Valooma 8

Ʉkʉlongotsiwa nʉ Mepo ʉMbalatse

1 Pwʉ ʉkʉhʉma lɨno, ʉNgʉlʉve nalavape ʉlʉvʉngʉ valya ʉwʉ avaaganiitse nʉ Mesiya ʉYɨɨsʉ. 2 Lola, ʉMepo ʉMbalatse ʉvɨ ikʉvapa ʉwʉʉmi wa sikutsooni, avavɨɨkile muve vavopolwa, pakʉta muleke ʉkʉlongotsiwa nʉ vʉtulanongwa ʉvukʉvapelela avaanu ʉvʉswe wa sikutsooni. Avombile ewo kʉ nzɨla jya Mesiya ʉYɨɨsʉ. 3 Indagɨlo tsa Moose tsyale tsivʉla maka ga kʉtʉvopola, manya ʉvʉmuunu wiitu wa vʉtulanongwa waalemwagwa ʉkʉtsikonga. Lɨno, ɨkyʉ indagɨlo tsyalemilwe ʉkʉvomba, ʉNgʉlʉve aavombile. Aansuungʼile ʉMwana va mwene jyʉmwene, ave nʉ mmana gwa kɨvʉmuunu nʉ kʉva neekelo. Kʉ nzɨla ɨjyo, aampye ʉlʉvʉngʉ kʉ nongwa jya mbiivi tsa vaanu. 4 Ʉkʉhʉmana naago, tsive tsivombilwe nʉ Kɨlɨsiti tsyoni itsitsigilwa mu ndagɨlo ʉkʉta ʉwe tʉtsivombage, ʉwe twɨ tulongotsiwa nʉ Mepo ʉMbalatse. Natulongotsiwa ikange nʉ vʉmuunu wa vʉtulanongwa. 5 Lola, avilongotsiwa nʉ vʉmuunu wa vʉtulanongwa, ʉlʉhala lwa veene lunogwa ʉkʉvomba ʉvʉtulanongwa. Lɨno, avilongotsiwa nʉ Mepo ʉMbalatse, ʉlʉhala lwa veene lunogwa ʉkʉvomba imbombo itsikʉmmovosa ʉMepo ʉMbalatse ʉjwa. 6 Ʉmuunu ʉvɨ ʉlʉhala lwa mwene lulongotsiwa nʉ vʉmuunu wa mwene wa vʉtulanongwa, ikɨpelela ʉvʉswe wa sikutsooni. Apeene, ʉmuunu ʉvilongotsiwa nʉ Mepo ʉMbalatse, alɨ nʉ wʉʉmi wa sikutsooni ikange alɨ nʉ lʉnotsehetso. 7 Manya avaanu avilongotsiwa nʉ vʉmuunu wa vʉtulanongwa vikɨvɨɨka valʉgʉ va Ngʉlʉve, navikwɨdɨka napadebe ʉkʉkonga indagɨlo tsa mwene, ikange naviweesi ʉkʉtsikonga. 8 Kwʉ kʉta, avikonga ʉvʉmuunu wa vʉtulanongwa naviweesi ʉkʉmmovosa ʉNgʉlʉve.

9 Lɨno, ʉnyie namulongotsiwa nʉ vʉmuunu wa vʉtulanongwa, apeene mulongotsiwa nʉ Mepo ʉMbalatse, manya ʉjwa itaama mu numbula tsiinyo. (Mulʉmanyage ʉkʉta, ʉmuunu ʉvaveetsaga ʉvɨ alɨ vʉvʉle ʉMepo va Kɨlɨsiti mu numbula jya mwene, nankongi lweli va Yɨɨsʉ Kɨlɨsiti.) 10 Lɨno, ʉKɨlɨsiti itaama mu numbula tsiinyo. Apo, nʉpwʉ jɨngave ɨmihana giinyo giiswa kʉ nongwa jya vʉtulanongwa, ʉMepo ʉMbalatse ikʉvapa ʉwʉʉmi ʉlwakʉva ʉNgʉlʉve avavalye ʉnyie ʉvʉgolosu. 11 Ikange, ʉMepo ʉMbalatse ʉvɨ itaama mu numbula tsiinyo vɨ Mepo va Ngʉlʉve ʉvɨ aantsʉʉsiitse ʉYɨɨsʉ Kɨlɨsiti. Pwʉ lɨno, kʉ nzɨla jya maka ga Mepo ʉMbalatse ʉjwa, ʉNgʉlʉve alagɨtsʉʉsa nagɨ mihana giinyo ɨgɨlaaswa.

12 Pwʉ lɨno, vɨɨdɨkivajyango, ʉwe napatʉnogiili tʉtaamage tulongotsiwa nʉ vʉmuunu wa vʉtulanongwa. 13 Lola, mungave nʉ vʉtaamo ʉvulongotsiwa nʉ vʉmuunu wa vʉtulanongwa, muloongometswa. Apeene, kʉ maka ga Mepo ʉMbalatse, mungɨlekelwe ʉkʉvomba itsʉ ʉvʉmuunu wa vʉtulanongwa vunogwa, mulataamaga nʉ Ngʉlʉve sikutsooni.

