4
1 Lɨno vɨɨdɨkivajiitu,
mumanyie ʉkʉhʉma kwawe ʉmwʉ jinogela ʉkʉtaama ndʉwʉ ʉNgʉlʉve inogwa.
Tsa jɨlweli ewo wʉ mutaama.
Lɨno,
tukʉvadoova mu litaawa lya Ntwa ʉYɨɨsʉ twita,
siwo mugendelelage ʉkʉvomba vʉvʉle vʉle nʉ kʉlʉtɨɨlɨla,
2 manya mulʉmanyile vʉnonu galya ʉgwʉ twavalagye mu vʉtavʉlɨlwa wa Ntwa ʉYɨɨsʉ.
3 Vʉnogwe wa Ngʉlʉve ʉkʉta ʉnyie muve vavalatse,
ikange muvʉleke lwoni ʉvʉligu.
4 Ʉmuunu nʉ muunu mwanyie aloleelage ʉmmana gwa mwene,
mu vʉgolosu na mu wɨɨmɨkiwa.
5 Muleke ʉkʉva vapʉmu va vʉligu,
ndʉwʉ vivomba avanyapanzi ʉwʉ navammanyili ʉNgʉlʉve.
6 Mwɨlyo,
ʉmuunu ʉvaveetsaga aleke ʉkʉgalʉka kʉ mwɨdɨkinnine,
pange ʉkʉnsyova,
ndʉwʉ twavavʉʉlile nʉ kʉvavʉnga ʉkʉta,
vooni ʉwʉ vivomba ago valahɨgwa nʉ Ntwa.
7 Lola,
ʉNgʉlʉve natwɨlangiili ʉvʉligu,
apeene atwɨlangile pakʉta tʉtaamage mu vʉgolosu.
8 Lɨno ʉmuunu ʉvaveetsaga ʉvɨ ibeela imanyiiso itsi,
nakaave ikʉmʼbeela ʉmuunu,
apeene iiva ikʉmʼbeela ʉNgʉlʉve,
ʉvikʉvapa ʉMepo ʉMbalatse va mwene.
9 Lɨno,
nakɨpali ɨkikʉtʉvɨɨka tʉvavɨgɨle ʉnyie ikulongwi tsa kʉta mugananage ʉlwakʉva mumanyiisiiwe nʉ Ngʉlʉve jyʉmwene ʉmwʉ kʉvanogye ʉkʉganana.
10 Jɨlweli,
ewo wʉ muvomba,
mukʉvagana avɨɨdɨkivajiinyo mu kɨlʉnga kyoni ɨkya Makedoniya.
Lɨno tukʉvadoova mugendelelage ʉkʉganana nʉ kʉlʉtɨɨlɨla.
11 Muve vaanu va kʉtaama mu lʉnotsehetso.
Ʉmuunu ʉvaveetsaga alolage ikulongwi tsa mwene,
nʉ kʉvomba jyʉmwene imbombo tsa mwene.
Aga gwʉ geene ʉgwʉ twavalagye ʉkʉta muvombage.
12 Apo mwiva muvonia ʉlʉgendo ʉlʉnonu pamiiho ga vatava vɨɨdɨki,
ikange namukaave vaanu avihʉʉvɨla isiinu sya vaanu avange.
Ʉgwʉ galahʉmɨla alaava ikwitsa ʉNtwa
13 Mwe vɨɨdɨkivajiitu,
tunogwa mulʉmanye ʉgwʉ galahʉmɨla kʉ vɨɨdɨki ʉwʉ vasue,
pakʉta mwɨlekelwe ʉkʉva nʉ lʉsʉsʉvalo nda vaanu avange avatsila lʉhʉʉvɨlo.
14 Ʉwe tʉlʉmanyile ʉkʉta ʉYɨɨsʉ aasue,
ikange aatsʉʉkile.
Mwɨlyo tʉlʉmanyile ʉkʉta ʉNgʉlʉve alavaleeta paninie nʉ Yɨɨsʉ avaanu vooni avaswɨlye mu lwɨdɨko.
15 Aga ʉgwʉ tukʉvavʉʉla tsʉ manyiiso tsa Yɨɨsʉ ʉkʉta,
ʉwe twɨ tʉlapitsiga vʉʉmi ʉnsɨkɨ alaava ikilivuka ʉNtwa ʉYɨɨsʉ,
natʉlavatalɨle avaswe pa kwaganila nave.
16 Lola,
ʉNtwa jyʉmwene aliika ʉkʉhʉma kʉkyanya nɨ nyɨlango,
nalyene ɨlimenyu lya nsuungʼwa ʉmbaha lɨlapʉlɨkɨka,
najɨ ngalape jya Ngʉlʉve jɨlakuutaga.
Vooni avaasue vikʉmwɨdɨka ʉKɨlɨsiti valatsʉʉka taasi.
17 Pwʉ ʉwe,
twɨ tʉpitsiige vʉʉmi,
paninie nʉ wʉ vatsʉʉsiiwe,
tʉlatoolwa mu mavɨngo pa kʉmwʉpɨlɨla ʉNtwa mu vʉtandaatse.
Pwʉ tʉlataamaga paninie nʉ Ntwa sikutsooni.
18 Lɨno mutseesaniage mu mamenyu ago.