Múungu Kumanyisa Sáara Nkokwo Alaazáala Omwaana
18
1 Chilo chimo Ibrahímu akaba ayikeele hamulyáango gwi iheemálye héehi ne emizule ya Maámule. Omukáma Múungu yaamwiizáho omwiiháangwe. 2 Ibrahímu káyeenamwiile améeso yeechula abaantu básatu beemeeliile akáanya káche kuluga hali weényini. Yeémuka bwaangu, yeéhuuta kuluga hamulyáango gwi iheemálye, yaaza kubaánaankula. Káyaabahikilého, yaabateeleza ebizwi, yeénama, 3 yaábagaambila, “Íimwe bakáma baanze, kamulaasemelelwa niimbasába mutánhiinguliza iinye omuhálila wéenyu, mwiikále.a 4 Babaleétele améenzib munáabe amagulu géenyu mubóne kuhuúmula omuchibého cho omuti óogu. 5 Kaambaleetéle akookulya mulye mubóne amaani go kuzeendelela oluzeendo lwéenyu, nimuba mwamulabáho omuhálila wéenyu.”Nabo baámusubiza, “Nahoónyini, kola nkokwo wagaámba.”
6 Ahonyini Ibrahímu yeéhuuta kusuba omwiiheéma, yaámugaambila Sáara, “Kola bwaangu endeengo isatu ze ensaano nzima ye ngano, ozikaánde, mála ozitéeke emikaate.” 7 Ibrahímu yeéhuuta, yaaza omubúsho bwe eente yaátooza enyána eseekile yaámulagila omukozíwe azibáage no kuzitéeka bwaangu. 8 Kábaamazíle kuloonza ebyookulya, Ibrahímu yaaleeta ejibíini ya amakámo,c amáta ne enyama éezo eyokize, mála yaábatóna. Obuchilo bachaálya Ibrahímu yaabeekaláho héehi abóne kubaheeleleza abazenyi éecho balikweenda, áaho omuchibého cho omuti.
9 Áabo bazenyi baámubúuza Ibrahímu, “Mukáawe Sáara alinkáhi?” Ibrahímu yaábasubiza, “Ali omwo omwiiheéma.”
10 Omukúlu wáabo yaámugaambila, “Mazima omwaaka oguleéza, obuchilo nko óobu ndyaásuba hakwéenyu, na Sáara mukáawe alyáaba yaazeele omwaana wo obukwaáta.”
Obuchilo óobwo nyini, Sáara akaba naahuliiliza, ali ahamulyáango gwi iheéma, elikaba lili enyuma yo óogwo.
11 Ibrahímu na Sáara bakaba baákokweele bwooli, Sáara akaba yaábeele omukeékulu múno atáchihicha kuzáala. 12 Habwéecho, Sáara káyaahuliile nkokwo alyaázaala, yaasekela omumugánya, yaateekuza, “Niinhicha nta kunulilwa omubukuúmpuzi bwéetu no kuzáala omwaana obuchilo iinye naabeele omukeékulu ne ebanye tachiina amagala yaányaampaheele?”
13 Omukáma Múungu yaabuuza Ibrahímu, “Habwaáchi Sáara yaáseka no kwiíbúuza nkokwo yaakaáhicha kuzáala omwaana kunu yaákokweele aáti? 14 Heena echigaambo choóna chóona echilíkuhicha kumulema Omukáma Múungu? Mmahi! Nkokwo naakugaambíla, omwaaka oguleéza, obuchilo nko óobu, ndyaásuba áaha na Sáara alyáaba yaazeele Omwaana wo obukwaáta.” 15 Sáara akatíina, yaábéeha no kwáanga chenene kunu naagaámba, “Iinye tinaáseka!” Múungu yaámugaambila, “Éego, mazima kuseka waáseka.”
Ibrahímu Kusabíla Abatúuzi Ba Sodóma
16 Abaantu áabo baaluga óokwo Maámule. Omumuháanda baleeba iífo echikaali cha Sodóma, no obuchilo óobwo, Ibrahímu akaba naabaseendekeléza.
