ɄYoona iviipa ʉlwakʉva ʉNgʉlʉve alɨ nʉ lʉhʉngʉ
4
1 Ʉlʉhʉngʉ lwa Ngʉlʉve kʉ vaanu va kʉ Ninawi lwambipiitse siitso ʉYoona. 2 Pwʉ akatsova sivi kʉ Ntwa akata, “Lola, ʉve vɨ Ntwa, aga gwʉ ndɨkatsovile pa vʉtengʉlɨlo wʉ ndɨlɨ kʉ nyumba. Tsiitsi tsʉ tsambɨkile ʉkʉta ndɨkɨmbɨlɨlage kʉ Talishishi. Ʉne ndyalʉmanyile ʉkʉta ʉve ʉlɨ Ngʉlʉve vyʉlɨ nɨ kɨsa nʉ lʉhʉngʉ. Navuviipa ngʼaningʼaani, ʉnsɨkɨ gwoni vuvonia ʉlʉgano, ʉve ʉlɨ nya kɨsa navunogwa ʉkʉvavʉnga avaanu. 3 Lɨno vɨ Ntwa lwiva lʉnonu siitso kwane ʉngave vukʉvʉtoola ʉwʉʉmi waane, pakʉva hʉba ndɨswe ʉkʉlɨngʼaania nʉ kʉtsiga mwʉmi.” 4 ɄNtwa akambʉʉtsa ʉYoona akata, “Nda wivona lʉnonu ʉve ʉkʉviipa?”5 Pwʉ ʉYoona akahega pa vʉtsenge ʉwa kʉ Ninawi akalʉta kʉ Vʉhʉmo wa litsʉva. Akalonda apoonu, akatsenga ɨkyeve kya kwɨjʉvɨla kʉ lʉtsʉva. Wʉ amalile ʉkʉtsenga, akiingila mu ntsitsimila akataama. Ʉnsɨkɨ ʉgwa ʉYoona aapʉlɨkɨlaga alole tsilya itsʉ ʉNgʉlʉve apivomba kʉ vʉtsenge ʉwa kʉ Ninawi.
6 Pavʉsiku wʉ kʉtengwe ʉkʉtandaalʉka, ʉNtwa ʉNgʉlʉve akava ametsiitse ɨlitandwe lya kwɨjʉvɨla nʉ lʉtsʉva ʉpwʉ aale ʉYoona. Ɨlitandwe ɨlyo gʉkɨpela ʉkʉva intsitsimila kʉ mwene. Namwene ʉYoona akagʉhovokela siitso ʉntsitsimila gwa litandwe.
7 Ɨkɨgono ɨkya vɨɨlɨ wʉ kwikya ʉNgʉlʉve akasuungʼa ɨlidɨngu lɨgɨde ɨlitandwe ɨlyo. 8 Pwʉ ɨlitsʉva wʉ lɨtogile ʉNgʉlʉve akasuungʼa ʉlʉsuke ʉkʉhʉma kʉ Vʉhʉmo. Ʉlʉtsʉva lʉkava lunyianya ʉntwe gwa Yoona. Pwʉ ʉYoona akava ʉta nyakʉtsilika. Namwene akalonda ʉkʉswa, akɨsaja kwa Ngʉlʉve akata, “Hʉba ndɨswe ʉkʉlɨngʼaania nʉ kʉtsiga mwʉmi.”
9 ɄNgʉlʉve akambʉʉtsa ʉYoona akata, “Lɨno nda vuvomba vʉnonu ʉkʉviipa nɨ litandwe ɨlyo?” ɄYoona akaanda akata, “Eena ndɨviipile siitso, lɨno kʉsigye kʉkʉswa kwene.”
10 Pwʉ ʉNgʉlʉve akambʉʉla ʉYoona akata, “Lola, ʉve vukʉlɨkolela ɨkɨsa ɨlitandwe ɨlyʉ nʉlɨvombiili mbombo ɨjya kʉlɨmetsa nʉ kʉlɨtsuvilila, ɨlyene lɨmelile ɨkɨlo mamato nʉ kwʉma ɨkɨlo ɨjɨkongile. 11 Ʉve nawivona ʉkʉta ʉne jɨkanogye ʉkʉvakolela ɨkɨsa avaanu ʉwʉ valʉtɨɨlye avaelufu undeevʉlʉ mpamato ni sitsigo sivɨlɨ (120,000), va mu vʉtsenge vʉlya ʉvʉvaha wooni ʉwa kʉ Ninawi, ʉwʉ navakɨmanyili ʉkʉsaatʉla imbiivi ni nonu paninie ni sidɨɨmo syongosu siitso.”