Ɨkalata jya vɨɨlɨ jya
Yohana
1
1 Ɨkalata ɨjɨ jɨhʉmile kwane,
ʉne ndɨ ndyakoni mu mpelela.
Ndikʉkʉvɨgɨla ʉve vɨ jyʉvaa vɨ ʉNgʉlʉve akʉhalile,
paninie na vaana vaako ʉwʉ ndɨvaganile nɨ numbula jyoni.
Nakwʉ kʉta ndɨlɨ jyʉne ndɨ mwene ndɨ ndɨvaganile ʉnyie,
apeene naveene avaanu avange vooni ʉwʉ vavʉmanyile ʉwajɨlweli wa Livangɨli.
2 Tʉvaganile ʉlwakʉva ʉwe nʉʉnyie tʉvʉmanyile ʉwajɨlweli ʉwa,
ikange tugendelelaga ʉkʉvʉmanya sikutsooni.
3 ɄNgʉlʉve ʉDaada nʉ Mwana va mwene ʉYɨɨsʉ Kɨlɨsiti,
vatʉpeetsage ʉlʉhʉngʉ,
vave nɨ kɨsa kwawe nʉ kʉtʉtanga tʉtaamage nʉ lʉnotsehetso pa kʉvʉkonga ʉwajɨlweli na pa kʉganana.
Ʉwajɨlweli nʉ lʉgano
4 Ndɨkahowiike siitso,
wʉ ndipʉlɨka ʉkʉta avaana vaako vaninie vitaama mu wajɨlweli,
ndʉwʉ ʉDaada ʉNgʉlʉve aatʉlagye.
5 Pwʉ lɨno ʉve vɨ jyʉva vɨ nʼgane,
ndikʉkʉdoova ʉkʉta ʉkongage ʉlʉlagɨlo lʉlya ʉlwita tʉgananage.
Ʉlagɨlo ʉlwa nalʉpya,
apeene lʉʉlʉlya ʉlwʉ twale nalwo ʉkʉhʉma pa vʉtengʉlɨlo ʉpwʉ twɨɨdiike. b
6 Ʉlʉgano lwa jɨlweli luvoneka pa kʉkonga indagɨlo tsa Ngʉlʉve.
Ndʉwʉ mwapʉliike ʉkʉhʉma pa vʉtengʉlɨlo,
ʉlʉlagɨlo lwa mwene lwita mutaamage muganiine.
Avɨɨdɨki valekage ʉkʉvʉʉpɨlɨla avamanyisi va vʉnuasi
7 Nditsova ewo ʉlwakʉva avasyovi vongosu vahʉmye mu kɨlʉnga ʉwʉ vimanyiisa itsa vʉnuasi.
Avaanu avo navikwɨdɨka ʉkʉta ʉYɨɨsʉ vɨ Kɨlɨsiti,
iitsile akava nʉ mmana ndʉ muunu.
c Lɨno ʉmuunu ʉvɨ imanyiisa ewo,
insyovi ikange vɨ ndʉgʉ va Kɨlɨsiti.d
8 Pwʉ mwɨlolelage avaanu avo valeke ʉkʉvasyova,
manya ɨmbombo jiitu ɨjyʉ tʉmbombye ʉNgʉlʉve jɨgela jijaga pavʉvʉle.
Ʉnyie muveetsage nʉ lwʉtsi pakʉta ʉNgʉlʉve iitse avape ʉlwokelo ʉlʉnogelanie.
9 Ʉmuunu ʉvaveetsaga ʉvimanyiisa imanyiiso itsilekengʼiine ni tsa Kɨlɨsiti,
iita ʉkʉleka ʉkʉgendelela ʉkwibata tsilya itsʉ atʉmanyiise ʉKɨlɨsiti,
ʉjwa nalɨ nawo ʉvʉhange nʉ Ngʉlʉve.
Apeene,
ʉvaveetsaga ʉvɨ igendelela ʉkwibata imanyiiso tsa Kɨlɨsiti,
ʉjwa vɨ alɨ nʉ vʉhange nʉ Ngʉlʉve ʉDaada nʉ Mwana va mwene.
10 Ɨngave ʉmuunu ikwitsa kwanyie ʉvɨ nimanyiisa imanyiiso itso itsa Kɨlɨsiti,
mulekage ʉkʉmwʉpɨlɨla mu nyumba tsiinyo,
ikange mulekage ʉkʉnsaamusa ʉngata Nkɨlɨsitinʼjiinyo.
11 Lola,
ʉmuunu ʉvaveetsaga ʉvɨ ikʉnsaamusa ʉmuunu ʉjwa,
alɨ vʉhange nave mu mbiivi itsʉ ivomba.
Amamenyu ga vʉmalɨlo
12 Ndɨlɨ nago amamenyu mongosu ʉgwʉ ndɨkanogwagwa ʉkʉvavɨgɨla,
lɨno nandinogwa ʉkʉvɨga ago nʉ wiino mu likalataasi.
Apeene,
ndihʉʉvɨla ʉkwitsa kwanyie kukʉvagendela nʉ kʉgatsova wʉ twagiine,
pwʉ jʉtuhekelaga siitso.
13 Avaana va mmaatsavo ʉvahalilwe nʉ Ngʉlʉve,
vikʉkʉsaamusa.