Ɨkalata ɨnatsi jya Paulo
kʉ Vatesalonike
Ʉlʉpembetso
1
1 Ʉne ndɨ Paulo paninie nʉ Silwania nʉ Timoti,
tukʉvavɨgɨla nyɨ vampelela nyɨ mukʉmwɨdɨka ʉNgʉlʉve ʉDaada nʉ Ntwa ʉYɨɨsʉ Kɨlɨsiti,
nyɨ mulɨ mu vʉtsenge wa Tesalonike.
Ʉlʉhʉngʉ nʉ lʉnotsehetso siveetsage nʉʉnyie.
Ʉlwɨdɨko lwa Vatesalonike
2 Tukʉnsaana ʉNgʉlʉve isigono syoni pa kulongwi jyanyie ʉnyie nyɨ vooni.
Ikange tukʉvadoovela kʉ mwene kɨtsila kʉgatala,
3 manya pamiiho pa Ngʉlʉve,
tukʉmbʉka ɨmbombo ɨjyʉ muvomba mu lwɨdɨko,
ʉkʉgimba kwinyo mu lʉgano,
nʉ vʉkangasu wa lʉhʉʉvɨlo lwinyo kʉ Ntwa viitu ʉYɨɨsʉ Kɨlɨsiti.
4 Vɨɨdɨkivajiitu,
ʉnyie nyɨ ʉNgʉlʉve avaganile,
tʉlʉmanyile ʉkʉta ʉNgʉlʉve avahalile ʉkʉva vaanu va mwene
5 ʉlwakʉva ʉnsɨkɨ ʉpwʉ twalʉmbɨlɨlaga kwanyie ɨLivangɨli,
natwalʉmbɨlɨlage kʉ mamenyu geene,
apeene kʉ maka na mu lʉtangɨlo lwa Mepo ʉMbalatse,
ikange twɨdɨkaga siitso ʉkʉta itsʉ twalʉmbɨlɨlaga tsyale tsa lweli.
Mulʉmanyile vʉnonu ʉmwʉ twataamilaga paninie nʉʉnyie,
pa vʉsumbe wa kʉvatanga ʉnyie.
6 Ndajɨve mwakʉvɨlwagwa kʉ nongwa jya lwɨdɨko lwinyo,
ʉnyie mwʉʉpɨlye ɨkulongwi ɨjyo kʉ lʉhekelo ʉlwihʉma kʉ Mepo ʉMbalatse,
mukɨɨgɨlɨla kwawe na kʉ Ntwa.
7 Lɨno,
ʉnyie mulɨ kɨhwananitso kɨnonu,
kʉ vɨɨdɨki vooni va mu mpandʉlʉ gwa Makedoniya nʉ gwa Akaya.
8 Ʉkʉhʉma kwanyie,
avaanu vapʉliike ikulongwi tsa Ntwa,
nakwʉ kʉta vapʉliike avaanu va mipandʉlʉ ɨgyo gɨvɨlɨ gyene,
apeene ʉlwɨdɨko lwinyo kwa Ngʉlʉve lʉmanyikiike imbasu tsyoni.
Mwɨlyo ʉwe natʉkɨgatatse ʉkʉta tʉvuje ikange tʉtsovage ɨkulongwi jya lwɨdɨko lwinyo.
9 Kwoni ʉkwʉ twilʉta,
avaanu vipanga ʉmwʉ ʉnyie mwatwʉpɨlye ʉwe ʉnsɨkɨ ʉgwʉ twiitsile kwanyie.
Ikange vipanga ʉmwʉ ʉnyie mwagɨlekye ɨmingʉlʉve giinyo nʉ kʉmwɨdɨka ʉNgʉlʉve,
pakʉta mumbombelage ʉmwene ʉvɨ mwʉmi,
ikange va jɨlweli.
10 Ikange vipanga ʉmwʉ mukʉmpʉlɨkɨlɨla ʉYɨɨsʉ Kɨlɨsiti,
ʉMwana va mwene,
ʉkʉhʉma kʉkyanya,
ʉvɨ antsʉʉsiitse ʉkʉhʉma kʉ vaswe.
Ʉjwa vɨ mwene ʉnya kʉtʉpoka mu lʉviipo lwa Ngʉlʉve ʉlukwitsa.