LUTI
Ɨkulongwi ɨjitala
Ɨkɨtabu ɨkɨ kɨpeevilwe ɨlitaawa lwa nʼdala ʉvɨ aatambʉlwagwa Luti ʉkʉhʉma mu kɨkolo kya vaanu va kʉ Moabu. AVamoabu vaale vaanu avapawiipi na Vaisilahɨli ikange vaamanyiine. Ɨkɨtabu ɨkɨ kikwoleletsa ikulongwi itsavombekaga pa nsɨkɨ gʉlya ʉgwʉ avanzagɨla vaavalongotsaaga aVaisilahɨli (1375-1050 wanaholilwi ʉYɨɨsʉ). Ʉnsɨkɨ ʉgwa aVaisilahɨli vaale vakaanale ʉkʉva nʉ vʉlongotsi wa vatwa. Avanzagɨla avo vaale vaanu aavɨɨlangilwe nʉ Ntwa ʉNgʉlʉve ʉkʉvalongotsa aVaisilahɨli ʉkʉhʉma kʉ valʉgʉ va veene. Kange vaahɨgaga inongwa itsilɨ pongosu itsa Vaisilahɨli (Valamutsi 2:10-19).
Ʉlʉmanyiiso ʉlʉvaha ʉlʉlɨ mu kɨtabu ɨkɨ lwʉlʉ: ʉNtwa ikʉvasaja avaanu va sivʉmbʉkʉ syoni. Itsi tsivoneka ʉpwʉ ʉNtwa aansajile ʉLuti nʉ kʉmbɨɨka ɨhanze kʉ kɨkolo kya vatwa ʉmwʉ aavʉmbʉkye ʉNkʉlʉdeeva ʉDavʉdi. Ɨmiaka ɨmiongosu kʉmbele ʉNtwa ʉYɨɨsʉ iitsile akaholwa mu kɨvʉmbʉkʉ ɨkɨ. Mu kɨtabu ɨkɨ tukʉvʉvona ʉvʉnonu nʉ vʉswihu wa Luti kʉ vaanu va kɨkolo kya ntwave. Ikange tukʉvʉvona ʉvʉnonʉ wa Ntwa ʉNgʉlʉve pakʉvaloleela avaanu va mwene pa nsɨkɨ gwa vʉpala nʉ kʉvapoka wʉ vikʉvɨlwa.