 13 Izáaka yaátuunga, yaaguma kaandi kubona ebiintu bíinzi yaálemwa yaaba omugéega bwooli. 14 Akaba ayina amásho ge entaama, embuzi, ente na kaandi abahálila béenzi, habwéecho, Abafilísiti baámuchubila.a 15 Kaandi bakafulila amaziba góona áago baasumíle abahálila bo mwa iíse Ibrahímu obuchilo achili mwooyo.
16 Níkwo mukáma Abimeléeki kumugaambila Izáaka, “Lúga omúunsi yéetu habwo kuba íiwe waátuchiza omubugeega na amaani.”
17 Áaho Izáaka yaáfulukáyo, yaayoómbeka enkáambíye omwiihaalob lya Geráari, yaátuula óokwo. 18 Izáaka akasúbila kusuma kaandi amaziba áago abahálila ba Ibrahímu ali iíse baasumíle achili mwooyo. Amaziba áago gakaba gafuliilwe na Bafilísiti obuchilo Ibrahímu yaafwíile. Izáaka yaasubila kwéeta amaziba áago nkokwo iíse yaabeele ageésile. 19 Nabo abahálila ba Izáaka bakasuma omwiihaalo éelyo baábona iziba lye enzwéelo.c
20 Náho abalíisa ba Geráari baákuungana na bo mwa Izáaka, nibagaámba baáti, “Iziba eli ni iziba lyéetu.” Habwéecho, Izáaka yaalyeeta iziba éelyo Enkuúngana,d habwo kuba bakakuúngana nawe. 21 Mála abahálila bo mwa Izáaka baasuma iziba elíindi nalyo kaandi baalikuúnganila. Níkwo Izáaka kulyeeta iziba éelyo, Enzigu.e
22 Habwéecho, Izáaka akafulukáho, yaazeenda ahaandi, yaasuma iziba elíindi, kwoónka éelyo tibalalíkuunganile. Izáaka yaalyeeta Omwáanya Mugázi,f omukugaamba, “Óobu, Omukáma Múungu yaatuha omwáanya guhikile tubóne kuzaálilána no kubonesa omuli byóona omúunsi.”
23 Izáaka akaluga óokwo, yaafulukila Beer-Shéba. 24 Omuchilo éecho yaahikile, Omukáma Múungu yaamwiizáho no kumugaambila, “Iinye ndi Múungu wa iíso Ibrahímu. Otaákutiina habwo kuba ndi hamo neewe. Niingúma kukufúuha no kukwoóngela oluzáalo lwáawe habwe ndagano yaanze éezo iinye naalagene na Ibrahímu omuhálila waanze.” 25 Óokwo Izáaka yaayoombekáho itaámbilo no kumulámya Omukáma Múungu. Kaandi yaayoombekáho enkáambi na bahalilábe baasuma iziba.
Kulagána Kwa Izáaka Na Abimeléeki
26 Abimeléeki akaluga Geráari hamo no muhanuuzíwe Ahuzati, hamo na Fikóoli, mukúlu wa abalwaanila ngoma boomwe, baamuzáho Izáaka. 27 Áaho Izáaka yaábabúuza, “Mbweenu kamweeza omúka yaanze obuchilo íimwe mukaantámwa no kuúmbiinga kuluga omúunsi yéenyu?”
28 Boónyini baámusubiza, “Amazima twaabona nkokwo Omukáma Múungu ali hamo neewe. Habwéecho, twaáteékuza nkokwo nichigása kukola endagano neewe. Tulahilane íichwe neewe. 29 Lahíla nkokwo íiwe tiwaákuhicha kutukolela ebíbi nkéechwe nkokwo titukakukólelaga ebíbi byoóna byóona hali íiwe. Tukaba tukukolela ebizima byoónka, twaakuleka obóne kuzeenda no obuhóolo. Óobu, leeba Omukáma Múungu nkokwo akufúuha kuhicha leélo.”
30 Áaho Izáaka yaabakolela amazenyi, nabo baálya, baánywa. 31 Kábwaachíile beémuka enchaákala bwooli, baálahililana bóona batalíiza kulwaana. Mála Izáaka yaábaseéndekeleza, no kulagana nabo habuhoolo. 32 Echilo éecho nyini, abahalilábe baámwiízila no kumugaambila, “Twaabona améenzi omuli éelyo iziba éelyo tubéle nitusuma.” 33 Áaho Izáaka yaayeta iziba éelyo, Echilahilo.g Habwéecho, kuhika leélo izíina lye echikaali éecho ni Iziba lye Echilahilo.h
Abakázi Abanyamahaánga Ba Esau