Okuzáalwa Kwa Izáaka
21
1 Omukáma Múungu yaamwiízuka Sáara, yaamukólela ebizima nkokwo akaba amulagiile. 2-5 Áaho Sáara yaátwáala eenda, yaazáala omwaana wo obukwaáta hali Ibrahímu obuchilo óobwo nyini nkokwo Múungu yaabeele amúgaambiile. Obuchilo Izáaka naazaálwa, Ibrahímu akaba yaábeele omunyaampala bwooli, akaba ayine emyáaka igána límo. Yaamweeta omutábani izíina Izáaka.a Omwaana óogwo káyaahikize ebilo munáana azeelwe, Ibrahímu, yaámusála ikóba lyo obukwaáta nkokwo Múungu yaabeele amulagiile.6 Sáara yaágaamba naánulilwa, “Múungu yaampa echiseko. Buli muuntu alaahúlila empola éezi naaséka hamo neenye.” 7 Yaásobelwa no kweébuuza, “Noóhi alikuhicha kumugaambila Ibrahímu nkokwo Sáara naazaála no kwóoncha abaana? Mbweenu, naámuzaalila Ibrahímu omwaana wo obukwaáta obuchilo yaabeele omunyaampala.”
Okubiingwa Kwa Haájili No Mutábani Ishimaeli
8 Izáaka yaákula, baámuchúucha kwoónka. Echilo éecho Ibrahímu yaakola amazenyi maháango. 9 Náho Sáara yaabona Ishimaeli, omwaana wa Ibrahímu ayaazeelwe na Haájili Omumiísirikazi, naalyoógoza Izáaka omutábani. 10 Habwéecho, Sáara yaábuba no kumugaambila Ibrahímu, “Mubiinge óogu muzaanakazi no omutábani habwo kuba tikulího omwaana wo omuzaanakazi kuhuungula hamo no omwaana waanze Izáaka. Iinye tiínkweenda!”
11 Echigaambo éechi chikamúzuzubaza bwooli Ibrahímu habwo kuba Ishimaeli nawe akaba ali omutábani. 12 Náho Múungu yaagaambila Ibrahímu, “Otázuzubazwa habwo omwaana óogu na nyina, omuzaanakazi waawe. Hulíla no kukola éebyo Sáara alíkukugaambila habwo kuba olugaanda lwáawe lulyaáluga hali Izáaka. 13 Kaandi ndyaámukóla Ishimaeli, óogwo omwaana wo omuzaanakazi waawe, kúba iíse wi ihaánga liháango, habwo kuba nawe no omwaana waawe.”
14 Ibrahímu yaátiimbila enchaákala, yeemucha ebyookulya ne echisúsi echiizwiile améenzi go kunywa, yaámutwéeka Haájili áaha mabega, yaámubiinga hamo no omwaana woómwe. Haájili yaazeenda naatúmaanga túmaanga omwiiluungub lya Beer-Shéba. 15 Haájili na Ishimaeli baámala améenzi go kunywa omuchisúsi. Haájili yaamunágilana omutábani omuchibého chi isaka. 16 Mála yaaza akáanya ko omusábulo gwo mwaambi gúmo kuluga hamwaanáwe, habwo kuba yaáteekuza omumuganyágwe, “Haáchili ntaákubona omwaana waanze naáfwa.” Káyeekeele áaho, yaabaanza kulila bwooli.
17 Múungu yaahulila Haájili no omwaana nibalíla, na maléeka wa Múungu yaamweeta Haájili yaámubuuza, “Haájili, noolizíbwa chiíha? Otátíina habwo kuba Múungu yaahulila okulila kwo omwaana waawe, áaho wamulyaamíka. 18 Ilóoko ozeénde, omuhweele kweémeelela, omuleémbeleze, habwo kuba ndyaámukóla abe iíse wi ihaánga liháango.” 19 Níkwo Múungu kwooleka Haájili iziba lya améenzi, yaázeenda, yeezuza echisúsi, yaámuha omutábani améenzi, yaánywa.
20 Múungu yaámweémeelelela omwaana óogwo, yaálemwa yaákula. Yaatuula omwiiluungu, yaaba emaanzi wo kulása enyameéswa. 21 Obuchilo achitwíile omwiiluungu lya Paráani, nyina yaámubonesa omukázi wo kukuúmpula hakusiigilwa kuluga Miísiri.
Ibrahímu Kulagána No Mukáma Abimeléeki
22 Obuchilo óobwo, omukáma Abimeléeki hamo na Fikóoli, mukúlu wa abalwaanila ngoma, baázeenda kumuyeélela Ibrahímu. Níkwo Abimeléeki kumugaambila, “Nichimanyíika nkokwo Múungu ali hamo neewe omubiintu byóona ebyoókola. 23 Habwéecho, ndahíla áaha ahi izíina lya Múungu nkokwo otaliímbéeha iinye, abaana baanze nali enzáalwa zaanze. Nkeenye ndi omweésigwa hali íiwe, nikwo neewe obe omweésigwa hali iinye ne éensi eyoólikutuulámo nko omuzeenzi.” 24 Ibrahímu yaámusúbiza aáti, “Neékiliza. Iinye naálahila.”
25 Mála Ibrahímu yaasaáyila Abimeléeki habwa bahalilábe nkokwo bamwakile iziba lwa amaani. 26 Abimeléeki yaámusúbiza, “Tiínkumanya ni baáhi abaakozile batyo. Mbweenu tolaángaambiile, mazima ni leélo iinye kuhulila empola éezo.” 27 Níkwo Ibrahímu kuléeta entaama ne ente no kumuha Abimeléeki, náabo bábili baakola endagano. 28 Ibrahímu yeehámo emyaágazi ezíindi musaanzu za abaana be entaama, yaázisoloola. 29 Abimeléeki yaásobelwa, nikwo kubúuza Ibrahímu, “Habwaáchi waásoloola abaana be entaama éezo musaanzu?”
30 Ibrahímu yaámusúbiza, “Oyinaánkule éezi emyaágazi musaanzu ze entaama ezíindikukúha kuluga omuungalo yaanze nko oluméenko lwéetu nkokwo ni iinye ayaasumile éelyo iziba.” 31 Habwéecho, iziba éelyo lyaayétwa Beer-Shébac habwo kuba bóona bábili bakalahililana áaho. 32 Kábáaba baámala kukola endagano óokwo Beer-Shéba, nikwo Abimeléeki na Fikóoli ali mukúlu wa abalwaanila ngoma kusuba omúka, omúunsi ya Abafilísiti. 33 Ibrahímu yaabyaala omusisa óokwo Beer-Shéba, yaámulamya Omukáma Múungu, Múungu wo obucha no obuchiile. 34 Ibrahímu yaatuula omúunsi ya Abafilísiti ebilo bíinzi.