Valooma 9

ɄPaulo ivawa na vahalwa va Ngʉlʉve aVaisilahɨli

1 Nditsova ʉwajɨlweli weene, ndɨ ndɨlɨ mwɨdɨki va Kɨlɨsiti. Ikange, ʉmwʉ ʉne ndikɨvonela ʉkwʉ kulongotsiwa nʉ Mepo ʉMbalatse, kukʉmbʉʉla ʉkʉta nanditsova ʉvʉnuasi. 2 Jɨlweli, ʉne ndɨlɨ nʉ lʉsʉsʉvalo siitso nʉ lʉvavo ʉlʉnalwisila mu numbula 3 kʉ nongwa jya vaanu va kɨvʉmbʉkʉ kyango. Lola, vʉkaale vʉve wɨgane wango, ʉne jyʉne ndɨkaale ndikwɨdɨka ʉkʉkootolwa nʉ kʉtengwa nʉ Kɨlɨsiti, kʉngave ʉkʉvomba ewo, kʉkaale kukʉvavɨɨka avalʉkololwango avo vamwɨdɨke ʉKɨlɨsiti. 4 Avo wʉ Vaisilahɨli, ʉwʉ ʉNgʉlʉve aavavɨɨkile vave vaana va mwene, akavavonia ʉwɨɨmɨkiwa wa mwene nʉ kʉvɨɨka inyɨdɨngʼano navo. Ikange akavapa indagɨlo tsa mwene, isingano tsa mwene, nʉ mwʉ kʉnogye ʉkwɨsaja kʉ mwene. 5 Avo aVaisilahɨli wʉ vitsʉkʉlʉ va Abulahamu, va Isaka nʉ Yakobo. Kɨvʉmuunu, najyʉ Kɨlɨsiti nya Isilahɨli, vɨ Ngʉlʉve ʉNdʉti va syoni, aginiwaagwe sikutsooni na sikutsooni! Ameni.

6 Napeene, nandiita ʉNgʉlʉve aalemilwe ʉkʉpʉgʉla ʉlwɨjyɨgo lwa mwene kʉ Vaisilahɨli. Baako! Manya navooni ʉwʉ kyʉ kɨvʉmbʉkʉ kya Isilahɨli vahalwa va Ngʉlʉve, 7 pange nakwʉ kʉta ʉlʉjungu lwoni lwa Abulahamu wʉ vaana va jɨlweli va Abulahamu. Baako! Apeene, ʉNgʉlʉve aammʉʉviitse ʉAbulahamu akata, “Avaana va lʉjungu lwako valahʉma mwa Isaka.” 8 Ago ʉvʉganulu wa weene kwʉ kʉta, avaana va Ngʉlʉve wʉ vaana va Abulahamu avaaholilwe ʉkʉkongana nʉ mwʉ ʉNgʉlʉve aammʉʉviitse ʉAbulahamu. Lɨno, avaana avaaholilwe ʉkʉkongana nʉ mwʉ aanogeliilwe ʉAbulahamu kɨmmana navivalɨlwa ʉkʉta wʉ vaana va Ngʉlʉve. 9 Manya ʉlʉhʉʉvɨtso lʉlwene lwita ndee, “Ndɨlakilivuka kʉ mwaka ʉnsɨkɨ ndʉʉgʉ, nʉ Sala alaava nʉ mwana ʉnʼdɨɨmi.”

10 Ikange nalɨ lɨɨlyo lyene, apeene namwene ʉLebeka aaholile nʉ kʉkʉjiitu ʉIsaka, avaana vavɨlɨ avanyavʉngʉngʉ. 11-12 Napeene, wʉ vakaanale ʉkʉholwa avanyavʉngʉngʉ avo, ikange wʉ navavombili ɨkɨveetsaga kɨve kɨnonu evo kɨviivi, ʉNgʉlʉve akambʉʉla ʉLebeka akata, “Ʉmbaha alambombelaga ʉnʼdebe.” Isi sivonia ʉkʉta ʉNgʉlʉve ihala ʉmuunu ʉkʉkongana nʉ vʉsumbe wa mwene ʉNgʉlʉve, najiiva ʉkʉkongana nʉ lʉgendo lwa muunu ʉlya. 13 Aga galɨngʼiine nʉ Vʉvɨge ʉVʉvalatse ʉwitsova ʉkʉta, “ɄYakobo ndyanʼganile, lɨno ʉEsau ndyamʼbeelile.”

