ɄLuti ihalaala mu nkɨlɨmɨla ɨkya Boazi
2
1 ɄNaomi ʉjʉ aale nʉ lʉkolo lwa ntwave, ʉmuunu ʉmbaha ikange imosu, ʉva nkɨvʉmbʉkʉ ɨkya Elimeleki, nɨ litaawa lya mwene ɨlangwagwa Boazi. 2 Ɨlitsʉva lipamato, ʉLuti va kʉ Moabu akambʉʉla ʉNaomi akata, “Ʉndeke ndɨbɨhe kʉ silɨmɨla ndɨkahalaale isootso itsisigye wʉ vibena. Ndɨlʉmanyile ʉkʉta ndikʉmbona ʉmuunu ʉvɨ apya ikʉnnyɨdɨka ʉkʉhalaala munsana mu mwene.” ɄNaomi akata, “Ndɨpʉliike mwalɨvango bɨhaga.”3 Pwʉ ʉLuti akalʉta kʉ kɨlɨmɨla, akavakonga avibena kʉnʉ alɨkʉhola isootso itsʉ vatsilekile munsana. Akatwelʉkɨlwa kɨtsila kʉlʉmanya alɨ mu kɨlɨmɨla kya Boazi ʉva mu kɨvʉmbʉkʉ kya Elimeleki.
4 Lola, ʉBoazi akasika ʉkʉhʉma kʉ Betelehemu, akavasaamusa avaabenaga akata, “ɄNtwa ave paninie nʉʉnyie.” Naveene vakamwanda, “ɄNtwa akʉsajage.” 5 Pwʉ ʉBoazi akambʉʉtsa ʉmwɨmɨɨlɨtsi va vabeni, “Ʉmmɨnza ʉjwa veeni?” 6 Ʉmwɨmɨɨlɨtsi va vabeni akaanda akata, “Vɨ mmɨnza ʉva kʉ Moabu ʉvɨ itsile paninie nʉ Naomi ʉkʉhʉma mu kɨlʉnga ɨkya Moabu. 7 Akandoovile ndɨndeke akongage munsana ʉmwʉ vibena pakʉta aholage isootso itsisigye mu lʉbelege wʉ vibena. Pwʉ akiitsile, ʉkʉtengʉla pavʉsiku avombile ɨmbombo, kʉ nsɨkɨ inʼdebe akaalʉtile kugatalʉka mu kyeve.”
8 Pwʉ ʉBoazi akambʉʉla ʉLuti akata, “Pʉlɨhɨtsa mwalɨvango, ʉleke ʉkʉbɨha kwihola isootso ʉkʉnge, ʉholage mu kɨlɨmɨla kɨɨkɨ ʉkonganage na vahɨnza avibena. 9 Ʉkʉlongotsiwa kʉ lihʉlʉ ɨlyʉ vibena ʉkonganage navo. Ndɨvapavye avadɨɨmi valeke ʉkʉkʉpalamaasa. Kange ʉngave wivona ʉlɨ nɨ kyʉmɨlwa ʉbɨhage pa nzɨɨlo ʉnywitsage amagasi ʉgwʉ vanegile avadɨɨmi.”
10 Pwʉ ʉLuti akamwinamɨla ʉBoazi ʉkʉsikila paasi. Akambʉʉla akata, “Ndyɨdɨkiiwe ndeeti pamiiho gaako, ʉkʉndekepela ʉne ndɨ ndɨlɨ mmenza?” 11 ɄBoazi akaanda, “Ndɨpʉliike tsyoni itsʉ ʉmbombye ʉnkamwanavo ʉkʉhʉma ʉpwʉ aaswɨlye ʉntwavo. Ndɨlʉmanyile, ʉmwʉ ʉvalekye avahotsi vaako nɨ kɨlʉnga kyako ɨkyʉ waaholilwe, nʉ kwitsa kutaama na vaanu ʉwʉ nʉkavamanye pa vʉtengʉlɨlo. 12 ɄNtwa akʉdɨtsɨhɨtse kʉ syoni isyʉ ʉvombile. ɄNtwa, ʉNgʉlʉve ʉva Isilahɨli ʉvɨ ʉmwitsye akʉdɨɨme, akwʉvatage mu mapapatɨlo ga mwene, akʉpeetsage ʉvʉnonu wooni.” 13 Pwʉ ʉLuti akamwanda akata, “Intwa vango, ʉve ʉmbombye inonu nyongosu siitso. Nda ndɨngave nandɨlɨninie va vavombi vaako, ʉve ʉjɨhowiise ɨnumbula jyango. Ʉmbʉʉlile vʉnonu ndɨ mbanda vaako.”
