Avilongotsiwa nʉ Yɨɨsʉ navalɨ paasi pa ndagɨlo tsa Moose
7
1 Vɨɨdɨkivajyango,
nditsova nʉʉnyie nyɨ vaanu nyɨ mutsimanyile indagɨlo.
Mulʉmanyile ʉkʉta ʉmuunu itsigilwa ʉkʉkonga indagɨlo peene wʉ apitsiige mwʉmi.
2 Lɨno,
leki ndɨganule ɨlimenyu ɨlɨ:
Jɨvyʉta ndʉ lʉlagɨlo lwa vaanu avategʉliine ʉlwita,
ʉnʼdala nitavʉlɨlwa ʉkʉndeka ʉnʼgoosi va mwene wʉ ʉnʼgoosi apitsiige mwʉmi.
Apeene ʉnʼgoosi angaswe pwʉ ʉnʼdala ʉjwa iiva nʉ vʉvopolwa kʉ mwene.
Kwʉ kʉta nakalongotsiwaagwe ikange nʉ lʉlagɨlo lwa vaanu avategʉliine.
3 Lɨno,
angategʉlwe nʉ nʼgoosi ʉjyʉnge wʉ kʉnʉ ʉnʼgoosi va mwene apitsiige mwʉmi,
itambʉlwagwa indigu.
Apeene ʉnʼgoosi va mwene angaswe,
ʉlʉlagɨlo ʉlwa nalukʉnkʉnga ikange,
ʉmwene iweesa ʉkʉtegʉlwa nʉ nʼgoosi ʉjyʉnge,
nakaave indigu.
4 Vʉvʉle vʉle wʉ jɨlɨwo kwanyie nyɨ vɨɨdɨkivajyango.
Ndʉwʉ ʉmuunu angaswe nilongotsiwa ikange ni ndagɨlo,
ʉnyie najyʉnyie namulongotsiwa ikange ni ndagɨlo tsa Moose.
Manya muvye ʉngata musue paninie nʉ Kɨlɨsiti pa kɨdamingʼanie.
Lɨno mulɨ va mwene ʉvɨ aatsʉʉsiiwe ʉkʉhʉma kʉ vaswe,
pakʉta ʉwe tʉmmʉʉpɨlage iseke ʉNgʉlʉve.
5 Palya ʉpwʉ ʉvʉmuunu wiitu wa katale waatʉlongotsaaga ʉwe,
indagɨlo tsilɨkʉpela ʉvʉnogwe ʉvʉviivi vʉve na maka siitso.
Ɨkɨɨnu ɨkɨ kyʉ kyatʉpelelaga tʉnogwagwe ʉkʉvomba ʉvʉtulanongwa ʉnsɨkɨ gwoni.
Ʉkʉhʉmana nɨɨlyo,
ʉvʉswe vʉkavepwo.
6 Twapinyilwe ni ndagɨlo,
lɨno tʉsue paninie nʉ Kɨlɨsiti,
kwʉ kʉta tʉvopwilwe kʉ ndagɨlo.
Ʉnsɨkɨ ʉgʉ natukʉmbombela ʉNgʉlʉve kʉ nzɨla jya katale jya kʉkonga indagɨlo itsyavɨgilwe,
apeene kʉ nzɨla ɨɨmya jya kʉlongotsiwa nʉ Mepo ʉMbalatse.
Ʉvʉtulanongwa kyʉ kɨɨnu ɨkikʉvagagɨla avaanu vooni
7 Lɨno tʉte kɨki?
Tʉteetsage indagɨlo vʉtulanongwa?
Baako,
nalweli napadebe!
Jɨlweli indagɨlo tsyale tsileke ʉkʉvepwo,
ʉne nandyale ndɨlʉmanye ʉkʉta ʉvʉtulanongwa kyʉ kɨɨnu kɨki.
Lola,
paale paleke ʉkʉvepwo ʉlʉlagɨlo ʉlwita,
“Ʉlanogwagwa ɨkɨɨnu kya nnino,”
a ʉne nandyale ndɨlʉmanye ʉkʉta ʉkʉnogwa ɨkɨɨnu kya muunu ʉwa vʉtulanongwa.
8 Lɨno ndyavye ndɨlʉmanyile ʉlʉlagɨlo ʉlʉ,
pwʉ lʉkatunumula ʉvʉnogwe ʉvʉviivi ʉvʉlɨ pongosu mu nʼgati mwane.
Lola,
indagɨlo tsa Moose tsingaleke ʉkʉvepwo,
ʉvʉtulanongwa wiiva vʉvʉle amaka.
9 Isigono sya kʉnsana wʉ nandɨtsimanyili indagɨlo tsa Ngʉlʉve,
ndyataamaga ndʉwʉ ndyanogwagwa.
