Okufwa No Kuzíikwa Kwa Sáara
23
1 Sáara akatúula emyáaka igána límo na makúmi ábili na musáanzu (127) ahabulami bwoómwe. 2 Akafweela omuchikáali cha Hebulóonia omúunsi ya Kanáani. Óokwo Ibrahímu akazoolelwa no kumuchulila mukazíwe. 3 Mála Ibrahímu yaasiga omutúumbi gwa mukazíwe, yaaza kuhooyab na Abahiti, 4 “Iinye ndi omuzenyi no omuhiínguzi omuli íimwe, muungulize áaho kuziika mukáanze.”5 Abahiti baasubiza Ibrahímu, 6 “Mukáma, íiwe oli omuuntu mukúlu bwooli omuli íichwe. Zíika mukáawe owéetu omuúmbi eémo éezo eli nzima kuchila zóona. Táliho omuuntu weéna wéena omuli íichwe alaakwiima eémbi yo kuziikámo mukáawe.”
7 Ibrahímu yeénama omuméeso ga áabo Bahiti bali abatúuzi be eensi éezo, hakubásiima bwooli. 8 Yaábagaambila, “Kámulaaba mwaányikililiza kumuziika mukaanze mumpuliilize, íimwe munsabile hali Efroni, omwaana wa Soháari, 9 angulíze enyaanga omuli Makpéela, éezo eli ahamuhélo gwe nsaambúye. Niinsába íimwe mumuleémbeleze angulíze omuméeso geenyu enyaanga éezo habuguzi óobwo alikweenda, eébe enyaanga yaanze yo kuziikámo.”
10 Efroni weényini akaba ayikéele omuli áabo Bahiti abakaba baákobile ahi iléembo lye echikaali éecho. Ahonyini Efroni yaasubiza Ibrahímu, 11 “Mmahi Mukáma waanze, ompulilize. Naakuhac ensaambo yóona ne enyaanga yóona elimo, kaandi naakuha éebyo omuméeso ga bazeenzi baanze. Ilóoko ozeénde ozíike mukáawe.”
12 Kaandi Ibrahímu yeénama hakusiima abaantu áabo, 13 yaámusúbiza Efroni kunu Abahiti nibahulila, “Niinkusába ompuliilize, niinkuha obuguzi óobwo olikweenda bwe ensaambo yaawe, kaandi niinkusába oyinaánkule obuguzi óobu, mbone áaho kuziika omutúumbi gwa mukáanze.”
14 Efroni yaámusúbiza Ibrahímu, “Mukáma waanze ompuliilize, 15 ensaambo elíkuguzibwa eshekéeli magána aána (400) ge efeezad tí kaantu hali íiwe neenye. Ilóoko ozeénde ozíike omutúumbi gwa mukáawe.”
16 Ibrahímu yeékiliza obuguzi bwa Efroni, yaamuliha eshekéeli magána aána (400) ge efeeza éezi yaagaambiile omuméeso ga Abahiti kwiingana ne endeengo za abasúluza bo obuchilo óobwo. 17 Habwéecho, ensaambo ya Efroni éezo eli óokwo Makpéela, héehi na Maámule, hamo ne enyaanga ne emiti yóona elimo byáaba ebiintúbye Ibrahímu ebilo byóona. 18 Éezo niyo ndagano eyaakozílwe omuméeso ga Abahiti abakaba baákobile omwiiléembo lye echikaali cha Efroni.