ɄYoona ikonga ʉlʉlagɨlo lwa Ngʉlʉve
3
1 Kange ʉNtwa akambʉʉla ʉYoona ʉlwa vɨɨlɨ, 2 akata, “Ʉbɨhage kʉ vʉtsenge ʉvʉvaha ʉwa kʉ Ninawi kʉlʉmbɨlɨla. Ʉkavavʉʉle ɨkulongwi ɨjyʉ ndɨpya ndikʉkʉvʉʉla.”3 Wʉ amalile ʉkʉpʉlɨka amamenyu ago, ʉYoona akɨɨdɨka, akahega ʉkʉlʉta kʉ Ninawi. Ʉvʉtsenge wa kʉ Ninawi waale vʉvaha, waale wa lʉgendo lwa matsʉva gadatu. 4 Ɨlitsʉva lipamato akatengʉla ʉkʉgenda mwoni mwoni kʉnʉ ilʉmbɨlɨla, alɨkʉvavʉʉla avaanu alɨkʉta, “Gasigye amatsʉva isitsigo sinni (40) ʉvʉtsenge wooni jyʉ vukwongometswa.”
5 Lola, wʉ vapʉliike amamenyu ago vakamwɨdɨka ʉNgʉlʉve, vakɨɨdɨngʼana avaanu vooni, avavaha na vadebe, ʉkʉleka ʉkʉlya nʉ kʉswala amagunila, kɨve kɨmanyilo kya kʉpela imbiivi.
6 Ikulongwi itsi tsikansikila ʉntwa va kʉ Ninawi namwene akahega pa kɨtaamilo kya vʉtwa, akasuula ɨmisabwa gya vʉtwa, akaswala amagunila nʉ kʉtaama mu ndyela. Ɨkɨ kyʉ kɨmanyilo kya kʉpela imbiivi. 7 Pwʉ ʉntwa paninie na vatangɨli va mwene, vakavɨɨka ʉlʉlagɨlo, vakavavʉʉla avaanu va kʉ Ninawi vakata,
“Kwʉ baako nyɨ vaanu paninie ni sidɨɨmo ʉkʉlya nʉ kʉnywa ɨkɨɨnu ɨkyʉ kɨveetsaga. 8 Avaanu vooni vaswale amagunila ikange vagubike amagunila isidɨɨmo syoni. Nʉ jyʉnge ɨsajage kwa Ngʉlʉve nʉ kʉnsimiilitsa, ikange nʉ kʉtsileka imbiivi tsa mwene. 9 Veeni alʉmanyile? Apange ɨligoga lya Ngʉlʉve jyʉ likwika, namwene ʉNgʉlʉve jiikʉtʉkolela ɨkɨsa, nakatʉbude twɨ vaanu vooni.”
10 ɄNgʉlʉve wʉ aweene vapelile imbiivi tsa veene, akavakolela ɨkɨsa ʉkʉvabuda avaanu va kʉ Ninawi. Akɨlekelwa ʉkʉvavombela ndʉwʉ akaasaagile.