LUTI
ɄElimeleki nɨ kɨvʉmbʉkʉ kya mwene vibɨha kʉ Moabu
1
1-2 Katale mu kɨlʉnga kɨlya ɨkya Isilahɨli, ʉnsɨkɨ ʉpwʉ avalamutsi vaalongotsaaga aVaisilahɨli, aalemwo ʉmuunu mpamato ʉvɨ ɨlangwagwa ɨlitaawa lya mwene Elimeleki, ʉvɨ aahʉmile mu vʉtsenge ʉwa Betelehemu mu kɨlʉnga ɨkya Vayuuda. ɄElimeleki ʉjʉ aale nʉ nʼdala va mwene ʉvɨ ɨlitaawa lya mwene aale vɨ Naomi. Avaanu ava vaale na vaana vavɨlɨ avadɨɨmi avaatambʉlwagwa Maloni nʉ Kilioni. Ava vaale va nkɨvʉmbʉkʉ kya Efulata. Mu kɨlʉnga kɨlya jyagwe ɨnzala, pwʉ ʉElimeleki nʉ nʼdala va mwene vakalamula ʉkʉbɨha mu kɨlʉnga kɨlya ɨkya mu Moabu. Wʉ vasiike mu kɨlʉnga kɨlya ɨkya Moabu, vakataama ʉkwa, ʉElimeleki akaswa.3 Akandeka ʉnʼdala va mwene inswɨle, paninie na vaana va mwene ʉMaloni nʉ Kilioni. 4 Avadɨɨmi ava vakavatoola avahɨnza avaale va mu Moabu, ʉjyʉnge akantoola ʉOlipa, ʉjyʉnge akantoola ʉLuti. Vakataama na vadala va veene ɨmyaka kɨtsigo. 5 ɄMaloni nʉ Kilioni vakaswa, ikange ʉNaomi akava aswɨlilwe na vaana va mwene vavɨlɨ paninie nʉ nʼgoosi va mwene.
ɄNaomi nʉ Luti vivuja kʉ Betelehemu
6 Gʉkasika ʉnsɨkɨ ʉNaomi akapʉlɨka ʉkʉta, ʉNtwa avasajile mu kɨlʉnga kɨlya ɨkya Isilahɨli, avapye ɨmote. ɄNaomi akalamula ʉkʉkilivuka, naveene avakamwanave vakankonga ʉkʉbɨha mu kɨlʉnga kya mwene. 7 Pwʉ akahega ʉpwʉ aale paninie na vakamwanave wʉ vavɨlɨ ʉkʉbɨha kʉ Yuuda. 8 Wʉ vigenda mu nzɨla, ʉNaomi akavavʉʉla avakamwana akata, “Muvujage nʉ jyʉnge kwa vanyina. Ndidoova ʉNtwa akavavombelage inonu nʉ kʉvasaja ndʉwʉ mumbombye ʉne inonu paninie na valya avaswe. 9 ɄNtwa avasajage nʉ kʉlʉvona ʉlʉhekelo nʉ jyʉnge kʉ ntwave.” Akavakumbata, vakalɨla siitso. 10 Vakambʉʉla ʉNaomi vakata, “Ʉwe natʉkakʉleke, tukonganaga nʉʉve kʉ vaanu vaako.”
11 Kange ʉNaomi akavasimiilitsa akata, “Vujagi! Kɨki tʉkonganage nʉʉne? Ndipihola avaana avange lɨno, pakʉta kʉmbele viitse vave vagoosi viinyo? 12 Siwo vʉjagi! Pakʉva ʉne lɨno ndɨlɨ nʼgogolo. Napeene, ndandɨkave ʉnʼgoosi ɨkɨlo ɨjɨ nʉ kʉkava ʉvʉtsito nʉ kʉhola avaana avadɨɨmi, 13 ndajyʉmwisipa kɨtsila kʉva na vagoosi avange, ʉkʉsikila ʉpwʉ viiva vagoosi viinyo? Baako, vaana vango, muleke ʉkwɨhanza nʉʉne, ʉne ndɨlɨ nkʉvɨlwa ʉkʉvalʉtɨɨlɨla ʉnyie, ʉNtwa andemiitse ambombye inalamu mu wʉʉmi waane.”
14 Wʉ vɨpʉlɨka amamenyu ago ikange vakasʉsʉvala nʉ kʉlɨla siitso. Pwʉ ʉOlipa akankumbata ʉnkamwana nʉ kwɨlaga ʉkʉvuja kwa vanyina. ɄLuti akalwɨlɨla akongane nʉ Naomi. 15 Wʉ ilʉta ʉOlipa, ʉNaomi akambʉʉla ʉLuti akata, “Ʉnnino ivuja kʉ vaanu va mwene na kʉ lingʉlʉve lya mwene, najyʉve vujaniagi.”
16 ɄLuti akabeela akata, “Kwʉ baako ʉkʉnsimiilitsa, ʉne ndiiva nʉʉve. Ʉkwʉ wibɨha najyʉne ndibɨhaga, ʉpwʉ vutaamaga najyʉne nditaamaga, avaanu vaako viiva vaanu vaane, ʉNgʉlʉve vaako iiva Ngʉlʉve vaane. 17 Ʉpwʉ ʉlaswɨlaga najyʉne ndɨlaswɨlaga, baaho najyʉne ndisɨɨlwagwa, ʉNtwa aame ʉlʉvʉngʉ ndɨngave ndilekengʼana nʉʉve, ʉvʉswe wʉ weene vʉlatʉlekengʼaniaga.”
18 ɄNaomi wʉ ipʉlɨka amamenyu ago akɨlekelwa ʉkʉnsimiilitsa ʉkʉta avujage ʉkwʉ aahʉmile kwa vanyina. 19 Vakahega ʉNaomi nʉ nkamwanave ʉkʉbɨha mu vʉtsenge ʉwa Betelehemu.
Wʉ vasiike mu vʉtsenge ʉwa Betelehemu, avaanu vooni wʉ vikʉvavona vakadega siitso. Avadala vakatengʉla ʉkwɨvʉʉtsa ʉkʉta, “Ʉjʉ vɨ Naomi?” 20 ɄNaomi akavaanda akata, “Muleke ʉkʉnnyɨlanga Naomi,a munnyɨlangage Mala,b pakʉva ʉNgʉlʉve ʉNyamaka ambombye inalamu mu wʉʉmi waane. 21 Wʉ ndihega apa ʉkʉbɨha mu Moabu ndyale nʉ nʼgoosi na vaana, ʉNtwa angʼiliwe ndɨlɨ nswɨle nʉ kʉva mavoko geene. Kɨki mukʉnnyɨlanga Naomi? ɄNtwa annyɨgile, namwene ʉNyamaka andemiitse.”
22 ɄNaomi wʉ asiike mu vʉtsenge ʉwa mu Betelehemu paninie nʉ Luti ʉva mu Moabu, gwale gwʉ ntengʉlʉ gwa mbene jya ngongilwe.