ɄNgʉlʉve ivombela ʉmwanogeliilwe

14 Lɨno tʉte kɨki? Tʉte ʉNgʉlʉve nanʼgolosu? Baako! 15 Manya aambʉʉlile ʉMoose akata, “Ndiiva nʉ lʉhʉngʉ kʉ muunu ʉvɨ ndɨnogilwe ʉkʉva nʉ lʉhʉngʉ, ikange ndikʉmbonela ɨkɨsa ʉmuunu ʉvɨ ndɨnogilwe ʉkʉmbonela ɨkɨsa.” 16 Pwʉ lɨno, ʉNgʉlʉve vɨ ilamula ʉkʉva nʉ lʉhʉngʉ kʉ muunu, najiiva kwɨkupila nʉ kʉnogwa kwa muunu jyʉmwene. 17 Lola, mu Vʉvɨge ʉVʉvalatse ʉNgʉlʉve aambʉʉlile ʉFalao akata, “Ndyakʉvɨɨkile ʉve nkʉlʉdeeva pakʉta kʉ nzɨla jyave ndɨvavonie avaanu amaka gango, na pakʉta ɨlitaawa lyango lɨpʉlɨsiwaagwe mu kɨlʉnga kyoni.” 18 Pwʉ lɨno, tsilɨ pavʉvalasu ʉkʉta ʉNgʉlʉve ikʉmbonela ʉlʉhʉngʉ ʉmuunu ʉvaveetsaga ʉvɨ ʉNgʉlʉve ikʉnʼgana, nʉ kʉmpela ʉmuunu ʉjyʉnge ave nya matingo ndʉwʉ ʉNgʉlʉve inogwa.

19 Ipange jʉvukʉmbʉʉtsa, “Ɨngave wʉ jɨlɨwo, kɨki ʉNgʉlʉve ikʉtʉhɨga? Veeni ʉviweesa ʉkʉsiga ʉvʉnogwe wa Ngʉlʉve?” 20 Baako! Ʉve vɨ muunu ʉlɨ veeni pakʉta ʉveetsage va kʉgelana nʉ Ngʉlʉve? Ndeeti, ɨkɨɨnu ɨkɨpelilwe kiweesa ʉkʉgelana nʉ vakɨpelile nʉ kʉvʉʉtsa kɨte, “Kɨki waammelile ʉne ndavʉle?” 21 Jɨlweli ʉlʉmanyile, ʉmbʉmbi va sivya alɨ nʉ vʉtavʉlɨlwa wa kʉvombela ɨlidope ndʉwʉ inogwa. Iweesa ʉkʉvʉmba isivya sivɨlɨ ʉkʉhʉma ɨlidope lɨɨlyo lipamato: Ɨkɨvya kɨpamato kɨve kya mbombo jya wɨɨmɨkiwa, nɨ kɨnge kɨve kya mbombo jya vʉle vʉle.

