Valooma 10

1 Vɨɨdɨkivajyango, ʉvʉnogwe wango ʉvʉlʉti mu numbula jyango ni nyɨsajo tsyango kwa Ngʉlʉve, ndilonda ʉkʉta avajyango avo aVaisilahɨli vapokwe. 2 Ndikwoleletsa kwanyie ʉkʉta, avaanu avo vanya lwɨkupilo ʉkʉndonda ʉNgʉlʉve, napeene navalʉmanyili ʉmwʉ ʉNgʉlʉve inogwa vandondage. 3 Aveene navaakonge ɨnzɨla ɨjyʉ ʉNgʉlʉve ikʉvavalɨla avaanu ʉvʉgolosu, manya navaajɨmanye, ikange vaalondile ʉkʉkava ʉvʉgolosu kʉ nzɨla jya kʉkonga indagɨlo tsa Moose. 4 Lola, ʉKɨlɨsiti aakwɨtsiitse imbombo tsa ndagɨlo tsa Moose, pakʉta avaanu vooni avikʉmwɨdɨka vavalɨlwagwe ʉvʉgolosu.

Avaanu vooni viweesa ʉkʉpokwa

5 Pa kulongwi jya kʉkava ʉvʉgolosu kʉ nzɨla jya kʉkonga indagɨlo, ʉMoose aavɨgile akata, “Ʉmuunu ʉvɨ ikwibataga tsyoni itsilagɨliilwe mu ndagɨlo, itaamaga kʉ nzɨla jya kʉkonga indagɨlo itso.” 6 Napeene, pa kulongwi jya kʉkava ʉvʉgolosu kʉ nzɨla jya lwɨdɨko, iita, “Muleke ʉkwɨvʉʉtsa mu numbula tsiinyo ʉkʉta, ‘Vɨ veeni ʉviweesa ʉkʉtoga akasike kʉkyanya?’ ” Kwʉ kʉta, ʉkʉnʼdoova ʉKɨlɨsiti iitse mu kɨlʉnga. 7 “Evo ʉkʉta, ‘Vɨ veeni ʉnya kwika ʉkʉtsisika kʉ vʉtsʉʉka?’ ” Kwʉ kʉta, ʉkʉntsʉʉsa ʉKɨlɨsiti. 8 Napeene, ʉVʉvɨge ʉVʉvalatse wiita, “Ɨlimenyu lya Ngʉlʉve lɨlɨ piipi nʉʉve, lɨlɨ mu ndomo gwako na mu numbula jyako.” Kwʉ kʉta, ɨlimenyu ɨlyo lyʉ limenyu lya kulongwi tsa vʉpoki kʉ nzɨla jya lwɨdɨko ɨlyʉ tupʉlɨsa. 9 Ikange lɨlɨ piipi nʉʉve, manya ʉngatsove kʉ ndomo gwako jyʉve ʉkʉta, “ɄYɨɨsʉ vɨ Ntwa,” nʉ kwɨdɨka mu numbula jyako ʉkʉta ʉNgʉlʉve aantsʉʉsiitse, ʉNgʉlʉve ikʉkʉpoka ʉve. 10 Manya ʉmuunu ikwɨdɨka nɨ numbula jya mwene, pwʉ ivalɨlwa ʉkʉta inʼgolosu, ikange itsova nʉ ndomo gwa mwene jyʉmwene, pwʉ ipokwa.

11 Pa kulongwi jya mwene ʉKɨlɨsiti, ʉVʉvɨge ʉVʉvalatse wiita, “Ʉmuunu ʉvaveetsaga ʉvɨ ikʉmwɨdɨka nalasʉʉke lʉsiku.” 12 Manya ʉNtwa nitengelela aVayahudi evo avatava Vayahudi. ɄNtwa ʉvɨ alɨ mpamato, vɨ Ntwa va vaanu vooni, ikange mwipa kʉ vaanu vooni avikʉnʼdoova. 13 Aga galɨngʼiine nʉ Vʉvɨge ʉVʉvalatse ʉwiita, “Ʉmuunu ʉvaveetsaga ʉvidoova ʉvʉsyɨkɨlo wa mbiivi tsa mwene nʉ kʉlɨhʉʉvɨla ɨlitaawa lya Ntwa ʉNgʉlʉve, alapokwa.”

14 Pwʉ ʉwajɨlweli wʉ ʉvʉ, avaanu naviweesi ʉkʉnʼdoova ɨngave navagelili ʉkʉmwɨdɨka. Ikange navakaweese ʉkʉmwɨdɨka ɨngave navagelili ʉkʉpʉlɨka ikulongwi tsa mwene. Ikange naviweesi ʉkʉpʉlɨka kɨtsila kʉlʉmbɨlɨlwa. 15 Naveene avaanu navakalʉte kulʉmbɨlɨla ikulongwi itso kɨtsila kʉsuungʼwa. Ndʉwʉ jɨvɨgilwe mu Vʉvɨge ʉVʉvalatse ʉkʉta, “Ʉvileeta ɨLivangɨli iiva ikʉvahovosa avaanu!” 16 Napeene, nakwʉ kʉta aVaisilahɨli vooni vɨdiike ɨLivangɨli ɨlyo ɨlya Yɨɨsʉ, vongosu valɨbeelile. Manya ʉnyamalago ʉYesaya aatye, “Gwe Ntwa, veeni ʉvɨ ɨdiike ikulongwi tsiitu?” 17 Pwʉ lɨno, avaanu viiva nʉ lwɨdɨko vangapʉlɨke ikulongwi tsa Kɨlɨsiti, naveene vipʉlɨkaga ɨngave tsilʉmbɨlɨlwa.

18 Napeene, ndivʉʉtsa: Ndeeti, aVaisilahɨli navagelili ʉkʉpʉlɨka? Ɨlweli vapʉliike, manya ʉVʉvɨge ʉVʉvalatse wiita,

“Ikulongwi tsa veene tsyapʉlɨkiike mu kɨlʉnga kyoni,

na mamenyu ga veene gaatsisika nakʉ kʉ vʉmalɨlo wa kɨlʉnga.”

19 Ndikwongeletsa ʉkʉvʉʉtsa: Ndeeti, aVaisilahɨli wʉ vapʉliike navaalʉmanye? Baako, vaalʉmanyile ʉlwakʉva ʉnsɨkɨ gwa Moose ʉNgʉlʉve aatye,

“Ndɨlavɨɨka ʉnyie muvavonelage ɨkɨvini

avaanu ʉwʉ vatava Vaisilahɨli,

na vaanu avo ʉwʉ navalʉmanyili,

ndɨlavavɨɨka vavaviipitsaage ʉnyie siitso.”

20 Ikange, ʉnyamalago ʉYesaya itsova kɨtsila kʉdwada kɨɨnu amamenyu ga Ngʉlʉve iita,

“Avaanu ʉwʉ navandondili,

wʉ veene vambwene.

Na vaanu ʉwʉ navivʉtsɨlɨhɨtsa ikulongwi tsyango,

ndyɨvoniitse kʉ veene.”

21 Napeene, pa kulongwi jya Vaisilahɨli, ʉNgʉlʉve iita,

“Ʉmuunyi gwoni ndyanogilwe ʉkʉsajana navo avaanu ʉwʉ navɨɨdɨhɨtsi,

ikange avanya lʉkaani.”