Okusiingaalika Kwa Sodóma Na Gomóra
19
1 Áabo bamaléeka bábili baáhika Sodóma olweébazo baasaanga Lúutu ayikéele ahi iléembo lye echikaali cha Sodóma. Lúutu káyaababweene, yaáyemeelela, yaaza kubeénaankula, yeénama, yaábalamya. 2 Yaábagaambila, “Niimbasába bakáma baanze munyegéle omuunzu yo muzáana wáanyu, mubóne kuhuúmula, munáabe amagulu, mulyaame áaha, nyencha mulaatiimbíla kuzeenda oluzeendo lwáanyu.”Kwoónka boónyini baámusubiza, “Mmahi, nitulyaáma halubúga lwe echikaali éechi.”
3 Lúutu yaábaleémbeleza múno, baálemwa beékiliza kutaaha omuunzúye. Lúutu yaabakolela amazenyi, no kuboókeza emikaate etéena ituumbyo,a nabo beekala, baálya. 4 Náho kábaabeele batákalyaámile, abakwaáta bóona, abanyaampala na basígazi kuluga embazu zóona za Sodóma baázoongoloka éenzu eyóbakaba balimo bamaléeka. 5 Baámwéeta Lúutu hakumuhátika, “Bali nkáhi áabo abakwaáta abeeza hakwaáwe omuchilo óomu? Básohóze tubalyáame!”
6 Lúutu yaásohola ahéelu kubónana na batuuzíbe, kwoónka yaachiinga omulyáango enyuma yomwe. 7 Mála yaábagaambila, “Badugu baanze niimbasába mutabakólela obubi óobwo. 8 Mbweenu muléebe, iinye nyina bahala baanze bábili abatákalyaámaga na abakwaáta. Haáchili mbahe abahalákazi áabo, mubakóle nkokwo mulikwéenda, náho mutabakólela abazenyi baanze ebíbi byoóna byóona habwo kuba bali omuungalo zaanze.”
9 Kwoónka echipípi éecho chaámugaambila, “Tuhigíze! Íiwe oli nkoóhi sii? Okeeza kunu nko muzenyi, óobu kási okeeza kututégeka. Habwo kuba watwaángilila, óobu nitukukoléla íiwe nyini obubi kuchila áabo bazenyi.” Áaho baaguma kumumigiliza Lúutu hamulyáango, baalaalila kugwáata omulyáango. 10 Náho áabo bazenyi, beémuka baáchiingula omulyáango baámunyululila Lúutu omuunzu, mála baáguchiinga. 11 Ahonyini baábahumisa améeso abakwaáta bóona abato na bakulu abaabele bali áaha mulyáango, habwéecho, baaba baásiingwa kuloondela omulyáango óogwo.
12 Áabo bazenyi baámubúuza Lúutu, “Oine badugu baawe omuchikáali éechi? Kábaalaaba balimo abatábani na bahala baawe, báko baawe, nali badugu baawe boóna bóona, beehémo óomu bwaangu. 13 Habwo kuba íichwe tweeliliza kuchisiingaalicha echikaali éechi chóona. Omukáma Múungu yaahulila empámo za abaantu abalikukólelwa obuzilwa kuluga omuchikáali éechi cha Sodóma. Obuzilwa bwe echikaali éechi bwaásagiliize bwooli, habwéecho, Omukáma yaalamula kutusiíndika kwiiza kuchisiingaalicha.”
14 Áaho Lúutu yaábazeendela abasúumba ba bahalábe, yaábagaambila, “Mulugémo bwaangu omuchikáali éechi, mazima Omukáma Múungu yeéliliza kuchisiingaalicha.” Náho boónyini baateékuza nkokwo Lúutu naabasilíbya kwoónka.
15 Kábwaachíile ahakachaákala bwooli, bamaléeka baámukómeenteleza Lúutu nibagaámba, “Imuka bwaangu ozeénde, twaála mukáawe na bahala baawe bábili abali áaha mutaákwiiza mukasaangwa omuchikáali éechi obuchilo Múungu naachisiingaálicha.”
