Okuleengesíbwa Kwa Ibrahímu
22
1 Obuchilo kábwahiingwiilého, Múungu weényini akalamula kumuleengesa Ibrahímu, yaamweeta, “Ibrahímu!” Nawe ayétabila, “Kaláme Omukáma.” 2 Múungu yaámugaambila, “Mbweenu niinyeénda otwaále mutábani waawe Izáaka nyakámo óogwo oyeénda, ozeénde náze, ompeéleze Izáaka abe echitáambo cho kusiingaalichwa hamulilo. Okole oótyo óokwo ahi ibaanga éelyo ndaakwooleka omúunsi ya Moria.” 3 Kábwaachíile Ibrahímu yeémuka enchaákala bwooli, yaayaasa eénkwi ze echitáambo cho kusiingaalicha hamulilo, yaazita hamugoongo gwe ensíkili,a yeémuka no omutábani Izáaka na bahalilábe bábili, baázeenda áaho yaaba yaálagilwa na Múungu. 4 Hachilo cha kásatu, Ibrahímu yaaloleela áaho balikuza hacháali akáanya. 5 Yaábagaambila abahalilábe, “Íimwe mwiikále áaha ne ensíkili éezi. Iinye na mutábani waanze, nituzeénda óokwo kumulámya Múungu, niho tulaabasaánga áaha.”6 Ibrahímu yeemucha olugúsho lwa amasiliíla go mulilo, yaámutwéeka Izáaka, weényini yeemucha omulilo no omúsho omuungalo, baázeenda hamo. 7 Áaho Izáaka yaámubuuza iíse, “Táata, omulilo ne eénkwi twiinábyo. Náho guli nkáhi omwaana gwe entaama gwe echitáambo cho kusiingaalicha?”
8 Ibrahímu yaasubiza Izáaka, “Mwaana waanze, Múungu weényini naayebonela omwaana gwe entaama gwe echitáambo cho kusiingaalicha.” Mála baázeenda no oluzeendo lwáabo. 9 Kábaahikile áaho Múungu yaabeele amulagiile, Ibrahímu yaayoómbeka itaámbilo, yaalitaho eénkwi halugulu. Mála yaakoma omutábani Izáaka, yaámulyaámika halugulu ye eénkwi ahi itaámbilo éelyo. 10 Ibrahímu yaakwaata omúsho kutaámbila Múungu omutábani.
11 Ahonyini maléeka wo Omukáma Múungu yaamweeta kuluga omwiigulu, “Ibrahímu! Ibrahímu!” Nawe ayétabila, “Kaláme Omukáma.”
12 Maléeka yaámugaambila, “Tuúla omúsho óogwo, otámuhutáaza nali kumukóla choóna chóona chibi mutábani waawe! Mbweenu óobu, naamanya nkokwo íiwe oli lutiina Múungu, habwo kuba tiwaámunyima mutábani waawe nyakámo.”
13 Níkwo Ibrahímu kwiinanulab améeso no kubona empaya ye entaama ehasizwe jhamahéembe gaáyo omuchisaka. Áaho Ibrahímu yaázeenda, yaaziihayo éezo entaama, yaázikola echitáambo cho kusiingaalicha hali Múungu ha mwáanya gwo omutábani. 14 Habwéecho, Ibrahímu yaaheeta áaho, “Omukáma Múungu Naayebonela.” Ni izíina éelyo lyaáguma kúba omugani gúti, “Omu ibaanga lyo Omukáma Múungu neébonwa.”
15 Maléeka wo Omukáma Múungu yaayeeta Ibrahímu entulo ya kábili kuluga omwiigulu, 16 yaámugaambila, “Omukáma Múungu naagaamba aáti, ‘Habwo kuba waámpulila, mála tiwaámunyima mutábani waawe nyakámo, naálahila ahi izíina lyaanze, 17 mazima niinkufúuhac íiwe bwooli no oluzáalo lwáawe ndyaálwoongela lúbe nké nyenyéezi zo omwiigulu na nko omusényi gwa ahachaambo. Oluzáalo lwáawe lulyaásiinga ababisa báabo hakunyagiilila ebikaali byáabo. 18 Kuluga omuluzáalo lwáawe ndyaáfuuha engaanda zóona omúunsi habwo kuba waahulila echilagilo chaanze.’ ” 19 Áaho Ibrahímu yaasuba abahalilábe, baalugáho, baásuba omúka óokwo Beer-Shéba. Na Ibrahímu yaaguma kutúula óokwo.
Oluzáalo Lwa Nahóori
20 Éebyo kábyaabeele byaáhweele, Ibrahímu akahulila empola nkokwo Milika yaazaaliile Nahóori, mulúmuna Ibrahímu, abaana munáana abo obukwaáta. 21 Omwaana wo obuzigeezo akaba naayetwa Usi. Owa kábili akaba ali Búuzi, naakulaatílwa na Kemwéeli ali iíse Aráamu. 22-23 Abaana abáandi nibeétwa Keséedi, Háazo, Pilidáashi, Yidiláafu na Betwéeli ali iíse Rebéka. Nahóori akazáala áabo abaana munáana hali Milika. 24 Kaandi Nahóori akazáala abaana abáandi bana hamukázi omuto ayaayesílwe Reuma, nabo bakaba nibeétwa Téba, Gahámu, Taháashi na Máaka.