Ibrahímu No Mukáma Abimeléeki
20
1 Kuluga omuchaalo cha Maámule Ibrahímu yaafulukila nyakaziinzákazi yo omúunsi ya Kanáani, yaatuula ahagáti ye echikaali cha Kadéeshi na iluungua lya Shúuri. Omubuchilo óobwo yaaza kwiikala omuchaalo cha Geráari omwáanya. 2 Achili óokwo yaagaambila abaantu bo óokwo nkokwo Sáara ni munyáanya. Níkwo omukáma Abimeléeki wa Geráari kumulígila Sáara, habwéecho, yaasiindika abaantu kuza kumuléeta.3 Kwoónka Múungu yaamwiizáho Abimeléeki omuchilooto omuchilo yaámugaambila, “Mazima íiwe nootwaálwa lufu habwo kuba óogwo omukázi owotweéle ayina iíba.” 4 Habwo kuba Abimeléeki akaba atákalyaámile na Sáara, yaámuleémbeleza Múungu, “Mukáma waanze, otanyítila busa iinye hamo na abaantu abateena entaambala yoóna yóona. 5 Ibrahímu weényini níwe ayaangaambíile, ‘Óogwo mukázi ni munyaányeenye,’ nawe Sáara weényini, ali mukazíwe, yaákuunda, ‘Éego, Abramu ni munyaányeenye.’ Neenye naátwaala Sáara no omwooyo gugololokile, tiinkozile entaambala nali akábi koóna kóona hachikolwa éechi.”
6 Múungu yaaguma kumugaambila omuchilooto éecho, “Éego niimmanya toyína entaambala, nikwo iinye kukúzibila otáhena omuméeso gaanze habwo kukúzibila otamukoómozáho. 7 Mbweenu óobu, musubye óogwo omukázi hali iíba obóne kulama. Óogu Ibrahímu no omubáasi,b nawe naakusabíla. Náho kólaaleka kumusúbya hali iíba, mazima íiwe hamo na abaantu baawe bóona nimúfwa.”
8 Kábwaachíile Abimeléeki yaatiimbila kwiimuka, yaálagila baáyetwa abakózi bakulu ba hachikaali bóona no kubásoomboolela éebi yaaloósile omuchilo. Nabo kábaahúliile, baátíina bwooli. 9 Áaho niho Abimeléeki kumwéeta Ibrahímu héehi no kumuchaáhukila, “Watukolela ihanóchi? Naakuheneláchi kulemwa okatuleéteela echiheno chiháango, iinye no obukáma bwaanze? Waankolela ebigaambo ebitakwiílwe kukólelwa ha muuntu weéna wéena.” 10 Kaandi Abimeléeki yaaguma kumuchaáhukila, “Ni chiíha echaákutwaaliliza omumugánya gwaawe kukola oótyo?”
11 Ibrahímu yaámusúbiza, “Nkabona kúba áaha tihéena weéna wéena alikumutíina Múungu. Habwéecho, nkatiina batanyita babone kumutwáala mukázi waanze. 12 Mazima, óogwo ni munyaányeenye. Iinye na weényini tukobiile táata kwoónka tuteene banyinéechwe, nikwo yaabeele mukaanze.c 13 Habwéecho, obuchilo Múungu yaánfulwile kuluga omúka ya táata kuzeenda omumahaánga go obuzenyi, nkamúgaambila mukaanze, ‘Onyoleke echiganyizi chaawe hali iinye omuchigaambo éechi. Hoóna hóona hatulizeénda, niinkusába mukaanze, obagaambile oóti, “Óogu ni munyaányeenye.” ’ ”
14 Abimeléeki yaasubiza Ibrahímu mukazíwe Sáara, kaandi yaámuha ne entaama, ente, abazáana na abazánakazi. 15 Abimeléeki yaaguma kumugaambila Ibrahímu, “Leeba éensi éezi yóona eli omuméeso gaawe ne eyaánze, tóoza echaalo choóna chóona éecho olaayeénda kutuulámo.”
16 Nawe Abimeléeki yaagaambila Sáara hakumusímaanga, “Naamuha óogwo wayeta munyaányoko ebinogóka echihúumbi chimo (1,000) bye efeezad kukwiíhaho ensóni omuméeso ga abaantu abali hamo neewe nkokwo otéene ebilegelelo byoóna byóona.”
17-18 Omukáma Múungu yaabeele yaábachiíngile oluzáalo lwa buli eenda ya abakázi bóona be eéka ya Abimeléeki habwo kuba weényini akamutwáala Sáara muka Ibrahímu. Níkwo Ibrahímu kubásabila Abimeléeki, mukazíwe na abazaanakazíbe hali Múungu. Mála na Múungu yaábachiza Abimeléeki, mukazíwe na abazaanakazíbe, bóona baáhicha kuzáala abaana.