Sarái Na Omuzánakazíwe Haájili
16
1 Sarái, muka Abramu, akaba acháali kumuzaálila iíba omwaana. Náho akaba ayina omuzánakazi, Omumiísirikazi, naayetwa Haájili. 2 Níkwo Sarái kumugaambila Abramu, “Noomanya nkokwo Omukáma Múungu takaampága obuzéele, mbweenu naakuha omuzánakazi waanze, lúundi naakaáhicha kubona abaana kuluga hali weényini.” Áaho Abramu yaákuunda obuhanuuzi bwa Sarái. 3 Habwéecho, Sarái yaámuha iíba, Abramu omuzánakazíwe Haájili Omumiísiri abe mukazíwe. (Éebi byóona bikakolwa Abramu búyaabeele yaatwiile emyáaka ikúmi omúunsi ya Kanáani.)4 Abramu yaalyaama na Haájili, nawe yaátwáala eenda. Náho Haájili káyeemanyile nkokwo yaátwáala eenda, yaazila ihagi, yaabaanza kumugáya omugoléwe. 5 Níkwo Sarái kumugaambila Abramu, “Níiwe olaabimála byóona ebíbi byaálikunkólela omuzánakazi waanze. Iinye nkakúha omuzánakazi óogwo, náho káyeemanyile nkokwo ayina eenda yaabaanza kuúngaya. Omukáma Múungu níwe alaabimala hali íiwe neenye.”
6 Náho Abramu yaámugaambila Sarái, “Omuzánakazi waawe ali omubutégeki bwaawe, omukóle nkokwo olikweenda.” Mála Sarái yaámwaágalaza Haájili, yaáleemwa, yaámwiiluka.
Okuzáalwa Kwa Ishimaeli
7 Maléeka wo Omukáma Múungu akamwiizáho Haájili haanzwéeloa ya améenzi omuumbúga eyómile eli peyege. Enzwéelo éezo eli haampiíngulo yo omuháanda gwo kuza ahaantu halikwéetwa Shúuri. 8 Maléeka yaámubuuza, “Íiwe Haájili, omuzánakazi wa Sarái, noobuga nkáhi na noozeénda nkáhi?”
Haájili yaámusúbiza, “Nimwiiluka omugóle waanze Sarái.”
9 Maléeka wo Omukáma Múungu yaámugaambila, “Osúbe hali mugóle waawe, mála oyicheeshe omumeesóge. 10 Mazima niinkwoongela oluzáalo lwáawe lúbe lwíinzi olutakwiílwe kúbalwa.”
11 Maléeka yaaguma kumugaambila, “Íiwe oyine eenda, olyaázaala omwaana wo obukwaáta. Olyaámweeta izíina Ishimaelib habwo kuba Omukáma Múungu yaahulila okulila kwáawe habwe enáku zaawe. 12 Omwaana óogwo alyáaba nké mbogo. Alyáaba omubísa wa buli muuntu na buli muuntu alyáaba omubísawe. Alyeékala ahabeene na badugúbe.”
13 Haájili yaamweeta Omukáma Múungu, óogwo akaba naahooya náze, ahi izíina, “Íiwe ni Múungu ambóna,” habwo kuba akeéteekuliza, “Mazima, áaha naámubona Weényini óogwo ambóna.”c 14 Habwéecho, iziba éelyo likeetwa Beer-Lahayi-Roi, ensoonga, “Iziba lyo óogwo ayina obulami ambóna.” Iziba éelyo lichaali liliho ahagáti ya Kadéeshi na Beréedi.