ɄLuti ivʉʉlwa ʉkʉta akave ʉnʼgoosi
3
1 Pwʉ ʉNaomi akambʉʉla ʉnkamwana akata, “Mwana vango, lwiva lʉnonu ʉne ndɨkʉlondele ʉmuunu ʉva kʉkʉloleela pakʉta ʉve nʉ lʉnotsehetso. 2 ɄBoazi ʉvɨ ʉkaale kʉ kɨlɨmɨla na vahɨnza va mwene, ʉjwa va kɨvʉmbʉkʉ kiitu. Lola, ɨmihe ɨjɨ jyʉ iiva pa kʉpeeta ɨngongilwe pa kɨkʉvatɨlo. 3 Ʉve lɨno wooge, wɨbake amafuta nʉ kʉswala vʉnonu, pwʉ ʉbɨhe pa kɨkʉvatɨlo, ʉlɨvonesaaga kʉ mwene wʉ naliili nʉ kʉnywa. 4 Kange ʉtsingahɨtse ʉpamanye ʉpwʉ apya igona. Wʉ agoneelye ʉlʉte vunyemeelʉka, ʉgubukule amalʉnde, wɨgoneletse baaho.a Ʉmwene jiikʉkʉvʉʉla ɨkya kʉvomba.” 5 ɄLuti akaanda akata, “Ago gooni ʉgwʉ ʉmbʉʉlile ndivomba.”6 ɄLuti akalʉta pa kɨkʉvatɨlo akavomba tsyoni tsilya itsʉ akavʉʉlilwe nʉ nkamwanave. 7 Lola, ʉBoazi wʉ alie nʉ kʉnywa, ɨnumbula jya mwene jɨkahovoka, akalʉta kwigona pa lʉkanzi pa kɨlʉndʉ kya ngongilwe. ɄLuti akalʉta mola mola akagubukula amalʉnde ga Boazi akɨgoneeletsa baaho.
8 Pwʉ munkɨlo nʼgati ʉBoazi wʉ igalamuka, akakenyemuka ʉnʼdala igona pa malʉnde ga mwene. 9 Pwʉ ʉBoazi akata, “Veeve veeni?” ɄLuti akata, “Neene Luti, ndɨ mbanda vaako. Pakʉva ʉve ʉlɨ ninie va kɨvʉmbʉkʉ kyango vɨnyakʉndela, gubika ʉmwenda gwako pakyanya pa ndɨ mbanda vaako.”b
10 ɄBoazi akata, “Mwana, ʉNtwa akʉsajage. Ʉve ʉvoniitse lɨno ʉkʉkɨgana ɨkɨkolo kiitu, ʉlʉtɨliitse ʉkʉkɨgana ʉkʉlɨngʼaania na pa vʉtengʉlɨlo.c Nʉkalonde ʉnʼdɨɨmi ʉva kʉkʉtoola ave imosu evo inʼgatsu. 11 Mwana, ʉleke ʉkʉdwada, ʉne ndikʉkʉvombela tsyoni itsʉ ʉmbʉʉlile, pakʉva ɨlitsumbe lyoni lɨlʉmanyile ʉvʉdekedeke waave. 12 Kange tsa jɨlweli ʉne pannogye ʉkʉkʉhaala, lɨno pwale ʉnya kʉkʉhaala ʉva nkɨkolo ɨkya pawiipi ʉkʉlʉtɨɨlɨla kwane. 13 Lɨno taama baaha ɨkɨlo ɨjɨ jyoni. Kɨlaavo pavʉsiku twilola angave ikwɨdɨka ʉkʉkʉhaala. Angave ibeela ʉmwene, ʉne ndikɨjyɨga kʉ Ntwa ʉnya wʉʉmi, ndikʉkʉvombela itsinogye mu nkɨkolo. Gonaga baaha ʉkʉsika pavʉsiku.”
14 Lola, ʉLuti akagona kʉ malʉnde ʉkʉsika wʉ wiikya. Pavʉsiku jyɨkɨlo wʉ kwikya, akasisimuka nʉ kʉhega kɨtsila kʉvoneka kʉ muunu ʉvaveetsaga, pakʉva ʉBoazi naanogwe ʉkʉta ʉmuunu ʉjyʉnge alʉmanye ʉkʉta ʉnʼdala akasiike pa kɨkʉvatɨlo. 15 ɄLuti wʉ ihega, pwʉ ʉBoazi akambʉʉla akata, “Tandɨka ʉmwenda gwako paasi.” ɄLuti akatandɨka, pwʉ ʉBoazi akanʼgelela ɨngongilwe ɨlidebwe lipamato na pakyanya, akantwɨka, akahega alɨkʉvuja kʉ vʉtsenge.
16 Wʉ atsisiike kʉ nyumba, ʉnkamwanave akambʉʉtsa akata, “Ehee! Mwana vango, tsivye ndeeti?” ɄLuti akambʉʉla tsyoni itsʉ ʉBoazi ambombye. 17 Kange ʉLuti akata, “Ndɨkavʉʉlilwe, ndɨleke ʉkʉvuja kʉ nyumba mavoko geene. Lola, ɨlidebwe na pakyanya ɨlya ngongilwe ɨlyʉ aamye.” 18 ɄNaomi akaanda akata, “Mwana vango lɨno gatalʉka, ʉlole ɨlyʉ likʉkwitsila, ʉlwakʉva ʉBoazi nakɨpʉlɨke kɨtsila kʉmala ɨleelo ɨjɨ ʉvʉsumbe ʉvʉ.”