ɄBoazi ikʉntoola ʉLuti ave inʼdala va mwene
4
1 Pwʉ ʉBoazi akahega akabɨha pa kɨtaamo kya vanzagɨla, akataama. Lola, wʉ ikʉmbona ʉmuunu ʉva kɨkolo kya mwene ʉvɨ akantsoviige ilʉtɨngʼania, akamwɨlanga akata, “Lʉkololwango, tsuvula ʉtaame apa.” Namwene ʉlʉkololwe akiitsa, akataama. 2 ɄBoazi akavatoola avanzagɨla kɨtsigo ava nditsumbe lɨlya akata, “Ndikʉvadoova najyʉnyie mutaame apa.” Vakataama. 3 Pwʉ akambʉʉla ʉlʉkololwe akata, “ɄNaomi ʉvɨ akiliwiike ʉkʉhʉma mu Moabu, inogwa ʉkʉgʉtsa ɨkɨlɨmɨla ɨkyale kya lʉkolo lwitu ʉElimeleki. 4 Lola, ʉne ndɨweene lʉnonu ndɨkʉvʉʉle ɨkulongwi ɨjɨ. Lɨno ʉngave vʉnogwa ɨkɨlɨmɨla ɨkɨ, hʉmya kɨninie ʉgʉle wʉ vilola avanzagɨla avalɨ paninie nʉʉwe apa. Ʉngave vunogwa evo ʉngave navunogwa, ʉmbʉʉle, pakʉva ʉva kʉtala ʉkʉkɨgʉla veeve, ʉva kʉkonga neene.” Namwene akata, “Ʉne ndɨpigʉla.”5 ɄBoazi akaanda akata, “Lwiva lʉnonu, ɨkɨgono ɨkyʉpya wigʉla ɨkɨlɨmɨla mu mavoko ga Naomi, pwʉ vukʉnʼgʉla najʉ Luti ʉva kʉ Moabu, ʉnʼdala va malihemu, pakʉta ɨlitaawa lya mwene lɨleke ʉkʉjaga paninie nɨ kɨlɨmɨla.” 6 Ʉlʉkololwe akaanda akata, “Ʉne nandɨkagombole ɨkɨlɨmɨla ɨkyo pakʉva jʉndinanga ʉvʉhaale waane.”
7 Isigono silya lwale lwiho mu kɨlʉnga kya Vaisilahɨli, ʉkʉgombola nʉ kwʉpɨngʼana isiinu, ʉmuunu aasuulaga ɨkɨlaatu kya mwene nʉ kʉmpa ʉnnine. Ɨkyo kyale kyʉ kɨvonekelo mu Isilahɨli ʉkʉta vamalile ʉkwɨdɨngʼana. 8 Pwʉ ʉlʉkololwe akambʉʉla ʉBoazi akata, “Gʉla jyʉve.” Pwʉ akasuula ɨkɨlaatu kya mwene akampa ʉBoazi.
9 Kange ʉBoazi akavavʉʉla avanzagɨla na vaanu vooni akata, “Ɨleelo ɨjɨ ʉnyie mulolile na miiho giinyo ʉkʉta, ndɨgʉlile gooni ʉkʉhʉma mu mavoko ga Naomi, gooni agaale ga Elimeleki nʉ Kilioni nʉ Maloni. 10 Kange ʉLuti ʉva kʉ Moabu ʉnswɨle ndɨgʉlile ave nʼdala vango, ndɨmolele avaana, pakʉta ɨlitaawa lya Maloni lɨleke ʉkʉjaga mu nkɨvʉmbʉkʉ kya mwene, na pa litsumbe lya mwene. Ɨleelo ʉnyie mulolile.”
11 Pwʉ avanzagɨla paninie na vaanu vooni avaale pa kɨtaamo vakata, “Tsa jɨlweli, tʉlolile lweli nʉ kʉtsingahɨtsa. ɄNtwa ambombelage ɨnonu ʉvɨ apya iiva inʼdala vaako, ndʉwʉ aavavombye inonu ʉLahɨli nʉ Leya. Avo wʉ veene vaajɨtsengile ɨnyumba ɨjya Isilahɨli. Najyʉve vʉle vʉle ʉNgʉlʉve akwɨmɨkage nʉ kʉmanyikika mu kɨkolo kya Efulata, ʉve lʉmuli mu Betelehemu. 12 ɄNtwa akwɨmɨke, akʉpe avaana kʉ nʼdala ʉjʉ. Ɨkɨkolo kyako kɨhwanane nɨ kya Pelesi ʉvɨ ʉTamali aamolye ʉYuuda.”
ɄDavʉdi nɨ kɨkolo kya mwene
13 ɄBoazi akantoola ʉLuti, akava inʼdala va mwene, ʉNtwa akansaja ʉLuti akakava ʉvʉtsito, akahola ʉmwana ʉnʼdɨɨmi. 14 Naveene avadala vakambʉʉla ʉNaomi, vakata, “ɄNtwa aginiwaagwe ʉvɨ nakʉlekili kɨtsila kʉva nɨ kɨkolo ɨkya pawiipi. Ɨlitaawa lya mwana liveetsaga livaha mu Isilahɨli. 15 Namwene ʉnkamwanavo ʉvɨ akʉganile nʉ kʉkʉvombela inonu, ʉkʉlʉtɨɨlɨla avaana saba avagoosi, vɨ mwene akʉholye ʉmwitsʉkʉlʉ. Namwene jiikʉkʉkilivulila ʉwʉʉmi waave, nʉ kʉkʉlela mu vʉgogolo waako.”
16 Pwʉ ʉNaomi akantoola ʉmwana ʉjʉ akambɨɨka pa kɨpambaga nʉ kʉndela ndʉ mwana va mwene. 17 Avadala avapawiipi vakata, “ɄNaomi akavile ʉmwana.” Vakampa ɨlitaawa vɨ Obedi. Pwʉ ʉObedi akammola ʉYese ʉvɨ aaholile kwa Davʉdi.
18 Isikonga syʉ sivʉmbʉkʉ sya Pelesi:
ɄPelesi akammola ʉHesoloni,
19 ʉHesoloni akammola ʉLamu,
ʉLamu akammola ʉAminadabu,
20 ʉAminadabu akammola ʉNasoni,
ʉNasoni akammola ʉSalumoni.
21 ɄSalimoni akammola ʉBoazi,
ʉBoazi akammola ʉObedi,
22 ʉObedi akammola ʉYese,
ʉYese akammola ʉDavʉdi.