Endagano Ya Múungu Na Abramu
15
1 Kábyaabeele byaáhweele, Omukáma Múungu yaamwiizáho Abramu nka ali omuchilooto,a naamugaambila, “Abramu, otátíina! Iinye naálamwiile kúba enchíinzi yaawe no kukufúuha bwooli.” 2 Náho Abramu yaasúbya, “Íiwe Omukáma Múungu noompáchi na kunu iinye tinyina omwaana aliba omuhuunguzi waanze? Eliezéeri, Omudamaásiko, ali omuzáana waanze, níwe alihuungula ebiintu byaanze byóona. 3 Leeba, tókaampága omwaana, habwéecho, omuzáana ayaazeelwe omúka yaanze níwe aliba omuhuunguzi waanze.”4 Níkwo Omukáma Múungu kumugaambila Abramu, “Mmahi. Óogwo muzáana táliba omuhuunguzi waawe. Omwaana waawe wolizaála níwe aliba omuhuunguzi waawe.” 5 Múungu yaámutwáala ahéelu, yaámugaambila, “Leeba olugulu! Péeta enyenyéezi, mbweenu káwakuhicha kuzípeeta. Níkwo oluzáalo lwáawe lulíba!”
6 Abramu yaámweésiga Omukáma Múungu, no omukumweésiga, Múungu yaámubona Abramu nkokwo ali owe ntúungwa nzima hamugánya.
7 Mála Múungu yaámugaambila, “Iinye ndi Omukáma Múungu ayaakwiihile omuchikáali cha Uri echili omúunsi ya Abakalidáyo,b mbone kukúha éensi éezi ozitegéke.”
8 Náho Abramu yaámubuuza, “Íiwe Omukáma Múungu, Omutégeki wa Byóona, iinye niimmanya nta nkokwo éensi éezi elyáaba yaanze?”
9 Níkwo Omukáma Múungu kumusubiza, “Ndeétela enyána enkázi, ebúguma ye embuzi, ne empayac ye ntama, zóona ze emyáaka isatu isatu, hamo ne empuundad ibili, eénche ne empáango.” 10 Abramu yaamuleetela ebituungaánwa éebyo byóona, yaábyaásaalula ahagáti buli chituungaánwa ebinogóka bibili bibili, buli chinogóka yaachoolekeza chizeenzi chaácho echíindi, kwoónka enyonyi talazíbalaalwile. 11 Mála embeesi kázaakoongoókile kwiiza kulya obwíite óobwo, Abramu yaaba naazibiínga.
12 Izóoba kályaabeele lyaásaaliliza kugwaamo, Abramu akakwaatwa otúlo twíinzi na Múungu yaamuleetela echilooto che ensiimbaazi mpáango eyaamutiínisize bwooli.
13 Mála Omukáma Múungu yaámugaambila, “Mazima ománye nkokwo oluzáalo lwáawe lulyáaba Abanyamahaánga omúunsi etali yáabo. Balyáaba abahálila no kwaágalazibwa bwooli emyáaka magána aána (400). 14 Náho ndyaáchwaaziikila éensi éezo elibakola abahálila, ni ihélezo lyo kuchwaáziikilwa kwáabo, balyaálugámo no obugéega buháango. 15 Kwoónka íiwe nyini olyaálama bwooli, olyaáfwa no obuhóolo. 16 Mazima káziliba enzáalo iínae zaáhiíngwiile, oluzáalo lwáawe lulyaásuba áaha obuchilo obuzilwa bwa Abaamóori kabulihíka hamuhélo.”f
17 Izóoba kályaatobíile no kúba ensiimbaazi, enyuungu elíkutúunka omwíika ne enkaanzi elikwaakomulilo bwooli bikahiíngula ahagáti ye binogóka bye nyama éezo.g 18 Habwo kukola aátyo, echilo éecho Omukáma Múungu yaakola endagano na Abramu. Níkwo Múungu kumugaambila aáti, “Ndyaáha oluzáalo lwáawe éensi éezi kuluga halubibi lwa Miísirih kuhika hamuzela omuháango gwa Efuráati, 19 ensoonga yaámo éensi za Abakéeni, Abakeníizi, Abakadamóoni, 20 Abahiti, Abaperíizi, Abarefáayo, 21 Abaamóori, Abakanáani, Abagirigáashi na Abayebúusi.”