Okweetwa Kwa Abramu Na Múungu
12
1 Omukáma Múungu akagaambila Abramu, “Léka eéka ya iíso na badugu baawe bóona, lúga omuchaalo chaawe, zeénda omúunsi eéndi eyoóndikwooleka.2-3 “Ndyaákukóla íiwe obe omuzéele wo olugaanda luháango bwooli omúunsi, no kukola izíina lyaawe likumuúke obe omugisa habáandi. Ndyaákufúuha, no kulabila hali íiwe engaanda zóona ze éensi zilyaáfuuhwa. Niimbafúuha abalikukufúuha, na niimbachéena abalikukucheena.”
4 Áaho Abramu yaalugáho nkokwo Omukáma Múungu yaamulagíile, yaazeenda hamo na Lúutu. (Obuchilo Abramu naaluga Haráani, akaba ayine emyáaka makúmi musáanzu ne itáanu.) 5 Omuluzeendo óolwo Abramu yaátwáala mukazíwe Sarái, Lúutu, omwaana wa mweenewáabo, ebiintu byáabo byóona hamo na bazaana, áabo babeehile óokwo Haráani. Bóona baázeenda baáhika omúunsi ya Kanáani. 6 Abramu yaázeendelela oluzeendólwe omúunsi omwo, yaahika echibaanza cha Móore echiina omuti muháango nko omuzule, omuchaalo cha Shekeemu. (Obuchilo óobwo, Abakanáani bakaba bali abatúuzi bo óokwo.) 7 Niho Omukáma Múungu kumwiizáho Abramu no kumugaambila, “Éensi éezi ndyaábaha oluzáalo lwáawe.” Áaho Abramu yaamwoómbekela itaámbilo lya amabáale Omukáma ayaamwiísululukiize.
8 Mála Abramu yaazeenda nyakaziinzákazi, yaayoómbeka enkáambi omuchaalo cha mabaanga ahagáti ya Betéeli olubazu lwo obugwa na Ayi olubazu lwo obutúluka. Óokwo náho yaamwoómbekela Omukáma Múungu itaámbilo lya amabáale, yaámuheéleza omukumulámya Múungu. 9 Kulugiilila áaho Abramu yaázeendelela kufúluka fuluka kwoólekela olubazu lwa nyakaziinzákazi omúunsi ya Kanáani.
Abramu Ali Omúunsi Ya Miísiri
10 Obuchilo óobwo éensi yáabo ekataahwaamo iífwa. Habwéecho, Abramu yeelukila nyakaziinzákazi kwoólekela omúunsi ya Miísiri kutúula óokwo omwáanya múche habwo kuba iífwa eli likaba lili liháango. 11 Káyeeliile héehi na Miísiri yaagaambila mukazíwe Sarái, “Niimmanya nkokwo oli omukázi muluunzi múno. 12 Abamiísiri kábalaakubóna nibagaámba, ‘Óogu ni mukazíwe! Tumwíite tubóne kumutwáala óogu omukázi!’ 13 Niinkusába obamanyíse nkokwo íiwe oli munyaányeenye,a babone kunkwáata kuzima. Bataákunyita habwaáwe habwo kuba nibakuligíla.”
14 Áaho Abramu na Sarái kábaahikile omúunsi ya Miísiri abaantu bo óokwo baábona nkokwo Sarái no mukázi muluunzi múno. 15 Abakulu ba hachikaali cha Faráo, ali omukáma wa Miísiri, kábaamubweene Sarái nkokwo ali muluunzi, baázeenda, baálaangaana obuluunzíbwe hali Faráo. Mála baámutwáala Sarái hachikaali cha Faráo. 16 Habwa Sarái, Faráo yaamukólela Abramu ifubo líinzi, yaámuha entaama, ente, ensíkili ne entwaangabuleende, abazáana na abazánakazi.
17 Kwoónka Omukáma Múungu yaábaleétela amalwáala go kusobeza bwooli Faráo na abaantu be chikaalíche habwo kuba Faráo yaámutwáala Sarái, ali muka Abramu. 18 Níkwo Faráo kumwéeta Abramu no kumubúuza asáayile, “Onkoliile ihanóchi eli? Habwaáchi tolaángaambiile nkokwo Sarái ni mukázi waawe? 19 Habwaáchi ogaambíle nkokwo óogu ni munyaányoko kuhicha iinye kumutwáala abe mukaanze? Mbweenu óobu, twaála mukáawe ngúgu, lugaho áaha!” 20 Mála Faráo yaábalagila abalwaanila ngoma boomwe bábaseéndekeleze Abramu, mukazíwe, hamo ne ebiintúbye byóona kuluga omúunsi ya Miísiri.