14 Ʉnsɨkɨ ʉgwa kyakʉlya, ʉBoazi akamwɨlanga ʉLuti, akambʉʉla akata, “Hegelela kwawe wiitse ʉlye ʉnkate nʉ kʉsaasa mu divai ɨngʼali.” Pwʉ ʉLuti akataama paninie na vabenaga, namwene ʉBoazi akampa ɨngongilwe ɨnyʉtsʉʉle. ɄLuti akalya akiguta nʉ kʉsigatsa. 15 Jɨkava ʉLuti wʉ alʉtile kuhalaala, pwʉ ʉBoazi akavavʉʉla avavombambombo va mwene avaabenaga, “Mundekage alʉndamaniage mu ndʉbelege na mu ngosa, muleke ʉkʉmʼbeetsa. 16 Paninie naago, muswɨkʉlage isootso mu ngosa nʉ kʉndeka aholage kɨtsila kʉnkelemukila.”
17 ɄLuti akahalaala isootso ʉkʉsika kʉmihe. Akakʉvata ɨngongilwe jɨkadɨga ɨlidebwe lipamato na pakyanya. 18 Pwʉ akatoola, akɨtwɨka ʉkʉbɨha najyo kʉ vʉtsenge kʉvonia kʉ nkamwanave ɨjyʉ ahalaalile. Akahʉmya ɨkyakʉlya ɨkyʉ akasigiitse wʉ alye igwite, akampa ʉnkamwanave.
19 Namwene ʉnkamwanave akambʉʉtsa akata, “Ʉhalaalile ndaku ɨjɨ jyoni? Ʉkaale mu kɨlɨmɨla kyani? Aginiwaagwe ʉjʉ ʉvɨ akʉtangile ʉve.” ɄLuti akambʉʉla ʉnkamwanave akata, “Ndɨkavombaga ɨmbombo mu kɨlɨmɨla ɨkya muunu ʉvɨ ikwɨlangwa Boazi.” 20 ɄNaomi akambʉʉla akata, “ɄNtwa ʉvɨ alɨ nɨ kɨsa kʉ vʉʉmi na vaswe, ansajage ʉBoazi.” Kange akambʉlanitsa ʉkʉta, “Ʉjʉ vɨ ninie nʉ lʉkolo lwitu ʉva pawiipi, ʉvɨ anogye ʉkʉtʉlela.” 21 ɄLuti ʉva kʉ Moabu akambʉʉla akata, “Kange ndɨkavʉʉlilwe nʉ Boazi ʉkʉta, ndɨsigale paninie na vavombi va mwene avibena ʉkʉsika ʉpwʉ vimala.”
22 Pwʉ ʉNaomi akambʉʉla akata, “Mwana vango, lʉnonu ʉve ʉkonganage na vahɨnza va mwene, apange avaanu jyʉ vikʉkʉgatatsaaga, ʉleke ʉkʉlʉta kʉ lihʉlʉ ɨlɨnge ɨlyavetsaga.” 23 ɄLuti akavakonga avahɨnza ava Boazi ʉmwʉ vibena. Akahalaala isootso ʉkʉsika ʉpwʉ vimala ʉkʉbena ɨngongilwe nɨ nganu. Ʉnsɨkɨ ʉgwa gwoni alɨkʉtaama nʉ nkamwanave.