Omunala Gwa Babéeli
11
1 Obuchilo batakasaámbeele abaantu be éensi yóona bakaba beene akagaambile ko lulimi lúmo olukaba nilusoomboókelwa na bóona. 2 Áaho abaantu kábaafulukile kuluga olubazu lwo obutúlukaa baáhika omuumbúga ya Babilooni,b baatuula óokwo.3 Mála beégaambila baáti, “Ilóoko! Mwiíze tubuúmbe amatofáali, tugoóche kuzima omumulilo.” Batyo, baaba na amatofáali ha mwáanya gwa amabáale ne eláami elíkulamata ha mwáanya gwi búumba lyo kwoómbekesa amatofáali. 4 Kaandi beégaambila hakweésiingiza, “Tweéyoombekéla echikaali no omunala ogwiina ensoondasoonde elihika omwiigulu, izíina lyéetu libone kumanyiika no kukúmuuka. Echikaali éecho chilyaátuleetela kwiikobya tutaákwiiza tukasaámbaala omúunsi yóona.”
5 Náho Omukáma Múungu yaahanaantúka ahaansi kwiiza kubona echikaali no omunala óogwo abaantu baabele niboombéka. 6 Omukáma Múungu yaágaamba aáti, “Leeba, abaantu áaba ne embága eémo na bóona nibagaámba olulimi lúmo, óobu éezi ne entaándikilo kwoónka ye ebikolwa byáabo. Mbweenu óobu nibahicha kukola choóna chóona éecho balikweenda.
7 “Ilóoko, tutuúke óokwo ahaansi tusóbye olulimi lwáabo bataákuhulilana no obuche bwa kati.” 8 Níkwo Omukáma Múungu kubasaámbaza kulugiilila óokwo omúunsi yóona, nabo baálekela kwoómbeka éecho chikaali. 9 Echikaali éecho chaayétwa Babéeli (ensoonga, “Omusóbyo”) habwo kuba áaho niho Omukáma Múungu yaasobesiize olulimi lwe éensi yóona. Kulugiilila áaho Omukáma Múungu yaábasaámbaza hóona omúunsi.
Oluzáalo Kutaándikila Shéemu Kuhika Abramu
10 Óolu nílwo oluzáalo lwa Shéemu. Shéemu káyaahikize emyáaka igána límo, yaazáala Alifakisáadi. Obuchilo óobwo ekaba yaahiíngwiile emyáaka ibili, enzula ne enzwéelo zo kwiikisa éensi zaálekiile. 11 Káyaabeele yaamuzéele Alifakisáadi, Shéemu yaázeendelela kulama emyáaka eéndi magána atáanu no omubuchilo óobwo, yaazáala abaana abáandi abo obukwaáta na abo buhalákazi. 12 Alifakisáadi káyaabeele ayine emyáaka makúmi ásatu ne itáanu akazáala Shéela. 13 Alifakisáadi yaaguma kulama emyáaka eéndi magána aána ne ésatu (403) no omubuchilo óobwo, yaazáala abaana abáandi abo obukwaáta na abo obuhalákazi.
14 Shéela káyaabeele ayine emyáaka makúmi ásatu akazáala Ebéeri. 15 Shéela yaázeendelela kulama emyáaka eéndi magána aána ne ésatu no omubuchilo óobwo, yaazáala abaana abáandi abo obukwaáta na abo obuhalákazi.
16 Ebéeri káyaabeele ayine emyáaka makúmi ásatu ne iína, akazáala Pelegi. 17 Ebéeri yaaguma kulama emyáaka eéndi magána aána na makúmi ásatu (430) no omubuchilo óobwo, yaazáala abaana abáandi abo obukwaáta na abo obuhalákazi.
18 Pelegi káyaabeele ayine emyáaka makúmi ásatu, akazáala Reu. 19 Pelegi yaázeendelela kulama emyáaka eéndi magána ábili na mwéenda (209) no omubuchilo óobwo, yaazáala abaana abáandi abo obukwaáta na abo obuhalákazi.
20 Rehu káyaabeele ayine emyáaka makúmi ásatu ne ibili, akazáala Serúugi. 21 Rehu yaaguma kulama emyáaka eéndi magána ábili na musáanzu (207) no omubuchilo óobwo, yaazáala abaana abáandi abo obukwaáta na abo obuhalákazi.
22 Serúugi káyaabeele ayine emyáaka makúmi ásatu, akazáala Nahóori. 23 Serúugi yaázeendelela kulama emyáaka eéndi magána ábili (200) no omubuchilo óobwo, yaazáala abaana abáandi abo obukwaáta na abo obuhalákazi.
24 Nahóori káyaabeele ayine emyáaka makúmi ábili na mwéenda, akazáala Téera. 25 Nahóori yaaguma kulama emyáaka eéndi igána límo ne ikúmi na mwéenda (119) no omubuchilo óobwo, yaazáala abaana abáandi abo obukwaáta na abo buhalákazi.
26 Téera káyaabeele ayine emyáaka makúmi musaanzu, yaazáala Abramu, Nahóori na Haráani.
Oluzáalo Lwa Téera
27 Éezi nizo empola zo oluzáalo lwa Téera, isébo Abramu, Nahóori na Haráani. Haráani yaazáala Lúutu. 28 Haráani yaafweela omuchaalo cha Uri cha Abakalidáyo, omwo niho Haráani yaazaáliilwe, obuchilo Téera, ali iíse, achaátuula. 29 Abramu na Nahóori bakaswéela. Muka Abramu akaba naayetwa Sarái, na muka Nahóori akaba naayetwa Milika. Haráani akaba ali iíse wa Milika na Isika. 30 Sarái akaba atákazaálaga habwo kuba akaba ali omuguumba.
31 Téera yaámutwáala omutábani ali Abramu, na Lúutu omwiízukulu ali omwaana wa Haráani, na Sarái muka Abramu, bóona hamo baaluga omuchaalo cha Uri cha Abakalidáyo kwoólekela omuchaalo cha Kanáani. Náho kábaahikile omuchaalo chilikwéetwa Haráani, baatuula omwo.
32 Téera akafweela Haráani ayine emyáaka magána ábili ne itáanu (205).