Ʉlwɨsajo lwa Yoona
“Ʉnsɨkɨ gwa vʉkʉvɨlwa ndɨlɨkʉmwɨlanga ʉNtwa vango,
pwʉ najyʉve ʉkannyanda.
Wʉ gupʉʉga ndɨlɨkʉlɨla nʉ kwɨsaja ʉmoke,
ʉkapʉlɨka ʉlwɨsajo lwango.
3 Wanoolile ʉkanaaga mu nyanza,
ndɨkatsisika paasi pa mmanga gwa nyanza.
Ʉlʉgasi lʉkava lʉnzʉngʉtye,
nagwene ʉnkʉluguuto gwa mu nyanza
gʉlɨkʉlʉtɨngʼania pakyanya ʉpwʉ ndyale ʉne.
4 Lola, ndyatye, ‘Ʉnaagile kʉvʉtale
ʉkwʉ ʉve vɨ Ngʉlʉve navukʉmbona.
Ndɨlɨkʉsaaga ʉkʉta nandɨkajɨvone ɨnyumba jyako ɨmbalatse.’
5 Amagasi gakava ganzʉngʉtye,
ndɨkava mu vʉtalamu ʉwa kʉswa,
ndɨkava ndɨmililwe nɨ nyanza,
na manyasi ga ndʉgasi gakava gatsʉngʉtye pa ntwe gwango.
6 Lola, ndɨlɨ paasi mu nyanza pa vʉtengʉlɨlo wa sidugala,
ndɨkadɨndilwe ʉkwonu ʉkwʉ ndyalemilwe ʉkʉhʉma lʉsiku.
Ʉve, ʉkatsisika ʉkwa kʉ vʉviivi ʉkanoola,
ʉkavʉtotsa ʉwʉʉmi, vɨ Ntwa, vɨ Ngʉlʉve vango.
7 Ʉvʉswe waane wʉ vʉhegelye,
ndɨkakʉkʉmbʉka ʉve vɨ Ntwa vango, nʉ kwɨsaja kwave.
Ʉlʉdoovo ʉlʉ lʉkasika
mu nyumba jyako ɨmbalatse.
8 Avaanu vooni avikɨsaja kʉ mingʉlʉve,
vilekengʼana nɨ kɨsa kyako.
9 Lola, ndikʉkwɨmbɨlaga ʉlwɨmbo lwa kʉkʉsaana
nʉ kʉhʉmya isyavʉpe syango,
ndikwɨtsaga ʉlwɨjyɨgo lwango kwave vɨ Ntwa,
manya ndɨlʉmanyile ʉkʉta veeve vɨ wipoka.”
10 Pwʉ ʉNtwa akatsova nɨ somba ɨjyʉ jyamilile ʉYoona, ɨsomba jɨkanʼdeeka ʉYoona ʉkʉhʉma mu litumbu lya jyene apoonu pa vʉlagasu kʉlʉgasimbale.