Ɨmbombo jya Paulo ʉkʉ kʉ Tesalonike
2
1 Vɨɨdɨkivajiitu,
ʉnyie nyɨ veene mulʉmanyile ʉkʉta ʉkwitsa ʉwe kwanyie,
nakwale kɨtsila lʉvʉmbʉlɨlo.
2 Ikange mulʉmanyile ʉkʉta wʉ natʉsiiki kwanyie,
twakʉviilwe nʉ kʉdʉkwa mu vʉtsenge vʉlya ʉwa Filipi.
Ndajɨve ewo,
ʉNgʉlʉve aatʉpye amaka ga kʉlʉmbɨlɨla ɨLivangɨli lya mwene kwanyie,
nʉpwʉ jɨngave nakʉ kwanyie vaalekwo avaatʉsigaga.
3 Lola,
ʉpwʉ twalʉmbɨlye kwanyie,
natwasumbwe ʉkʉvasyova,
pange ʉkʉvakolelania,
pange ʉkʉvatekeletsa,
4 apeene twalʉmbɨlɨlaga ʉlwakʉva ʉNgʉlʉve aatʉweene ʉkʉta tʉnogelanie ʉkʉlʉmbɨlɨla ɨLivangɨli.
Lɨno ʉvʉsumbe wiitu,
nawa kʉvahovosa avaanu,
apeene ʉkʉlʉmbɨlɨla ʉgwʉ ʉNgʉlʉve inogwa,
ʉlwakʉva vɨ mwene ʉvɨ alʉmanyile tsyoni,
itsilɨ mu nʼgati mu numbula tsiitu.
5 Ɨlɨnge mulʉmanyile ʉkʉta,
natwatsovage amamenyu pakʉta ʉnyie mutʉgane ʉwe,
evo ʉkwʉva pa kulongwi ɨjɨveetsaga pakʉta mwʉ tʉkavɨle ɨkyʉma.
ɄNgʉlʉve alʉmanyile ʉkʉta ʉgwʉ twitsova ga jɨlweli.
6 Ikange natwanogwe avaanu vatʉginie,
jɨve nyienye,
evo avaanu avange,
7 nʉpwʉ jɨngave paatʉnogye ʉkʉtsigila isiinu sininie kwanyie,
ʉlwakʉva ʉwe tʉlɨ vapositili va Kɨlɨsiti.
Apeene twale vadeke kwanyie ndʉ jyʉva ʉvɨ ilela avaana va mwene.
8 Lɨno,
ʉlwakʉva twavaganile siitso,
natwavone lʉnonu kwene ʉkʉvavʉʉla ɨLivangɨli ʉkʉhʉma kwa Ngʉlʉve,
apeene twatye nʉ kʉhʉmya ʉnsɨkɨ gwitu kʉ numbula jyoni pa kʉvomba tsyoni itsʉ tsinogye ʉkʉvatanga,
manya mulɨ vagane viitu jɨlweli.
9 Vɨɨdɨkivajiitu!
Mukʉmbʉka ʉmwʉ twagimbilaga ʉkʉvomba imbombo nʉ vʉpala ʉwaalepwo.
Twavombaga pakɨlo na pamuunyi,
pakʉta tʉleke ʉkʉva ntsigo kʉ muunu ʉvaveetsaga kwanyie,
ʉnsɨkɨ ʉpwʉ twalʉmbɨlɨlaga kwanyie ɨLivangɨli ʉkʉhʉma kwa Ngʉlʉve.
10 Ʉnyie mulʉmanyile,
namwene ʉNgʉlʉve alʉmanyile,
ʉkʉta ʉnsɨkɨ tʉlɨ kwanyie nyɨ vɨɨdɨki,
ʉlʉgendo lwitu lwale lʉvalatse,
twakongaga ʉvʉgolosu,
natwatsowaagwe ʉvʉviivi ʉvʉveetsaga.
11 Ikange mulʉmanyile ʉkʉta twambombye ʉvʉnonu mpamato mpamato mwanyie ndʉwʉ ʉdaada ikʉvavombela avaana va mwene.
12 Twavanywilitsaaga inumbula,
twavatseesaaga,
nʉ kʉvasimiilitsa ʉkʉta,
muleke ʉkʉgatala ʉkʉkonga itsʉ ʉNgʉlʉve inogwa.
ɄNgʉlʉve ʉjwa vɨ mwene ikʉvɨɨlanga,
mwingile mu Lʉdeeva na mu wɨɨmɨkiwa wa mwene.
13 Ikange ʉnsɨkɨ mwongosu tukʉnsaana ʉNgʉlʉve ʉlwakʉva palya ʉpwʉ mwʉʉpɨlye ɨlimenyu lya mwene ʉkʉhʉma kwawe,
namwʉpɨlɨle ɨlimenyu lya muunu,
apeene mwʉʉpɨlye ɨlimenyu lya Ngʉlʉve ʉva jɨlweli.
Ɨlimenyu ɨlyo lyʉ lyene livomba ɨmbombo nʼgati mu numbula tsiinyo ʉnyie nyɨ vɨɨdɨki.
14 Vɨɨdɨkivajiitu,
mwakʉviilwe na vaanu va kʉ miinyo,
ndʉwʉ ɨmipelela gya Mesiya ʉYɨɨsʉ gya kʉ Yuuda gyakʉviilwe na Vayahudivajyavo.
15 AVayahudi avo,
wʉ vaavo vaamʼbudile ʉNtwa ʉYɨɨsʉ,
vaavabudile na vanyamalago,
ikange wʉ veene vatʉpelye najyʉwe ʉvʉkʉvɨlwa ʉvʉlʉti.
Avaanu avo,
vikʉmbipitsa ʉNgʉlʉve,
ikange valʉgʉ va vaanu vooni.
16 Avo vikɨkupila ʉkʉdumulila tʉleke ʉkʉlʉmbɨlɨla ɨLivangɨli lya Yɨɨsʉ Kɨlɨsiti kʉ vaanu avatava Vaisilahɨli.
ƗLivangɨli ɨlyo lyʉ lɨkaale likʉvapoka.
AVayahudi avo vagendelye ʉkwongeletsa ʉvʉtulanongwa.
Napeene,
ʉlʉviipo lwa Ngʉlʉve lʉvasikye!
ɄPaulo inogwa ʉkwaganila na Vatesalonike
17 Lɨno mwe vɨɨdɨkivajiitu,
palya ʉpwʉ twʉʉmɨɨliitswe ʉkʉlekengʼana nʉʉnyie pa nsɨkɨ gʉlya ʉnsupi,
twalekengʼiine kɨmmana,
apeene inumbula tsiitu tsyale paninie nʉʉnyie.
Ʉnsɨkɨ gwoni ʉgwa,
twale nʉ vʉsʉʉkwa wa kwaganila nʉʉnyie.
18 Twanogilwe ʉkwitsa kwanyie,
siitso ʉne ndɨ Paulo,
kakongosu ndyanogilwe ʉkwitsa ʉkwa,
lɨno ʉSetano aatʉsigile.
19 Lola,
ʉnyie nyienye nyɨ mulatʉvɨɨka ʉwe tʉve nɨ nyʉʉve,
nʉ lʉhekelo,
nʉ lʉdingʼulilo lwa kwɨginihitsa pavʉlongolo pa Ntwa viitu ʉYɨɨsʉ,
alaava ikwitsa.
20 Tsa jɨlweli,
ʉnyie nyienye mukʉtʉvɨɨka tʉve nʉ lwɨginio nʉ lʉhekelo.