22 Lɨno, ʉlwakʉva ʉNgʉlʉve aanogilwe ʉkʉvavonia avaanu ʉlʉviipo lwa mwene nʉ kʉvavonia amaka ga mwene, aavasipilye siitso valya ʉwʉ vavyʉta sivya, ʉwʉ aasaagile ʉkʉvavʉnga. 23-24 Ikange, ʉlwakʉva ʉNgʉlʉve aanogilwe ʉkʉtʉvonia ʉwɨɨmɨkiwa wa mwene ʉvʉlʉti, aatwomwe twɨ vooni, aVayahudi nʉ wʉ vatava Vayahudi, pakʉta atʉlɨlɨle ɨkɨsa, manya aatʉsaawe pakʉta tʉkave ʉwɨɨmɨkiwa paninie nʉ mwene. 25 Ɨkɨ kyʉ kɨɨnu ɨkyʉ ʉNgʉlʉve itsova mu kɨtabu kya nyamalago ʉHoseya iita,

“Aveene ʉwʉ nawʉ vaanu vango,

ndɨlavɨɨlanga ‘Vaanu vango.’

Avaanu ʉwʉ nandyavagane,

ndɨlavɨɨlanga, ‘Vaanu vango ʉwʉ ndɨvaganile.’ ”

26 Ikange,

“Apoonu apo ʉpwʉ aveene vaavʉʉlwagwa, ‘Ʉnyie namulɨ vango,’

pwʉ peene valɨlangwagwa, ‘Vaana va Ngʉlʉve ʉvɨ mwʉmi.’ ”

27 Namwene ʉnyamalago ʉYesaya iita ndee pa kulongwi jya Vaisilahɨli,

“Ndajɨve aVaisilahɨli valɨ vongosu ʉngata nsekelewe gwa lʉkanzimbale lwa nyanza,

napeene ʉwʉ valapokwa valɨ vadebe.

28 Manya ʉNtwa ʉNgʉlʉve alavapa ʉlʉvʉngʉ ʉlʉkwɨlanie mu kɨlʉnga ʉmʉ,

ikange alɨ piipi ʉkʉhɨgɨla ngʼaani avaanu va kɨlʉnga kyoni, ndʉwʉ aatsovile.”

29 Ndʉwʉ katale aatsovile ʉnyamalago ʉYesaya akata,

“Aale aleke ʉNtwa ʉNyamaka Gooni ʉkʉsigatsa ʉlʉjungu lwa Vaisilahɨli,

twale twiva twasilile nda vaanu va kʉ Sodoma na kʉ Gomola.”

Ɨkɨɨnu ɨkyavapelye aVaisilahɨli valeke ʉkʉvalɨlwa ʉvʉgolosu

30 Ndeeti, ago gooni kwʉ kʉta kɨki? Kwʉ kʉta, avaanu ʉwʉ vatava Vaisilahɨli navɨɨkupile ʉkʉkava ʉvʉgolosu, lɨno ʉNgʉlʉve aavavalye ʉvʉgolosu kʉ nzɨla jya kʉmwɨdɨka ʉKɨlɨsiti. 31 Ikange kwʉ kʉta, aVaisilahɨli ʉwʉ vaavombaga ʉlwʉtsi ʉkʉkonga indagɨlo pakʉta vavalɨlwe ʉvʉgolosu, navavalɨlwe. 32 Kɨki navavalɨlwe? Navavalɨlwe ʉlwakʉva vaahʉʉvye imbombo tsa veene, vakaleka ʉkʉmwɨdɨka ʉKɨlɨsiti. Baaho vakakʉvala mu lɨlya ɨliganga ɨlivaha, vakagwa. 33 Ikulongwi itsi tsilɨngʼiine nʉ wʉ ʉNgʉlʉve aatsovile mu Vʉvɨge ʉVʉvalatse, ʉpwʉ aatye,

“Lolagi, ʉkwa kʉ vʉtsenge wa Sayuni ndɨvɨɨkile ɨliganga.

Ɨlɨ lyʉ liganga ɨlyʉ avaanu jʉvikɨkʉvɨtsaaga,

lyʉ liganga ɨlyʉ likʉvapelelaga avaanu vagwitsage.

Napeene, ʉmuunu ʉvaveetsaga ʉvɨ ikʉmwɨdɨka ʉjwa ʉvɨ vɨ liganga ɨlyo,

nalasʉʉke lʉsiku!”