Endagano No Oluméenko Lwo Kusálwa Abakwaáta
17
1 Abramu káyaahikize emyáaka makúmi mwéenda na mwéenda, Omukáma Múungu yaamwiizáho, yaámugaambila, “Iinye ndi Múungu Omuzizi wa Byóona. Kulaatíla echigaambo chaanze no kwiikala otéene entaambala. 2 Neenye niingumísa endagano neewe no kukwoóngela bwooli oluzáalo lwáawe.”3 Abramu yeénama naateeza ebizwi omuméeso ga Múungu. Mála Múungu yaámugaambila, 4 “Endagano yaanze neewe niyo éezi, iinye ndyaákukóla obe iíse we engaanda nyíinzi. 5 Kaandi kuluga leélo tócheetwa Abramu, kwoónka nooyétwa Ibrahímua habwo kuba niinkukóla obe iíse we engaanda nyíinzi. 6 Ndyaákukóla obe no oluzáalo lwíinzi bwooli, engaanda nyíinzi na abakáma balyaáluga haluzáalo lwáawe.
7 “Niingumísa endagano yaanze hali iinye neewe, abaana baawe no oluzáalo lwáabo, éezi ne endagano yo obucha no obuchiile. Iinye ndi Múungu waawe, kaandi ndyáaba Múungu wo oluzáalo lwáawe lwóona, olutahwa no lutahwa. 8 Éensi éezi yóona ya Kanáani eyoótwiilémo nko omunyamahaánga, iinye niinkuha íiwe no oluzáalo lwáawe obucha no obuchiile. Iinye niímba Múungu waawe, kaandi ndyáaba Múungu wáabo.”
9 Múungu yaagaambila Ibrahímu, “Náho hali íiwe hamo no oluzáalo lwáawe lwóona, mukwaáte mugúmye endagano yaanze. 10 Endagano yaanze niyo éezi, buli mukwaáta omuli íimwe no oluzáalo lwáawe musálwe ikóba lyo obukwaáta. 11 Mukwiilwe kusálwa. Echikolwa éechi no oluméenko lwe ndagano yaanze neemwe. 12 Kulugiilila óobu, buli omwaana wo obukwaáta we ebilo munáana kuluga kuzáalwa omuli íimwe asálwe ikóba lyo obukwaáta. Kaandi abakwaáta bóona omuluzáalo lwéenyu, abahálila abazeelwe omwáanyu hamo na abaaguzílwe haampílya zéenyu kuluga habazenyi, bóona basálwe.
13 “Buli mukwaáta omúka yaawe akwiilwe kusálwa. Óolwo nílwo oluméenko lwe endagano yaanze olulibonekana ahamibili yéenyu, endagano elilama obucha no obuchiile. 14 Omukwaáta weéna wéena alikwaanga kusálwa, naasoloolwa kuluga omubaantu abali hamo omuundagano habwo kuba yeeta endagano yaanze.”
15 Múungu yaaguma kugaambila Ibrahímu, “Kuluga óobu tóchimweeta mukáawe Sarái, iziinálye nilíba Sáara.b 16 Iinye nimufúuha, nniimuha Sáara obuhicha bwo kukuzaálila omwaana wo obukwaáta. Ndyaámufuuha abe nyina we engaanda abakáma ba mahaánga balyaáluga haluzaalólwe.”
17 Áaho Ibrahímu yeénama naateeza ebizwi, yaáseka hakusobelwa, kunu naateekuza, “Omunyaampala we emyáaka igána límo yaakáhicha aáta kuzáala omwaana? Na Sáara omukeékulu we emyáaka makúmi mwéenda yaakaázáala?” 18 Mbweenu Ibrahímu yaámusaba Múungu, “Haáchili, wakeékiliize Ishimaeli afúuhwe abe omuhuunguzi waanze.” 19 Múungu yaagaambila Ibrahímu, “Tí bityo, Sáara mukáawe naakuzaalila omwaana wo obukwaáta neewe noomweeta iziinálye ‘Izáaka.’c Neenye ndyaázeendeleza endagano yaanze náze hamo no oluzaalólwe. Endagano éezi neeba yo obucha no obuchiile. 20 Ahali Ishimaeli, naákuhúlila okusaba kwáawe. Nniimuha omugisa, ndyaámwoongela bwooli oluzaalólwe. Alyáaba iíse wa abakáma ikúmi na bábili na ndyaámukóla abe iíse wo olugaanda luháango. 21 Náho endagano yaanze ndyaázigumísa hali Izáaka, óogwo alizaalwa na mukáawe Sáara omwaaka ogulíkwiiza obuchilo nko óobu.” 22 Áaho nyini káyaamazile kuhooyad náze, Múungu yaalugáho, yaámulekáho Ibrahímu.
23 Echilo éecho nyini Ibrahímu yaámusála omutábani Ishimaeli, no kubasála abahálila bóona abo obukwaáta abazeelwe omukáye na abaguzilwe ahaampilyaaze. Yaábasala bóona amakóba ge empali záabo éecho chilo nkokwo Múungu yaamulagíile. 24 Ibrahímu akasálwa ayine emyáaka makúmi mwéenda na mwéenda, 25 no omutábani Ishimaeli akasálwa ayine emyáaka ikúmi ne ésatu. 26 Hakumwiíkiliza Múungu, Ibrahímu no omutábani bakasálwa echilo éecho nyini 27 hamo na abakwaáta bóona abáandi bo omuunzúye, abahálila abazeelwe omukáye na áabo abaguzilwe ahaampilyaaze.