ɄTimoti isuungʼwa ʉkʉ kʉ Tesalonike
3
1 Kʉmbele,
wʉ tʉweene tʉlemilwe ʉkʉsipa,
ʉlwakʉva natwagamanye ʉgwʉ gaavombekaga ʉkwa,
tʉkalamula tʉsigale twɨ veene kʉ Atene.
2 Tʉkansuungʼa ʉTimoti,
ʉmwɨdɨkinʼjiitu,
ʉmbombinʼjiitu va Ngʉlʉve mu kʉlʉmbɨlɨla ɨLivangɨli lya Yɨɨsʉ Kɨlɨsiti,
iitse kwanyie,
avanywilitse mu lwɨdɨko nʉ kʉvatseesa.
3 Twavombile ewo,
pakʉta ʉmuunu ʉvaveetsaga mwanyie aleke ʉkʉnyongʼonyoka amaka kʉ nongwa jya vʉkʉvɨlwa ʉvʉ.
Ʉnyie mulʉmanyile ʉkʉta,
wɨgane wa Ngʉlʉve ʉkʉta ʉwe twɨ vɨɨdɨki tʉve vaanu va kʉgendela mu vʉkʉvɨlwa.
4 Wʉ tʉlɨ nʉʉnyie,
twavavʉʉlaga ikulongwi tsa vʉkʉvɨlwa ʉwaale pa kʉtwitsila,
lɨno ndʉwʉ mulʉmanyile,
wʉ jɨlɨwo,
tʉlɨ mu vʉkʉvɨlwa.
5 Lola,
mu nsɨkɨ gʉlya wʉ ndɨlemilwe ʉkʉsipa,
ndyansuungʼile ʉTimoti,
pakʉta ndɨlʉmanye ikulongwi tsa lwɨdɨko lwinyo.
Ndyavombile ewo ʉlwakʉva,
ndyasaagaga ʉkʉta ipange ʉSetano ʉnʼgelingelo,
avagelile nʉ kʉvagwisa.
Pwʉ ɨmbombo jiitu ɨjyʉ twavombile kwanyie,
jyale jiveetsaga jɨvʉla lʉvʉmbʉlɨlo.
Ikulongwi inonu tsa Vatesalonike
6 Lɨno ʉTimoti itsile ʉkʉhʉma kwanyie,
atʉvʉʉlile ikulongwi inonu tsa lwɨdɨko nʉ lʉgano lwinyo.
Atʉvʉʉlile ʉkʉta ɨkɨgono nɨ kɨgono mukʉtʉkʉmbʉka kʉ lʉhekelo,
ikange mulɨ nʉ vʉsʉʉkwa wa kwaganila nʉʉwe,
ndʉwʉ nʉʉwe tʉlɨ nʉ vʉsʉʉkwa wa kwaganila nʉʉnyie.
7 Pwʉ lɨno vɨɨdɨkivajiitu,
ikulongwi tsa lwɨdɨko lwinyo,
tsitʉtseesiitse mu vʉkʉvɨlwa wiitu wooni.
8 Wʉ twivona ʉnyie munywilye kʉ Ntwa ʉYɨɨsʉ,
ʉwe tukɨpʉlɨka valegeesu mu wʉʉmi wiitu.
9 Lɨno tʉnsaane ndeeti ʉNgʉlʉve pa kulongwi jyanyie?
Tʉlɨ nʉ lʉhekelo ʉlʉlʉti pamiiho ga mwene pa kulongwi jyanyie.
10 Pakɨlo na pamuunyi tukʉnʼdoova siitso ʉNgʉlʉve,
pakʉta atʉtange twitse kwanyie kukʉvatanga agakeepile mu lwɨdɨko lwinyo.
11 Lɨno tukʉnʼdoova ʉNgʉlʉve,
ʉDadajiitu,
nʉ Yɨɨsʉ ʉNtwa viitu,
atʉdɨndʉlɨle ɨnzɨla tʉsike kwanyie.
12 ɄNtwa avape ʉkʉganana siitso,
nʉ kʉvagana avaanu avange vooni,
ndʉwʉ ʉwe tʉvaganile ʉnyie.
13 Ikange avakangatsaage inumbula tsiinyo,
pakʉta muve vagolosu,
kɨtsila vʉgalo pamiiho pa Ngʉlʉve ʉDadajiitu,
ʉkʉsika ʉpwʉ aliitsa ʉNtwa viitu ʉYɨɨsʉ paninie na vavalatse va mwene vooni.