Abramu Kuchiza Lúutu
14
1 Obuchilo óobwo, omukáma Amuraféeli we éensi ya Babilooni,a omukáma Arióoko wa Elasáari, omukáma Kedoriláma wa Eláamu, no Tidáli mukáma wa Goimu, 2 hamo bóona baaza kulwana ichúmu no omukáma Beela we echikaali cha Sodóma, omukáma Birísha wa Gomóra, omukáma Shinábu wa Adima, omukáma Shemebéeri wa Seboimu, no omukáma wa Beela (ensoonga, Soári.) 3 Abakáma áabo batáanu be ebikaali éebyo beékobya hamo ne ebipípi byáabo baábikola kúba echipípi chimo cha abalwaanila ngoma omwiihaalob lya Sidímu, ensoonga, Enyaanza yo Omwóonyo. 4 Habuchilo bwe emyáaka ikúmi ne ibili bakaba nibategékwa no Mukáma Kedoriláma, náho omumwáaka gwe ikúmi ne ésatu baámuhiinduka.5 Omumwáaka gwe ikúmi ne iína obuchilo Kedoriláma na abakáma bazeenzíbe básatu batákalwene ichúmu ne echipípi cha abakáma batáanu óokwo Sidímu, beeza omúunsi ya Kanáani. Baalwáana ichúmu no kubasíinga Abarefáayo óokwo Ashtaroti-Karinayimu, Abazuuzi óokwo Háamu, Abaemi omuumbúga ya Kiriatimu,c 6 na Bahóori óokwo mumabaanga ga Seyiri. Baázeendelela kulwana ichúmu baálemwa baáhika Eliparani eli héehi ne éensi eyómile. 7 Áaho baásuba enyuma, baáhika Enimishifáati (izíina elíindi ni Kadéeshi), baateela éensi yóona ya Abaamaléeki no kubasíinga Abaamóori abekeele omuchikáali cha Hasasóoni-Tamári.
8-9 Mbweenu abakáma áabo batáanu ba Sodóma, Gomóra, Adima, Seboimu na Beela hamo na abalwaanila ngoma báabo baázeenda omwiihaalo lya Sidímu. Áaho baalwáana ichúmu na abakáma bana, nabo ni Kedoriláma we éensi ya Eláamu, Tidáli wa Goimu, Amuraféeli wa Babiloonid na Arióoko wa Elasáari. 10 Ihaalo lya Sidímu likaba liízwíile ameena ge eláami etiimbile. Abakáma ba Sodóma na Gomóra na abalwaanila ngoma báabo kábaabweene baásiingwa, beéluka. Omuli áabo báagwa omumeena ge eláami, abasígeele beelukíla omumabaanga kwiiseleka. 11 Abakáma bana abaasiíngile baaza Sodóma na Gomóra, baanyagae ebiintu byóona hamo ne ebyookulya byáabo. 12 Kaandi baámukwáata Lúutu, ali óogwo mutábani wa mweenewáabo na Abramu, ayaabele naatuúla Sodóma, hamo ne ebiintúbye byóona, baámala, baázeenda.
13 Omuuntu oómo akabeétesuka yeéluka yaamutwaálila Abramu, Omweebranía, empola zo okukwaatwa kwa Lúutu. Abramu akaba natuúla héehi ne emizule zo mwa Maámule ayaabele ali Omwamóori. Maámule na badugúbe Eshikóoli na Anéeri bakaba baakózile endagano na Abramu yo kuhweelana kulwana ichúmu.
14 Abramu káyaahuliile empola zo okukwaatwa kwa Lúutu, yaakobya abatabaazi magána ásatu ne ikúmi na munáana (318) emaanzi bo omukáye, baákulaatila áabo abakáma bana, baáhika hachikaali cha Dáani. 15 Omuchilo Abramu yaábagaba abaantúbe omubipiipi, baábatabaalila ababisábe, baábasíinga, baabeélucha kuhika Hóoba, echikaali echili chiziba cha ntúmwa ye echikaali chiháango cha Damaásiko. 16 Abramu yaachiza ebiintu byóona ebyaanyagílwe na babisábe hamo no kuchuúngula Lúutu ne ebiintúbye, abakázi na abaantu abáandi abakwaásilwe, baásuba omúka.
Melikizedeeki Kufúuha Abramu
17 Abramu káyaagalukile kuluga omwiichúmu eli yaamusiíngile omukáma Kedoriláma hamo na abakáma bazeenzíbe, omukáma wa Sodóma yeeza (kumusuúngaana) kumuchaámiliza Abramu omwiihaalo lya Sháawe (izíina elíindi, Ihaalo lyo mukáma). 18 Akaba aliho omukáma we echikaali cha Saléemu naayetwa Melikizedeeki. Omukáma óogwo yaaleetela Abramu omukaate na amaálwa ge ezabibu.f Kaandi Melikizedeeki akaba ali omukwaátanisi wa abaantu na Múungu,g Múungu Muzizi wa Byóona. 19 Melikizedeeki yaámufuuha Abramu naagaamba aáti, “Abramu afúuhwe na Múungu, Omuzizi wa Byóona, Omuhaanzi wi igulu ne éensi. 20 Akuzíbwe Múungu Omuzizi wa Byóona, ayaakuhéele kusíinga ababisa baawe.” Nawe Abramu yaámuha Melikizedeeki eémo yi ikúmi ye ebiintu byóona éebyo yaasúbize kuluga omwiichúmu eli yaasiíngile.
21 Byóona kábyaahwéele, omukáma wa Sodóma yaagaambila Abramu, “Niinsába abaantu baanze boónka, náho ebiintu ebíindi byóona, twaála.”
22 Náho Abramu yaámusúbiza omukáma wa Sodóma, “Naálahila ahi izíina lyo Omukáma Múungu, Múungu Omuzizi wa Byóona, ayaahaangile igulu ne éensi, 23 iínti, mazima tiínkutwáala choóna chóona echili chaawe nóobwo chiliba echinogóka cho obuluba nali olugóye lwe enkéeto, otaákwiiza okeésiingiza no kugaamba, ‘Iinye niinye naatuungisa Abramu.’ 24 Habwéecho, tiínkwiinaankula choóna chóona kwoónka kwiikiliza éebyo byaaliibwa na abatabaazi baanze. Kaandi báhe bazeenzi baanze engabo yáabo éezo baanyaga omwiichúmu. Áabo abáaba bali hamo neenye nibo Anéeri, Eshikóoli na Maámule.”