YONA
ɄYoona igela ʉkwɨdyetsa kʉ Ntwa ʉNgʉlʉve
1
1 Ɨkɨgono kɨpamato, ʉNtwa akambʉʉla ʉYoona, ʉmwana va Amitai akata, 2 “Hega ʉbɨhe kʉ Ninawi, ʉvʉtsenge ʉvʉvaha vʉlya, ʉkadome ɨngoolo ʉvavʉʉle avaanu ʉkʉta imbiivi tsa veene tsiginile siitso pamiiho gaane.”3 Wʉ ʉYoona apʉliike ago, akalamula ʉkʉnyilila kʉ Talishishi, ɨdyetse pamiiho ga Ntwa. Akagenda, akiika, akatsisika kʉ vʉtsenge ʉwa kʉ Yopa ʉwʉ waale kʉ nyanza kʉ lʉkanzi. Palya akajɨvona ɨmeeli ɨjyalotsaaga kʉ Talishishi. Akahʉmya ɨnavʉli nʉ kwingila mu meeli, abɨhe paninie naveene kʉ Talishishi, ɨdyetse pamiiho ga Ntwa.
4 Pwʉ ʉNtwa akasuungʼa ʉmbelo, kʉkava nʉ nkuluguuto ʉmbaha mu nyanza, ɨmeeli jɨkatengʉla ʉkʉjʉgajʉga wiita jɨnya kʉbatsʉka. 5 Avavombambombo avaale mu meeli vakatengʉla ʉkʉhangajɨka, pakʉva valɨkʉdwada ʉkʉdwiviila mu nyanza. Vooni vakatengʉla ʉkwɨsaja kʉ mingʉlʉve gya veene ʉkʉta gɨvapoke. Vakataaga mu nyanza isiinu isyʉ vaale nasyo mu meeli, ʉkʉta ɨmeeli jɨve nyebeepe.
Ʉnsɨkɨ ʉgwa ʉYoona akava ikile paasi mu nʼgati mu meeli agoneelye itʉlʉ. 6 Ʉndongotsi va mu meeli akabɨha ʉpwʉ aale ʉYoona, akata, “Kɨɨnu kɨki ɨkɨkʉpelye ʉve ʉkʉgoneelela avanino wʉ vihangajɨka? Sisimuka! Ʉdoovage najyʉve ɨlingʉlʉve lyave apange likʉtʉkolela ɨkɨsa nʉ kʉtʉpoka.”
7 Avavombambombo avaale mu meeli wʉ vaweene napwʉkɨle ɨkikwandʉka vakatengʉla ʉkʉvʉʉtsania vakata, “Tʉlʉmanye veeni ʉvɨ apelile ʉvʉtalamu ʉvʉvaha ndʉʉvʉ?” Vakagela kʉ sigelelo sya veene. Vakamwibata ʉYoona ʉkʉta vɨ ntulanongwa. 8 Vakambʉʉtsa ʉYoona vakata, “Ʉtʉvʉʉle jyʉve, ʉve vʉvomba mbombo nyiki? Veeve veeni? Wihʉma kɨlʉnga kɨki? Ʉlɨ va kɨvʉmbʉkʉ kɨlɨku? Ʉvombile nyiki itsitʉpelye ʉkʉvʉngwa sivi ewo?”
9 Pwʉ ʉYoona akavaanda akata, “Ʉne ndɨlɨ Mwebulaniya. Ndikɨsaja kʉ Ntwa, ʉNgʉlʉve ʉva kʉkyanya ʉvɨ aapelile ɨkɨlʉnga nɨ nyanza.” 10 Kange akoongeletsa akata, “Ndɨlɨ mu nzɨla, ndikʉkɨmbɨla ʉNtwa.” Wʉ vapʉliike amamenyu ago, avaanu vooni vakadwada, vakambʉʉtsa vakata, “Kɨɨnu kɨki kɨkʉpelye ʉkʉvomba ewo?”
11 Wʉ vaweene ʉmbelo gwigina nʉ kʉva na maka, vakambʉʉtsa ikange ʉYoona vakata, “Ndʉwʉ wilola jyʉve, wiita tʉkʉvombele nyiki ʉve itsipya tsikʉjɨpelelaga ɨnyanza ʉkʉlitama?” 12 ɄYoona akavaanda akata, “Munoole nʉ kʉnaaga mu nyanza pwʉ ɨnyanza jilitama. Ndɨlʉmanyile siitso ʉkʉta ʉmbelo ʉgʉ gʉvaweene ʉnyie kʉ nongwa jyango ʉne.”
13 Lola, vakavomba ʉlwʉtsi ʉlwa kʉgegela ɨmeeli kʉ lʉkanzi kʉ nyanza vakalemwa, pakʉva ʉmbelo gwale mbaha ʉkʉlʉtɨɨlɨla siitso. 14 Wʉ vaweene vagagiilwe vakanʼdoova ʉNtwa vakata, “Gwe vɨ Ntwa, ʉleke ʉkʉtʉbuda ʉwe kʉ nongwa jya kʉmʼbuda ʉmuunu ʉjʉ. Pange ʉlatʉhɨgaga pa nongwa jya kʉbuda ʉmuunu ʉjʉ ʉntsilanongwa. Ndʉwʉ wilola ʉmbelo ʉgʉ, ʉve vɨ Ntwa, ʉsuungʼile kʉ mwene pa vʉnogwe waako ʉve.” 15 Vaavye vamalile ʉkʉtsova ewo vakantoola ʉYoona vakandahɨɨla mu nyanza. Ʉnsɨkɨ gʉʉgwa ʉmbelo gʉkajaganika nɨ nyanza jɨkalitama. 16 Avaanu avaale mu meeli wʉ vikʉtsivona itsavombekaga palya, vakanʼdwada ʉNtwa. Vakahʉmya isyavʉpe, ikange vakɨjyɨga ʉkʉta vikʉmbombelaga ʉmwene.
17 Pwʉ ʉNtwa akasuungʼa ɨsomba ɨmbaha jɨkammila ʉYoona. ɄYoona akataama mu litumbu lya somba isigono sidatu.