Enzáalwa Ezíindi Za Ibrahímu
25
1 Ibrahímu akakuúmpula omukázi oóndi hakwiikilizibwa, iziinálye Keétula, 2 yaazáala náze abaana abo obukwaáta, nabo ni Zimláani, Yoksháani, Medáani, Midyáani, Ishibáki na Sua. 3 Yoksháani akazáala Shéeba na Dedáani. Enzáalwa za Dedáani bakaba bali Abashúuli, Abaletushi na Abaleumi. 4 Abaana ba Midyáani bakaba bali Elfa, Efeeli, Hanóoki, Abida na Elida. Áabo bóona bakaba bali enzáalwa ya Ibrahímu na Keétula.5 Ibrahímu yaaha ebiintúbye byóona Izáaka ahuungúle. 6 Náho Ibrahímu acháali achili mwooyo, yaaha engabilano abaana abo obukwaáta ba bakazíbe abato bakaba bali Haájili na Keétula. Mála yaábalagila balugého bazeénde kutúula embazu zo obutúluka hala ne éensi yaálikutuúlamo Izáaka ali omwaanáwe.
Okufwa Kwa Ibrahímu
7 Ibrahímu akalama emyáaka igána límo na makúmi musáanzu ne itáanu (175), 8 yaáfwa, yaányaampaheele bwooli. Yaakulaatila beeseénkulu abamwiibeembéliile kufwa. 9 Izáaka na Ishimaeli, abaanábe Ibrahímu, baaziika isébo omunyaanga ya Makpéela, héehi na Maámule omuunsaambo éezo kala ekaba eli yo mwa Efroni, a mutábani wa Soháari, Omuhiti. 10 Ibrahímu akagula ensaambo éezo kuluga Habahiti. Omwo nimwo Ibrahímu akaziikwa, niho omwo yaaziikíle Sáara, mukazíwe. 11 Káyaafwíile Ibrahímu, Múungu yaaguma kumufúuha Izáaka, omutábani. Nawe Izáaka yaaba yaatuula héehi ni iziba lya Beer-Lahayi-Roi.b
Abaana Ba Ishimaeli
12 Áaba nibo enzáalwa za Ishimaeli, ali omutábani ayaazeelwe na Ibrahímu Hamumiísirikazi, Haájili ali omuzánakazi wa Sáara. 13 Óolu nílwo olubála lwa abaana ba Ishimaeli kwiingana nkokwo baazéelwe. Omuzáalwa wa mbele akaba ali Nebayóoti, abakulaatiilého bakaba bali Kedaari, Abadéeli, Mibisamu, 14 Mishma, Duma, Masa, 15 Hadáadi, Tema, Yetuuri, Nafishi na Kedema. 16 Áabo nibo abaana ba Ishimaeli abakaba bali entaándikilo na bakulu be engaanda ikúmi ne ibili. Obutúulo ne enkáambi záabo hamo ne engaanda záabo zikamanyiika habwa mazíina gáabo.
17 Ishimaeli akeekala emyáaka igána límo na makúmi ásatu na musáanzu (137), yaáfwa no kukulaatila beeseénkulu abamwiibeembéliile kufwa. 18 Enzáalwa za Ishimaeli bakeekala kutaándikila Havila kuhika Shúuri, olubazu lwo obutúluka bwa Miísiri kwoólekela Ashúuru. Bakeekala nibanobána na abaana abáandi bo mwa Ibrahímu.
Okuzáalwa Kwa Esau Na Yakobo
19 Éezi nizo empola ze enzáalwa za Izáaka ali mutábani wa Ibrahímu. 20 Izáaka káyaabeele yaáhikize emyáaka makúmi aána, yaakuúmpula hakusiigilwa Rebéka, ali muhala wa Betwéeli, omuuntu wo olugaanda lwa Abaaramu ba Mesopotamia.c Rebéka akaba ali munyáanya wa Labáani.
21 Izáaka yaásaba Omukáma Múungu obutalémwa habwo kuba Rebéka akaba ali omuguumba. Nawe Múungu yaámuhúlila, nikwo Rebéka kutwáala eenda ya amaloongo. 22 Abaana áabo baasiingaangana omuunda ya nyinábo. Nyinábo yaasobelwa obusasi no kweébuuza, “Habwaáchi byáaba bíti hali iinye?” Habwéecho, yaazeenda kumubúuza Omukáma Múungu abóne kumanya echigaambo éecho.
23 Omukáma Múungu yaámusúbiza, “Abaana abali omuunda yaawe balyáaba engaanda ibili zihateene.
Olugaanda lwo omwaana omuto
lulyáaba na amaani kuchila olugaanda lwa mudugu woómwe,
mála, olugaanda lwo omwaana omukúlu
lulyáaba abahálila bo olugaanda lwo omwaana omuto.”
24 Kási! Ebilo kábyaahikíle byo kuzáala, na ahonyini, Rebéka yaasiindikila amaloongo go obukwaáta. 25 Owa mbele akaba naatukúla, azwíigile omubili gwóona. Níkwo kumwéeta izíina Esau.d 26 Omwáanya múche oóndi akazáalwa akwaátiliile echisiínsilo cha mukulúwe. Habwéecho, baámwéeta weényini Yakobo.e Izáaka akaba yaáhicha emyáaka makúmi mukáaga obuchilo mukazíwe Rebéka yaabeele naazaála amaloongo áago.
Esau Kuguza Omugisa Gwo Buzigeezóbwee
27 Abaana baákula, Esau yaaba omuuntu wo mwiiluungu no omuundáanduf wo kuhíiga enyameéswa. Yakobo akaba ali omuteékaani, ayeénda kwiikala omúka. 28 Áaho Izáaka yaámweenda Esau habwo kuba akaba naayeénda kulya enyama zo obuhiigibwe, náho Yakobo akaba ali engaanzi hali Rebéka.
29 Echilo chimo, obuchilo Yakobo akaba naateéka echookulya che enkoóle, Esau yaasuba omúka kuluga omwiiluungu omubuhíigi ayine enzala bwooli. 30 Niho yaagaambila Yakobo, “Naáfwa ne enzala. Bwaangu ompe echookulya éecho echilíkutukula iíndye.” (Habwéecho, Esau kwéetwa izíina Edóomu.)g
31 Yakobo yaámusúbiza, “Éego, náho echiintu cha mbele ongulíze obuhuunguzi bwo obuzigeezo bwaawe.”
32 Esau yaágaamba, “Leeba, ndi héehi kufwa, obuhuunguzi bwo obuzigeezo bwaanze tibúkuungasa óobu!”
33 Náho Yakobo yaaguma kumuhátika, “Obaanze ondahílile nkokwo nibúba obwaánze!” Habwéecho, Esau yaámulahilila naámuguliza obuhuúnguzi bwo obuzigeezóbwe.
34 Mála Yakobo yaaha Esau omukaate ne enkoóle, yaálya, yaánywa, yaamala, yaalugáho, yaatáyo. Óokwo nikwo Esau yaagayíle omugisa gwo obuhuúnguzi bwo obuzigeezóbwe.