17 Mála oómo omuli áabo básatu ali Omukáma Múungu akaba neteekuza, “Tí kuzima kumuseleka Ibrahímu echigaambo éecho naalamula kukola, 18 habwo kuba mazima Ibrahímu naába iíse wo olugaanda luháango lwa amaani na hali weényini engaanda zóona ze éensi zilyaáfuuhwa. 19 Weényini naámutóoza abóne kubeébeembelela abaantúbe ne enzaalwáze no kubeégesa kunhulila iinye no kwiikiliza omuháanda gwo Omukáma Múungu, hakukola ebizima no kúba neéntuungwa nzima hamugánya, mbone iinye kuhicha endagano yaanze hali Ibrahímu.” 20 Mála Omukáma Múungu yaagaambila Ibrahímu, “Naahulile empámo za abaantu abalikukólelwa obuzilwa kuluga omubikáali bya Sodóma na Gomóra, nkokwo abatúuzi baábeele abazílwa bwooli ne ebiheno byáabo byaákanyile bwooli. 21 Habwéecho, nzéyo obu kuleeba ebyo balikukola kabilaaba nibizeendana ne empámo éezo zilikunsaanga na kabilaaba bitali bityo niinyeénda kusoombookelwa.”
22 Mála, abaantu áabo baákwaata omuháanda kwoólekela Sodóma, kwoónka Ibrahímu yaasigala kunu enyuma ayímeeliile omuméeso go Omukáma Múungu. 23 Áaho Ibrahímu yaamwiilila héehi yaágaamba aáti, “Nosiingaalicha abeena entaambala na abateena entaambala? Mazima niinzilaánti, tí bityo! 24 Kábaakuba balimo abateena entaambala makúmi atáanu omuchaalo éecho, wakaásiingaalicha éecho chaalo nali noochileeka habwa áabo abaantu makúmi atáanu abateena entaambala abalimo? 25 Mazima tí ntúungwa zaawe, kwiita abaantu abateena entaambala hamo na abeena entaambala, habwaáchi owe ntúungwa enzima hamugánya ayiingániswe no owe ntúungwa mbi? Íiwe omuchwaáziiki muzima we éensi yóona tiwaákuleka kukola ebili amazima.”
26 Omukáma Múungu yaámusúbiza, “Kaándasaanga abateene entaambala makúmi atáanu omuchikáalid cha Sodóma, habwa áabo abaantu tiínkuchisiingaalicha echikaali chóona.”
27 Kaandi Ibrahímu yaágaamba, “Nóobwo iinye ndi enkuungu ni iízue lyoónka, kwoónka niinkusába ngume kuhooyaf neewe Omukáma waanze. 28 Mbweenu abaantu abateena entaambala kábalaachéeha bakaba makúmi aána ne itáanu boónka, noohicha kusiingaalicha echikaali chóona habwo kulébaho abaantu batáanu?” Omukáma Múungu yaámusúbiza, “Kaándaabona abaantu makúmi aána ne itáanu abe ntúungwa nzima hamugánya tiínkusiingaalicha echikaali éecho.”
29 Ibrahímu yaaguma kumuleémbeleza Omukáma Múungu, “Sii, hamo lúundi abaantu abe ntúungwa nzima hamugánya kábaakuba balimo makúmi aána omuchikáali éecho?” Omukáma Múungu yaamuzila aáti, “Tiínkusiingaalicha echikaali éecho habwa abaantu áabo makúmi aána.”
30 Ibrahímu yaaguma yaámugaambila, “Omukáma waanze, niinkusába otánigáhala mbone kuguma kugaamba. Hoonási, kabaakubámo abaantu makúmi ásatu omuchikáali éecho?” Omukáma Múungu yaámusúbiza, “Tiínkukóla ntyo kabaakubámo abaantu makúmi ásatu.”
31 Ibrahímu yaámugaambila, “Habwo kuba iinye naáyomeleza kugaamba no Omukáma waanze, niinsába nhóoye neewe kaandi. Mbweenu kabaakubámo abaantu makúmi ábili boónka omuchikáali éecho?” Omukáma Múungu yaamuzila aáti, “Tiínkusiingaalicha echikaali éecho habwa abaantu makúmi ábili.”
32 Omukuhéleeluka, Ibrahímu yaámugaambila, “Omukáma waanze niinkusába otaákunigahalila iinye mbone kugaamba entulo eémo yoónka. Hoonási abaantu abateena entaambala kabaakubámo ikúmi boónka nibiba bíta?” Omukáma Múungu yaámusúbiza, “Habwa áabo baantu ikúmi tiínkusiingaalicha echikaali éecho.”
33 Omukáma Múungu káyaamazile kuhooya na Ibrahímu, yaalugáho na Ibrahímu yaasuba omukáye.