16 Lúutu kayéebulabwiize, bamaléeka baákwaata omukonógwe, ne emikóno ya mukazíwe ne eya abahala, baábasohoza ahéelu ye echikaali éecho, habwo kuba Omukáma Múungu akabáganyila bwooli. 17 Kábabeele baábeehilémo omuchikáali, maléeka oómo wáabo yaábagaambila, “Mwiilúke mubóne kweéchiza, mutaákuchebuka enyuma,b na kaandi mutaákwiimeelela hoóna hóona omuumbúga omwo, mwiilukile omumabaanga mutaákwiiza mukasiingaálika.”
18 Lúutu yaábagaambila, “Mukáma waanze, mmahi. 19 Mazima iinye, muzana waawe, waánganyila hakunchíza omwooyo gwaanze. Náho amabaanga gali hala bwooli, ihano éelyo nilinsaánga ntákahikiléyo, habwéecho, neenye niímfwa. 20 Leeba héehi áaho haliho echikaali naakaáhicha kwiílukilámo. Mála ni chiche. Nkuúndila nzeénde óokwo, nomwooyo gwaanze niguchizwa.” 21 Mála maléeka yaámusúbiza, “Óobu, kaandi neékiliza okusaba kwáawe. Tiínkuchisiingaalicha echikaali éecho wagaamba kwiílukilámo. 22 Lahúka oyilukile óokwo oyíchize habwo kuba tiínkakuundíilwe kuhasiingaalicha áaha hóona otaákahikileyo óokwo.” Kulugiilila áaho echikaali éecho chaayétwa Soári.c
Múungu Kusiingaalicha Sodóma Na Gomóra
23 Izóoba likaba lyaásohola obuchilo Lúutu naahika omuchikáali cha Soári. 24 Níkwo Omukáma Múungu kugwíisa omulilo mwíinzi gulikwóocha bwooli kuluga omwiigulu habikaali bya Sodóma na Gomóra. 25 Yaásikiza ebikaali éebyo hamo ne embuga yóona, abaantu bóona abaabele balimo, emimelo yóona ne ebituungaánwa byóona. 26 Náho muka Lúutu, ayaabele ali enyuma ya Lúutu, habuzune yaachebuka enyuma, ahonyini yaáhiinduka yaaba enyomyo yo omwoónyo.
27 Echilo echaakulaatilého hakachaákala, Ibrahímu yaazáyo bwaangu áaho yaabeele ayímeeliile omuméeso go Omukáma Múungu. 28 Yaaleeba iífo olubazu lwa Sodóma na Gomóra ne embuga yóona yaabona kuluga ebikaali éebyo omwíika nigutuúnka nko gulikuluga omulyoókezo liháango. 29 Habwéecho, Múungu kayaasiingaálikize ebikaali byóona omuumbúga, yeézuka kusaba kwa Ibrahímu no kumwiihamo Lúutu naábe kuluga omwiihano elyaasiingaalikíze ebikaali éebyo.
Abamoabu Na Abaamoni Kuluga Habahala Ba Lúutu
30 Lúutu akatíina kwiikala áaho Soári. Níkwo Lúutu weényini na abahala bábili kufúluka kuluga óokwo kuza kutúula omumabaanga omunyaanga. 31 Bachili óokwo omuhala omukúlu yaagaambila omulúmuna, “Isíichwe yaákokweele, kaandi tihalimo omukwaáta weéna wéena omúunsi éezi wo kutuswéela tubóne kuzáala, nkokwo obuteéka bwe éensi buli. 32 Mbweenu tumutamíize táata na amaálwa ge ezabibud tubóne kulyaama náze no kuzáala abaana bo kuzeendeleza obwoko bwa táata.” 33 Omuchilo óomwo baámutamiiza isébo, mála omuhala omukúlu yaaza hali iíse, yaalyaama náze. Náho iíse akaba atamiile bwooli. Habwéecho, talamanyile choóna chóona echaakozilwe.
34 Echilo cha kábili, omuhala omukúlu yaámugaambila omulúmuna, “Omuchilo naalyáama na táata. Mbweenu tumutamíize leélo kaandi, neewe obóne kulyaama náze, tubóne kuzeendeleza olugaanda lwa táata.” 35 Omuchilo óomwo baámunyweesa kaandi amaálwa ge ezabibu, mála omuhala omuto yeémuka, yaaza kulyaama náze. Kaandi iíse akatamiila bwooli. Habwéecho, talamanyile choóna chóona echaakozilwe. 36 Habwéecho, bóona bubili bwáabo baatweekwa eenda na isébo.