14 Vooni avilongotsiwa nʉ Mepo va Ngʉlʉve wʉ vaana va Ngʉlʉve. 15 Lola, ʉNgʉlʉve naavape ʉnyie ʉMepo ʉMbalatse va kʉvapelela muve ikange vavanda avikʉnʼdwada ʉNgʉlʉve. Apeene aavapye ʉnyie ʉMepo ʉMbalatse va kʉvapelela muve vaana va mwene. ɄMepo ʉjwa vɨ ikʉtʉtanga tʉmwɨlangage ʉNgʉlʉve, “Dadajiitu.” 16 ɄMepo ʉjwa vɨ mwene ikwoleletsa mu numbula tsiitu ʉkʉta, ʉwe tʉlɨ vaana va Ngʉlʉve. 17 Pwʉ, ɨngave tʉlɨ vaana va Ngʉlʉve, tʉlɨ venevʉhaale wa Ngʉlʉve, ʉwe paninie nʉ Kɨlɨsiti. Peene ɨlɨnogelanie kwawe, twɨdɨke ʉkwɨjʉmɨɨlɨtsa mu vʉkʉvɨlwa ndʉwʉ aavombile ʉKɨlɨsiti. Pwʉ apo, tʉlɨɨmɨkiwa paninie nʉ mwene.

ɄNgʉlʉve alavapa ʉwɨɨmɨkiwa avaana va mwene

18 Ʉvʉkʉvɨlwa wiitu wa nsɨkɨ ʉgʉ ndivona nakɨɨnu ʉkʉlɨngʼaania nʉ wɨɨmɨkiwa ʉwʉ ʉNgʉlʉve alatʉpa ʉnsɨkɨ ʉgʉliitsa. 19 Lola, isipeliwa syoni sipʉlɨkɨla kʉ vʉsʉʉkwa ʉnsɨkɨ ʉgwʉ ʉNgʉlʉve alavonia avaana va mwene. 20 Manya, isipeliwa syoni sipepwike, nakwʉ kʉta siingye ʉkʉva ewo kʉ wɨgane wa syene, baako, apeene ndʉwʉ aanogilwe ʉNgʉlʉve jyʉmwene. Paninie nɨɨlyo, sipʉlɨkɨla kʉ vʉsʉʉkwa 21 ʉkʉpokwa pakʉta sileke ʉkwongometswa, apeene sipeewe ʉvʉvopolwa ʉvʉnya wɨɨmɨkiwa ʉwʉ ʉNgʉlʉve alavapa avaana va mwene.

22 Tʉlʉmanyile ʉkʉta nakʉ kʉsikila lɨno, isipeliwa syoni silɨla kʉ lʉvavo ʉngata lʉvavo lwa kʉhola ʉmwana. 23 Ikange, nakwʉ kʉta sisipeliwa syene syʉ silɨla, apeene najyʉwe twɨ tʉpeevilwe ʉMepo ʉMbalatse tʉvonze ʉvʉnonu ʉwʉ tʉlapeewa, najyʉwe twilɨla mu numbula tsiitu. Manya tupʉlɨkɨla ʉNgʉlʉve atʉpe ʉvʉtavʉlɨlwa wooni wa kʉva vaana va mwene, kwʉ kʉta ʉkʉgombola nʉ kwandʉla ɨmihana giitu gɨve mipya. 24 Ɨnyʉʉve ɨjyo tʉlɨ najyo ʉkʉhʉma palya ʉpwʉ ʉNgʉlʉve aatʉpokile. Lɨno ɨngave tuhʉʉvɨla ɨkɨɨnu ɨkyʉ tukʉkɨvona, nakiiva kya lʉpʉlɨkɨlo. Ndeeti, veeni ʉviweesa ʉkʉpʉlɨkɨla ʉkʉpeewa ɨkɨɨnu ɨkyʉ alɨ nakyo? 25 Lɨno tʉngahʉʉvɨlage ʉkʉpeewa ɨkɨɨnu ɨkyʉ natukʉkɨvona, pwʉ tupʉlɨkɨla kɨtsila kʉnyongʼonyoka amaka.

26 Paninie niitso, ʉMepo ʉMbalatse vɨ mwene ikʉtʉtanga mu kwɨlemwa kwitu, manya natʉkɨmanyili ʉkʉdoova kɨlya ɨkɨnogelanie ʉwe tʉnʼdoove ʉNgʉlʉve. Lɨno ʉMepo ʉMbalatse jyʉmwene vɨ ikʉtʉdoovela kwa Ngʉlʉve kʉ lʉkuuto ʉlʉnalutsoveka. 27 ɄNgʉlʉve ʉvatsimanyile itsilɨ mu numbula tsa vaanu, agamanyile amasaago ga Mepo ʉMbalatse va mwene. Lola, ʉMepo ʉjwa ikʉvadoovela avɨɨdɨki ndʉwʉ ʉNgʉlʉve jyʉmwene inogwa.

