Ʉkwɨsaavʉla pa kulongwi jya kwitsa ʉNtwa
5
1 Mwe vɨɨdɨkivajiitu,
ikange nakɨpali ɨkikʉtʉvɨɨka tʉvavɨgɨle ʉnyie ikulongwi tsa nsɨkɨ gwa kwitsa ʉNtwa,
2 manya ʉnyie mulʉmanyile ʉkʉta ɨkɨgono kya kʉkilivuka ʉNtwa ʉYɨɨsʉ mu kɨlʉnga,
kɨlaava kya lʉkenyemuko ndʉwʉ ʉmmɨɨtsi ikwitsa kuhɨɨtsa pakɨlo.
3 Ʉnsɨkɨ avaanu ʉpwʉ valateetsaga,
“Tʉlɨ nʉ lʉnotsehetso,
ikange kʉtsila ligoha,”
apo pwʉ ʉlwongometso lʉlaviitsila kɨtsila kwɨsaavʉla.
Ʉlwongometso ʉlwa lʉlahwanana ndʉ lʉvavo lwa kʉhola ʉmwana ʉwʉ lukʉmwitsila ʉkɨjyʉva ʉnya vʉtsito.
Mu kɨgono ɨkyo navaladyege.
4 Lɨno ʉnyie vɨɨdɨkivajiitu,
ʉlwakʉva namumuli mu ngʼiisi,
ɨkɨgono ɨkyo nakɨlavakenyemule ndʉ mmɨɨtsi.
5 Ʉnyie nyɨ vooni mulɨ vaana va lʉmuli,
vaana va muunyi.
a Ʉwe twɨ vɨɨdɨki natʉlɨ vaanu va pakɨlo,
evo va ngʼiisi.
6 Tʉleke ʉkʉva nda vange ʉwʉ vigoneelela,
apeene tʉve miiho nʉ kʉva nʉ vʉmuunu,
7 manya ʉwʉ vigoneelela,
vigoneelela pakɨlo,
nʉ wʉ vigaala,
vigaala pakɨlo.b
8 Lɨno ʉlwakʉva tʉlɨ vaanu va lʉmuli,
pwʉ tʉve nʉ vʉmuunu,
tʉve nʉ lwɨdɨko kwa Yɨɨsʉ,
nʉ lʉgano kʉ vaanu,
ikange tʉve vaanu avihʉʉvɨla ʉvʉpoki ʉwihʉma kwa Ngʉlʉve,
tʉve ndʉ nsikali ʉvɨ aswalile ɨkɨɨnu ɨkya kʉsiga ɨkɨpambaga kya mwene nɨ kɨtili kya kyʉma kʉ ntwe.
9 Lola,
ʉNgʉlʉve naatʉhale ʉwe pakʉta twongometsiwe nʉ lʉviipo lwa mwene,
apeene aasaagile ʉkʉta tʉkave ʉvʉpoki ʉkʉgendela mu Ntwa viitu ʉYɨɨsʉ Kɨlɨsiti,
10 ʉvɨ aasue kʉ nongwa jyawe,
pakʉta tʉve paninie nʉ mwene,
tʉve vʉʉmi evo tʉve tʉsue.
11 Lɨno mugendelelage ʉkʉtseesania nʉ kʉdʉlʉsania mu lwɨdɨko ndʉwʉ muvomba.
Ʉlʉgendo ʉlʉnogelanie mu kɨpʉga kya vɨɨdɨki
12 Lɨno vɨɨdɨkivajiitu,
tukʉvadoova muvɨɨmɨkage avaanu avivomba imbombo tsa Ntwa itsikʉvatanga ʉnyie,
ʉwʉ vaavo vikʉvalongotsa nʉ kʉvavʉnga.
13 Muvɨɨdɨkage siitso nʉ kʉvagana ʉkʉkongana nɨ mbombo jya veene.
Ikange mutaamage mu lʉnotsehetso nʉ jyʉnge kʉ nnine.
14 Mwe vɨɨdɨkivajiitu,
tukʉvadoova muvavʉngage avoolo,
muvanywilitsaage avadwatsi,
muvatangage avikɨlemwa.
Ikange muvasipilage avaanu vooni.
15 Mulolage vʉnonu ʉkʉta,
ʉmuunu ʉvaveetsaga nitavʉla kʉ nnine ʉvʉviivi ʉwʉ ambombye.
Apeene isigono syoni mwɨtangage ʉkʉvombelanila inonu nʉ jyʉnge kʉ nnine na kʉ vaanu vooni.
16 Muhekelage ʉnsɨkɨ gwoni,
17 ikange mwɨsajage kwa Ngʉlʉve kɨtsila kʉduga.
18 Munsaanage ʉNgʉlʉve kʉ gooni,
manya ago gwʉ geene ʉgwʉ ʉmwene inogwa mugendelelage ʉkʉvomba ndʉwʉ mwamanyie kwa Mesiya ʉYɨɨsʉ.
19 Kwʉ baako ʉkʉpepʉla ɨmbombo jya Mepo ʉMbalatse.
20 Ikange muleke ʉkʉbeda amalago.
21 Apeene mugagelage amalago gooni.
Ʉpɨlɨlagi amanonu,
22 nʉ kʉgabeela amaviivi.
23 ɄNgʉlʉve va lʉnotsehetso avavalatse.
Aloleele inumbula tsiinyo,
ʉwʉʉmi wiinyo,
nɨ mihana giinyo,
pakʉta sinogelanile ʉkʉsikila pa nsɨkɨ ʉpwʉ aliitsa ʉNtwa viitu ʉYɨɨsʉ Kɨlɨsiti.
24 ɄNgʉlʉve ʉvɨ ikʉvɨɨlanga,
jiikʉvavombela ago,
jɨlweli wʉ jiivomba.
Amamenyu ga kwɨlaga
25 Vɨɨdɨkivajiitu,
najyʉwe mutʉdoovelage kwa Ngʉlʉve.
26 Muvasaamuse avɨɨdɨkivajiitu vooni pa kɨpambaga.c
27 Ndikʉvalagɨla mu vʉtavʉlɨlwa wa Ntwa ʉkʉta,
muvɨmbɨle avɨɨdɨkivajiitu vooni ɨkalata ɨjɨ.
28 Ʉlʉhʉngʉ lwa Ntwa viitu ʉYɨɨsʉ Kɨlɨsiti,
lʉve nʉʉnyie.