Abramu Na Lúutu Kutaana
13
1 Abramu akaluga Miísiri, yaayolekela chiziba cha ntúmwa, yaahika omúunsi ya Kanáani olubazu lwa nyakaziinzákazi. Akasuba hamo na Sarái, ali omukazíwe, Lúutu ne ebiintu byáabo byóona. 2 Obuchilo óobwo Abramu akaba ali omugéega ayine ebiintu bíinzi nké ebituungaánwa na amadíini ge efeezaa ne ezaháabu.3-4 Kuluga nyakaziinzákazi ya Kanáani yaázeendelela kufúluka fuluka, yaálemwa yaahika ahagáti ye ebikaali bya Betéeli na Ayi. Áaho niho yaabeele ayoombekile enkáambíye ni itaámbilo obuchilo bwa mbele. Áaho kaandi Abramu niho yaasubile kumulámya Omukáma Múungu.
5 Obuchilo óobwo Lúutu, yaakulaatíleene hamo na Abramu, nawe akaba ayina entaama, ente na amaheémab ge embagáye na bahalilábe. 6-7 Éensi éezo ekafúunda kutuulwámo Abramu na Lúutu habwo kuba bakaba beene ebituungaánwa bíinzi. Na abalíisa be ebituungaánwa bya Abramu ne bya Lúutu baákuungana. Habwéecho, Abramu na Lúutu baálemwa kutuúlana. Kaandi obuchilo óobwo, Abakanáani na Abaperíizi bakaba bali abatúuzi be echaalo éecho. 8 Abramu yaámugaambila Lúutu, “Mwaana waanze, íichwe tuli áabo bwóoko búmo. Tí kuzima abalíisa béetu bakuungáne. 9 Mbweenu, leeba éensi éezi yóona eli omuméeso gaawe, ni ngázi yo kutúhika chwéena. Óobu, tóoza olubazu lwoóna lwóona lwolíkweenda, tutaáne. Kólaazeénda olubazu lwo obumoso, iinye niinzeénda olubazu lwo obúlyo. Kólaazeénda obúlyo, niinzeénda obumoso.”
10 Lúutu yaaleeba embazu zóona, yaabona ihoolac lya Yolodáani kwoólekela Soári línyiliile. Ihoola éelyo likaba eliina améenzi gaáhikile embazu zóona nko omusili gwo Omukámad nali nké eensi yo obunula ya Miísiri. (Obuchilo óobwo, Omukáma Múungu atákasiingaalikize ebyáalo bya Sodóma na Gomóra.) 11 Habwéecho, Lúutu yaátooza ihoola lyóona lya Yolodáani, yaayolekela obutúluka. Níkwo baaba baátaana batyo. 12 Abramu yaázeendelela kwiikala omúunsi ya Kanáani, na Lúutu yaaza kutúula omubikaali bibili omuli éelyo ihoola, yaayoómbeka enkáambíye héehi na Sodóma. 13 Náho, abaantu ba Sodóma bakaba bali abazílwa, nibamuhenéla bwooli Omukáma Múungu.
Múungu Kusubiilíla Endaganóye Hali Abramu Kumuha Éensi
14 Káyaabeele Lúutu yaatéene na Abramu, Omukáma Múungu yaámugaambila Abramu, “Oleebe embazu zóona ze éensi kuluga olubazu lwo obutúluka no obugwa, chiziba cha ntúmwa na nyakaziinzákazi. 15 Éensi éezi yóona yoolíkuleeba niinkugabíla íiwe no oluzáalo lwáawe, eébe yéenyu obucha no obuchiile. 16 Niindwoongéla oluzáalo lwáawe lúbe lwíinzi nko omusényi. Táliho omuuntu alihicha kulúpeeta oluzáalo lwáawe. 17 Ozeénde, oyeeléle éensi éezi, oleebe obugazi no obula bwaáyo habwo kuba niinkuha éensi éezi.”
18 Niho Abramu kufulula enkáambíye, no kuza kwoómbeka ahamizure za Maámule héehi ne echikaali cha Hebulóoni. Óokwo yaamwoómbekela itaámbilo lya amabáale Omukáma Múungu.