Lɨno ndyavye ndɨlʉmanyile ʉmwʉ tsinogelelwa indagɨlo,
ndɨkalʉmanya ʉkʉta ndɨlɨ ntulanongwa.
10 Ndɨkavona ʉkʉta indagɨlo itso,
itsʉ tsyale tsa kʉʉma ʉwʉʉmi,
tsyammelye ʉvʉswe.
11 Lola,
kʉ nzɨla jya lʉlagɨlo ʉlwa,
ʉvʉtulanongwa vʉkansyova ʉne nʉ kʉmmelela ʉvʉswe.
12 Pwʉ lɨno jɨlɨ pavʉvalasu ʉkʉta,
indagɨlo tsihʉmile kwa Ngʉlʉve jyʉmwene.
Ʉkʉkongana nɨɨlyo itsyene itso nonu ikange tsa vʉgolosu.
13 Jɨlweli ɨkɨɨnu ɨkyo ɨkɨnonu nakɨkaweese,
napadebe,
ʉkʉmmelela ʉvʉswe!
Ʉvʉtulanongwa wʉ waammelye ʉvʉswe kʉ nzɨla jya ndagɨlo inonu.
Waale vʉsumbe wa Ngʉlʉve ʉkʉta indagɨlo tsivoniage ʉkʉta ʉvʉtulanongwa kɨɨnu kɨviivi siitso.
14 Tʉlʉmanyile ʉkʉta indagɨlo aatsihʉmiitse ʉNgʉlʉve,
lɨno ʉne ndɨlɨ nʉ vʉmuunu wa vʉtulanongwa,
kwʉ kʉta ndɨlɨ mbanda va vʉtulanongwa.
15 Itsʉ ndivomba,
jɨlweli ʉne jyʉne nandikɨvona.
Lola,
ndɨnganogwe ʉkʉvomba galya ʉgwʉ ndinogwa,
pwʉ nandivomba.
Apeene ʉgwʉ ndɨgasʉʉlile,
gwʉ geene ndivomba.
16 Ɨngave ʉne ndivomba ʉgwʉ nandinogwa,
pwʉ jivonia ʉkʉta ndikwɨdɨka ʉkʉta indagɨlo nonu.
17 Apo jiiva naneene ndɨ ndivomba imbiivi,
apeene wiiva wʉ vʉlya ʉvʉtulanongwa ʉvʉlɨ mu nʼgati mwane.
18 Ndɨlʉmanyile ʉkʉta mu nʼgati mwane,
kwʉ kʉta mu vʉmuunu wango wa vʉtulanongwa,
nakɨmuli ɨkɨɨnu ɨkɨnonu ɨkɨveetsaga.
Lola,
ndinogwa ʉkʉvomba inonu,
lɨno wʉ najiiva.
19 Kwʉ kʉta nandivomba inonu itsʉ ndinogwa ʉkʉvomba,
apeene ndivomba tsilya imbiivi itsʉ nandinogwa ndɨtsivombage.
20 Lɨno,
ndɨngave ndivomba tsilya itsʉ nandinogwa,
pwʉ jɨlweli ndiiva naneene ndɨ ndivomba imbiivi,
apeene wiiva wʉ vʉlya ʉvʉtulanongwa ʉvʉlɨ mu nʼgati mwane.
21 Pwʉ ndɨkɨweene ɨkɨɨnu ɨkɨ:
Ʉnsɨkɨ ndɨnganogwe ʉkʉvomba ɨkɨɨnu ɨkɨnonu,
ndikwegwa ndɨvombage ɨkɨɨnu ɨkɨviivi.
22 Indagɨlo tsa Ngʉlʉve ndɨtsiganile kʉ numbula jyango jyoni.
23 Lɨno,
isipagɨka sya mmana gwango silongotswa na maka ga vʉtulanongwa ʉgwʉ gisʉʉtɨngʼana na masaago gango.
Gikʉmmelela ndɨve mbanda va kʉvʉvombela ʉvʉtulanongwa ʉvuvomba ɨmbombo mu mmana gwango.
24 Ndɨswe vʉvʉle ʉne!
Veeni ʉnya kʉmmoka ʉne ndɨhʉme mu vʉtulanongwa ʉvukʉnnyɨlɨka kʉ vʉswe?
25 Tʉnsaanage ʉNgʉlʉveb ʉvɨ kʉ nzɨla jya Ntwa viitu ʉYɨɨsʉ Kɨlɨsiti ikʉtʉpoka ʉkʉhʉma kʉ maka ga vʉtulanongwa.
Ʉgwʉ ndɨtsovile ago kwʉ kʉta,
ʉne jyʉne ndikonga indagɨlo tsa Ngʉlʉve mu kʉsaaga kwango,
lɨno ʉvʉmuunu wango wa vʉtulanongwa,
vukonga ʉlʉlagɨlo lwa mbiivi.