28 Tʉlʉmanyile ʉkʉta, mu gooni ʉNgʉlʉve ikʉvavombela inonu avaanu avanʼganile, valya ʉwʉ avɨɨlangile ʉkʉkongana nʉ vʉsumbe wa mwene. 29 Lola, ʉNgʉlʉve aavamanyile avaanu va mwene ʉwʉ aavahalile wʉ akaanale ʉkʉvapela, ikange avo aalamwe vave ndʉwʉ alɨwo ʉMwana va mwene ʉYɨɨsʉ Kɨlɨsiti. Aavombile ewo pakʉta, ʉMwana ʉjwa ave vɨ kɨvalʉla kʉ vaana vooni va Ngʉlʉve. 30 Pwʉ lɨno, avo ʉwʉ aalamwe vave ndʉ Yɨɨsʉ Kɨlɨsiti wʉ veene aavɨɨlangile, wʉ veene aavavalye ʉvʉgolosu, ikange wʉ veene aavahʉʉviitse ʉkʉvapa ʉwɨɨmɨkiwa.

Nakʉli ʉva kʉvalekengʼania avɨɨdɨki nʉ lʉgano lwa Ngʉlʉve

31 Lɨno, tʉte kɨki pa kulongwi tsa siinu isi? Ɨngave ʉNgʉlʉve alɨ lʉvasu lwawe, jɨlweli nakʉli ʉmuunu ʉviweesa ʉkʉtʉlema. 32 ɄNgʉlʉve naankolele ɨkɨsa ʉMwana va mwene jyʉmwene, apeene aammʉmiitse aswe kʉ nongwa tsiitu twɨ vooni. Pwʉ lɨno, ɨngave aatʉpye ʉMwana va mwene jyʉmwene, vʉvʉle vʉle alatʉpa isiinu syoni isinonu. 33 Tsa jɨlweli nakʉli ʉmuunu ʉvɨ aladajaga ʉkʉta vahɨgwe avahalwa va Ngʉlʉve, manya ʉNgʉlʉve jyʉmwene vɨ mwene ikʉvavalɨla ʉvʉgolosu. 34 Ikange nakʉli ʉmuunu ʉnya kʉtʉpa ʉlʉvʉngʉ. Lola, najyʉ Mesiya ʉYɨɨsʉ, ʉvɨ aasue nʉ kʉtsʉʉsiwa, ʉvɨ lɨno itaama kʉ kɨvoko kya kʉndyo kya Ngʉlʉve nʉ kʉtʉdoovela ʉwe, nalatʉpe ʉlʉvʉngʉ.

35 Nakɨkʉli ɨkɨveetsaga ɨkiweesa ʉkʉnsiga ʉKɨlɨsiti aleke ʉkʉtʉgana ʉwe! ɄKɨlɨsiti itsiga atʉganile ndavɨ jɨve tʉlɨ mu vʉpala ʉvʉlʉti, tʉlɨ mu lʉgatatso, tʉlɨ mu vʉkʉvɨlwa, tʉlɨ mu nzala, tukwagɨlwa ɨmisabwa, tuhegelela ʉkʉjatsa ʉwʉʉmi, evo ʉkʉbudwa. 36 Ago ʉgwʉ ndɨtsovile galɨngʼiine nʉ Vʉvɨge ʉVʉvalatse ʉwiita,

“Isigono syoni tugokelwa, ʉlwakʉva tukʉkʉvombela ʉve.

Ʉwe tuvombelwa sivi na vaanu, ʉta ngʼolo itsʉ vilʉta kuhɨnza.”

37 Lɨno ndajɨve aga gooni gikʉtwitsila, ʉwe tulʉtɨɨlɨlaga ʉkʉlesa, ʉlwakʉva tutangɨlwa nʉ Kɨlɨsiti ʉvɨ atʉganile. 38-39 Ndɨlʉmanyile jɨlweli ʉkʉta nakɨkʉli ɨkɨɨnu ɨkiweesa ʉkʉnsiga ʉNgʉlʉve ʉkʉtʉgana ʉwe. ɄNgʉlʉve itsiga atʉganile ndavɨ jɨve tʉlɨ vʉʉmi evo tʉsue. Ikange nakʉli ʉnsuungʼwa, evo avanya vʉtavʉlɨlwa, evo isipeliwa syoni isinya maka, evo isiinu isivombeka ʉlʉ lɨno, evo isiliitsa kʉvʉlongolo, evo isiinu sya kʉkyanya, evo isiinu sya kʉ vʉtsʉʉka, evo isipeliwa isinge isiveetsaga isiweesa ʉkʉnsiga ʉNgʉlʉve ʉkʉtʉgana ʉwe. Ʉlʉgano ʉlwa alʉvoniitse kwawe kʉ nzɨla jya Mesiya ʉYɨɨsʉ, ʉNtwa viitu.